ಉಡುಪಿ: ಇತಿಹಾಸದ ಪುಟ ಸೇರಿದ ಹಳೆ ತಾಲ್ಲೂಕು ಕಚೇರಿ

ನಗರಸಭೆಯ ಹೊಸ ಕಟ್ಟಡ ನಿರ್ಮಾಣಕ್ಕಾಗಿ ಈ ಐತಿಹಾಸಿಕ ಕಟ್ಟಡವನ್ನು ನೆಲಸಮಗೊಳಿಸಲಾಗಿದೆ. ಹಲವು ದಿನಗಳಿಂದ ಕಟ್ಟಡ ತೆರವು ಕಾಮಗಾರಿ ನಡೆದಿದೆ.

ಕಟ್ಟಡದ ಹಂಚು, ಮರದ ಹಲಗೆ, ಕಬ್ಬಿಣದ ಸಲಾಕೆಗಳನ್ನು ತೆರವುಗೊಳಿಸಿದ ಬಳಿಕ ಗೋಡೆಗಳನ್ನೂ ಇದೀಗ ಕೆಡವಲಾಗಿದೆ.

ಸ್ವಾತಂತ್ರ್ಯಪೂರ್ವದಲ್ಲಿ ಸಬ್‌ಜೈಲ್‌ ಆಗಿದ್ದ ಈ ಕಟ್ಟಡವು ಐತಿಹಾಸಿಕ ಮಹತ್ವವನ್ನು ಪಡೆದಿತ್ತು. ಕಟ್ಟಡಕ್ಕೆ ಪಾರಂಪರಿಕ ಮಾನ್ಯತೆ ನೀಡಿ ಉಳಿಸಬೇಕೆಂಬ ಕೂಗು ಎಲ್ಲೆಡೆ ಕೇಳಿ ಬಂದಿತ್ತು. ಆದರೆ ಅದು ವಿಫಲವಾಗಿತ್ತು.

1906ರಲ್ಲಿ ಈ ಕಟ್ಟಡವನ್ನು ನಿರ್ಮಿಸಲಾಗಿತ್ತು ಎಂದು ಹೇಳಲಾಗಿದೆ. ಸ್ವಾತಂತ್ರ್ಯ ಹೋರಾಟದಲ್ಲಿ ಭಾಗಿಯಾದವರನ್ನು ಈ ಕಟ್ಟಡದ ಹಿಂಬದಿಯ ಜೈಲಿನಲ್ಲಿರಿಸಲಾಗಿತ್ತು. ನಗರದಲ್ಲಿ ಹೊಸ ಜೈಲು ನಿರ್ಮಾಣವಾಗುವವರೆಗೂ ಈ ಜೈಲಿನಲ್ಲಿ ಕೈದಿಗಳನ್ನು ಇಡಲಾಗಿತ್ತು.

ಮದ್ರಾಸ್‌ ರೂಫಿಂಗ್‌ ವಿನ್ಯಾಸದಲ್ಲಿ ಕಟ್ಟಲಾಗಿದ್ದ ಈ ಕಟ್ಟಡವು ಬ್ರಿಟಿಷ್‌ ವಾಸ್ತು ಶಿಲ್ಪ ವೈಭವಕ್ಕೆ ಸಾಕ್ಷಿಯಾಗಿತ್ತು.

ಐತಿಹಾಸಿಕ ಕುರುಹಾದ ಜೈಲು:

ಹಳೆ ತಾಲ್ಲೂಕು ಕಚೇರಿ ಕಟ್ಟಡ ಸಂಪೂರ್ಣವಾಗಿ ನೆಲಸಮವಾದರೂ ಅದರ ಹಿಂಭಾಗದಲ್ಲಿರುವ  ಸೆಲ್‌ಗಳಿರುವ ಜೈಲು ಕಟ್ಟಡ ಇನ್ನೂ ಇತಿಹಾಸದ ಕುರುಹಾಗಿ ನೆಲೆ ನಿಂತಿದೆ.

ಆದರೆ ನಿರ್ವಹಣೆ ಕೊರತೆಯಿಂದ ಶಿಥಿಲಾವಸ್ಥೆಗೆ ತಲುಪಿದೆ. ಕಟ್ಟಡದ ಸುತ್ತಲೂ ಮರಗಳು ಬೆಳೆದಿವೆ. ಮರಗಳ ಬೇರುಗಳು ಕೈದಿಗಳನ್ನಿರಿಸುತ್ತಿದ್ದ ಸೆಲ್‌ಗಳ ಗೋಡೆಗಳನ್ನು ಆವರಿಸಿದೆ. ಈ ಕಟ್ಟಡದ ಮೊದಲ ಅಂತಸ್ತಿನಲ್ಲಿ 12 ಮತ್ತು ಕೆಳ ಅಂತಸ್ತಿನಲ್ಲಿ 12 ಸೆಲ್‌ಗಳಿವೆ.

ಎರಡು ಅಂತಸ್ತಿನ ಈ ಜೈಲು ಕಟ್ಟಡದ ಮೊದಲ ಅಂತಸ್ತಿಗೆ ಹತ್ತಿ ಹೋಗುವ ಮೆಟ್ಟಿಲುಗಳ ಬಳಿಯೂ ಪೊದೆಗಳು ಬೆೆಳೆದಿವೆ. ತಾಲ್ಲೂಕು ಕಚೇರಿ ಕಟ್ಟಡದ ಅವಶೇಷಗಳು ಈ ಕಟ್ಟಡದ ಸುತ್ತಲೂ ಆವರಿಸಿಕೊಂಡಿದೆ. ಐತಿಹಾಸಿಕ ಮಹತ್ವವಿರುವ ಈ ಕಟ್ಟಡವು ತೀವ್ರ ನಿರ್ಲಕ್ಷ್ಯಕ್ಕೆ ಒಳಗಾಗಿದೆ.

ಬ್ರಿಟಿಷ್‌ ಶೈಲಿಯ ಈ ಜೈಲು ಕಟ್ಟಡವು ಗತಿಸಿ ಹೋದ ಕಾಲದ ನೂರಾರು ಘಟನೆಗಳಿಗೆ ಸಾಕ್ಷಿಯಾಗಿ ಇಂದಿಗೂ ತಲೆಯೆತ್ತಿ ನಿಂತಿದೆ. ಜಿಲ್ಲೆಯಲ್ಲಿ ಸ್ವಾತಂತ್ರ್ಯ ಹೋರಾಟದ ಸ್ಮತಿಯನ್ನು ಹೊಂದಿರುವ ಈ ಕಟ್ಟಡವನ್ನಾದರೂ ಸಂರಕ್ಷಿಸಬೇಕು ಮತ್ತು ಅದನ್ನು ಶಿಥಿಲಗೊಳ್ಳದಂತೆ ಕಾಪಾಡಬೇಕೆಂಬುದು ನಾಗರಿಕರ ಆಗ್ರಹವಾಗಿದೆ.