ಮುಂಡಗೋಡ: ಮೂರು ತಾಲ್ಲೂಕುಗಳೊಂದಿಗೆ ಜಲಾನಯನ ಪ್ರದೇಶ ಹಂಚಿಕೊಂಡಿರುವ ತಾಲ್ಲೂಕಿನ ಮಳಗಿ ಸಮೀ‍ಪದ ಧರ್ಮಾ ಜಲಾಶಯ ಭರ್ತಿಯಾಗಿದೆ. ಹೆಚ್ಚಿನ ಪ್ರಮಾಣದಲ್ಲಿ ನೀರು ಕೋಡಿ ಬಿದ್ದು ಹಾನಗಲ್ ತಾಲ್ಲೂಕಿನ ಗದ್ದೆಗಳಿಗೆ ಹರಿಯುತ್ತಿದೆ.
ರೈತರು ಕೋಡಿ ಬೀಳುತ್ತಿರುವ ದೃಶ್ಯವನ್ನು ಕಣ್ತುಂಬಿಕೊಂಡು, ಗಂಗೆಗೆ ಪೂಜೆ ಸಲ್ಲಿಸುತ್ತಿದ್ದಾರೆ. ತಾಲ್ಲೂಕಿನಲ್ಲಿಯೇ ಮೊದಲು ತುಂಬುವ ಜಲಾಶಯ ಎಂಬ ಹೆಗ್ಗಳಿಕೆ ಹೊಂದಿದೆ. ಈಚಿನ ವರ್ಷಗಳಲ್ಲಿ ಇದು ಪ್ರವಾಸಿಗರನ್ನು ಹೆಚ್ಚು ಆಕರ್ಷಿಸುತ್ತಿರುವ ಜಲಾಶಯ ಆಗಿದೆ.
ಶಿರಸಿ ತಾಲ್ಲೂಕಿನ ಇಸಳೂರು, ಎಕ್ಕಂಬಿ, ಬೀಳೂರು, ಬಂಕನಾಳ, ಮುಂಡಗೋಡ ತಾಲ್ಲೂಕಿನ ಕಾಳೇಬೈಲ್, ತೊಗರಳ್ಳಿ, ಬೆಡಸಗಾಂವ್ ಭಾಗದ ಮಳೆಯ ನೀರು ಈ ಜಲಾಶಯಕ್ಕೆ ಹರಿಯುತ್ತದೆ.
