ಕನಕದಾಸರ ಮಾರ್ಗದರ್ಶನ ಅನುಸರಿಸಿದರೆ ಶಾಂತಿ, ಸೌಹಾರ್ದತೆ ಸಾಧ್ಯ: ಶೋಭಾ ಕರಂದ್ಲಾಜೆ

ಕನಕದಾಸರ ಭಕ್ತಿ ಸಂಧಿಗ್ಧತೆಗೆ ಶ್ರೀಕೃಷ್ಣನೇ ದರ್ಶನ ನೀಡಿರುವುದು ಇತಿಹಾಸದ ಪುಟಗಳಲ್ಲಿ ದಾಖಲಾಗಿದೆ. ಇಂದಿಗೂ ಶ್ರೀಕೃಷ್ಣ ಮಠಕ್ಕೆ ಆಗಮಿಸುವ ಭಕ್ತರು ಪ್ರಥಮವಾಗಿ ಕನಕನ ಕಿಂಡಿಯ ದರ್ಶನ ಪಡೆದು ಬಳಿಕ ಕೃಷ್ಣನ ದರ್ಶನ ಪಡೆಯುತ್ತಾರೆ. ಜಿಲ್ಲೆಯಲ್ಲಿ ಕನಕ ಭವನ ನಿರ್ಮಾಣ ಮಾಡಬೇಕು ಎಂಬ ಪ್ರಸ್ತಾವವನ್ನು ಸರ್ಕಾರದ ಮುಂದಿಟ್ಟು ಮುಂದೆ ಕನಕ ಭವನದಲ್ಲಿಯೇ ಕನಕ ಜಯಂತಿ ಆರಿಸುವಂತಾಗಲು ಪ್ರಾಮಾಣಿಕ ಪ್ರಯತ್ನ ಮಾಡಲಾಗುವುದು ಎಂದು ಶಾಸಕ ಯಶ್‌ಪಾಲ್ ಸುವರ್ಣ ಭರವಸೆ ನೀಡಿದರು.

‘ಮಾತಿನಿಂದ ಮಾಡಲು ಸಾಧ್ಯವಿಲ್ಲದ ಕೆಲಸವನ್ನು ಸಂಗೀತ ಮಾಡುತ್ತದೆ. ಕನಕದಾಸರು ಹಾಡಿನ ಮೂಲಕ ಸಮಾಜಮುಖಿ ಸಂದೇಶಗಳನ್ನು ನೀಡಿದ ಮಹಾಪುರುಷರು. ಯುದ್ಧ ಕೌರ್ಯ ಹಿಂಸೆ ಜಗತ್ತಿನ ಮೂಲೆ ಮೂಲೆಗಳಲ್ಲಿ ವಿಜೃಂಭಿಸುತ್ತಿರುವ ಕಾಲಘಟ್ಟದಲ್ಲಿ ಬದುಕಿನ ಸಾರ್ಥಕತೆಯ ನಿಜವಾದ ಪರ್ಯಾಯ ಕನಕದಾಸರಂತೆ ಕಾಣುತ್ತದೆ. ಸಾಹಿತ್ಯ ಲೋಕಕ್ಕೆ ಕನಕದಾಸರ ಕೊಡುಗೆ ಅಪಾರ. ಸಮಾಜದಲ್ಲಿ ಮೇಲು-ಕೀಳು ತಾರತಮ್ಯ ಅನುಭವಿಸಿ ಮನನೊಂದು ಸಮಾಜ ಪರಿವರ್ತನೆಗೆ ಕೀರ್ತೆನೆಗಳನ್ನು ಮಾಧ್ಯಮವನ್ನಾಗಿ ಬಳಸಿಕೊಂಡರು’ ಎಂದು ಉಡುಪಿ ಸರ್ಕಾರಿ ಪದವಿಪೂರ್ವ ಕಾಲೇಜಿನ ಹಿರಿಯ ಉಪನ್ಯಾಸಕಿ ಎಸ್‌.ಸುಮಾ ಹೇಳಿದರು.