ಸೋಮವಾರ, 16 ಸೆಪ್ಟೆಂಬರ್ 2024
×
ADVERTISEMENT
ಈ ಕ್ಷಣ :
ADVERTISEMENT

ಉಡುಪಿ | ಜನ್ಮಾಷ್ಟಮಿ: ಕೃಷ್ಣಮಠದಲ್ಲಿ ಸಿದ್ಧತೆ ಜೋರು

Published : 25 ಆಗಸ್ಟ್ 2024, 4:56 IST
Last Updated : 25 ಆಗಸ್ಟ್ 2024, 4:56 IST
ಫಾಲೋ ಮಾಡಿ
Comments

ಉಡುಪಿ: ಶ್ರೀಕೃಷ್ಣ ಜನ್ಮಾಷ್ಟಮಿ ಮತ್ತು ವಿಟ್ಲಪಿಂಡಿ ಉತ್ಸವಕ್ಕಾಗಿ ಉಡುಪಿಯ ಶ್ರೀಕೃಷ್ಣ ಮಠ ಸಿಂಗಾರಗೊಂಡು ಸಜ್ಜಾಗುತ್ತಿದೆ.‌

ಅಷ್ಟಮಿ ಅಂಗವಾಗಿ ಇದೇ 26ರಂದು ಕೃಷ್ಣನಿಗೆ ಅರ್ಘ್ಯ ಪ್ರದಾನ ನಡೆಯಲಿದ್ದು, 27 ವಿಟ್ಲಪಿಂಡಿ ಮಹೋತ್ಸವ ವಿಜೃಂಭಣೆಯಿಂದ ನಡೆಯಲಿದೆ. ಸಾವಿರಾರು ಮಂದಿ ಭಕ್ತರು ಇದರಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆ ಇದೆ.

ವಿಟ್ಲಪಿಂಡಿಯಂದು ಮೊಸರು ಕುಡಿಕೆ ನೇತುಹಾಕುವ ಗುರ್ಜಿಗಳನ್ನು ರಥಬೀದಿಯಲ್ಲಿ ಹಲವು ಕಡೆ ನೆಡಲಾಗಿದೆ. ಮೊಸರು, ಅರಿಶಿನ, ಕುಂಕುಮ ಮಿಶ್ರಿತ ದ್ರವ್ಯಗಳನ್ನು ಅಲಂಕೃತ ಮಣ್ಣಿನ ಕುಡಿಕೆಗಳಿಗೆ ತುಂಬಿಸಿ ಈ ಗುರ್ಜಿಗಳಿಗೆ ನೇತು ಹಾಕಲಾಗುತ್ತದೆ. ಗೊಲ್ಲ ವೇಷಧಾರಿಗಳು ಅದನ್ನು ಒಡೆಯುತ್ತಾರೆ.

ಭಕ್ತರಿಗೆ ಪ್ರಸಾದ ರೂಪದಲ್ಲಿ ಹಂಚುವ ಚಕ್ಕುಲಿ, ಉಂಡೆಗಳ ತಯಾರಿಗೂ ಸಿದ್ಧತೆ ನಡೆದಿದೆ. ರಥಬೀದಿಯಲ್ಲಿ ಹೂವು ಹಾಗೂ ಪೂಜಾ ಸಾಮಾಗ್ರಿಗಳ ಮಾರಾಟವು ಗರಿಗೆದರಿದೆ.

ಪರ್ಯಾಯ ಪುತ್ತಿಗೆ ಮಠದ ವತಿಯಿಂದ ಶ್ರೀಕೃಷ್ಣ ಜನ್ಮಾಷ್ಟಮಿಯನ್ನು ಈ ಬಾರಿ ಶ್ರೀಕೃಷ್ಣ ಮಾಸೋತ್ಸವ ಮೂಲಕ ಆ. 1ರಿಂದ ಸೆ.1ರವರೆಗೆ ಆಚರಿಸಲಾಗುತ್ತಿದೆ.

ಮಾಸೋತ್ಸವದ ಅಂಗವಾಗಿ ಈಗಾಗಲೇ ಕ್ರೀಡೋತ್ಸವ, ಲಡ್ಡೋತ್ಸವ ಮತ್ತು ಲೀಲೋತ್ಸವ ನಡೆದಿದ್ದು, ಇದೇ 25ರಂದು ನೃತ್ಯೋತ್ಸವ ಮತ್ತು 26ರಂದು ಡೋಲೋತ್ಸವ 27ರಂದು ಲೀಲೋತ್ಸವ ನಡೆಯಲಿದೆ.

ವಿಟ್ಲಪಿಂಡಿಯಂದು ಹುಲಿ ವೇಷ ಸೇರಿದಂತೆ ವಿವಿಧ ವೇಷಧಾರಿಗಳ ಕುಣಿತ ಪ್ರದರ್ಶನ ಹಾಗೂ ಸ್ಪರ್ಧೆಗಳು ನಡೆಯಲಿದ್ದು, ಹುಲಿಗಳ ಕುಣಿತಕ್ಕಾಗಿ ವೇದಿಕೆ ನಿರ್ಮಿಸುವ ಕೆಲಸವೂ ಭರದಿಂದ ಸಾಗಿದೆ.

ಶ್ರೀಕೃಷ್ಣ ಜನ್ಮಾಷ್ಟಮಿಯ ಲೀಲೋತ್ಸವಕ್ಕೆ ರಥಬೀದಿ ಸಿದ್ಧಗೊಂಡಿದೆ
ಶ್ರೀಕೃಷ್ಣ ಜನ್ಮಾಷ್ಟಮಿಯ ಲೀಲೋತ್ಸವಕ್ಕೆ ರಥಬೀದಿ ಸಿದ್ಧಗೊಂಡಿದೆ
ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಸ್ವಾಮೀಜಿ
ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಸ್ವಾಮೀಜಿ
‘ಭಗವದ್ಗೀತೆಯ ಸಂದೇಶ ಅನುಸರಿಸಿ’
ಪ್ರತಿಯೊಬ್ಬರೂ ಭಗವದ್ಗೀತೆ ಅಧ್ಯಯನ ಮಾಡಿ ಅದರಲ್ಲಿನ ಸಂದೇಶ‌ಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು ಎಂದು ಪರ್ಯಾಯ ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಹೇಳಿದರು. ಶ್ರೀಕೃಷ್ಣ ಮಾಸೋತ್ಸವದ ಅಂಗವಾಗಿ ಕೃಷ್ಣ ಮಠದ ರಾಜಾಂಗಣದಲ್ಲಿ ಶನಿವಾರ ನಡೆದ ಗೀತೋತ್ಸವ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಕೃಷ್ಣನಿಗೆ ಅತ್ಯಂತ ಪ್ರಿಯವಾದ ಸೇವೆ ಗೀತೋತ್ಸವವಾಗಿದೆ. ಜೀವನದ ಸಾರ್ಥಕ್ಯಕ್ಕೆ ಭಗವದ್ಗೀತೆಯ ಅಧ್ಯಯನ ಅತೀ ಮುಖ್ಯ. ಅದನ್ನು ಓದದ ಜೀವನವೇ ವ್ಯರ್ಥ. ಭಗವದ್ಗೀತೆಯನ್ನು ಓದಿದರೆ ಎಲ್ಲವನ್ನೂ ಓದಿದಂತೆ. ಆ ಮೂಲಕ ದೇವರ ಅನುಗ್ರಹ ಪಡೆಯಬಹುದು ಎಂದರು.

ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT