ಮುಂಡಗೋಡ: ನೀರಿಗಾಗಿ ಪರಿತಪಿಸುವ ವನ್ಯಪ್ರಾಣಿಗಳು

ಮಂಗಳವಾರ, ಜೂನ್ 18, 2019
24 °C
ಬತ್ತಿರುವ ಕೆರೆಯ ಹೂಳೆತ್ತಲು ಆಗ್ರಹ

ಮುಂಡಗೋಡ: ನೀರಿಗಾಗಿ ಪರಿತಪಿಸುವ ವನ್ಯಪ್ರಾಣಿಗಳು

Published:
Updated:
Prajavani

ಮುಂಡಗೋಡ: ಅದು ಗಡಿಭಾಗದ ಕೆರೆ. ಅಲ್ಲಿ ನೂರಾರು ವನ್ಯಜೀವಿಗಳು ನೀರಿನ ದಾಹ ಇಂಗಿಸಿಕೊಳ್ಳುತ್ತವೆ. ರಾಜ್ಯ ಹೆದ್ದಾರಿಯಲ್ಲಿ ಸಾಗುವ ಪ್ರಯಾಣಿಕರು ಸಹ ಪ್ರಾಣಿಗಳನ್ನು ಕಂಡು ಸಂತಸ ಪಡುತ್ತಾರೆ. ಆದರೆ ಇತ್ತೀಚಿನ ವರ್ಷಗಳಲ್ಲಿ ಆ ಕೆರೆ ಬೇಸಿಗೆ ಆರಂಭಕ್ಕೂ ಮುನ್ನವೇ ಬತ್ತಿ, ನೀರಿಗಾಗಿ ಬಾಯ್ದೆರೆದು ಬಿರುಕು ಬಿಟ್ಟಿರುತ್ತದೆ. ಪ್ರಾಣಿ, ಪಕ್ಷಿಗಳು ಮಾತ್ರ ನೀರಿಗಾಗಿ ಪರಿತಪಿಸುತ್ತವೆ.

ಮುಂಡಗೋಡ–ಶಿಗ್ಗಾಂವಿ ಗಡಿಭಾಗದ ಹುಬ್ಬಳ್ಳಿ ರಸ್ತೆಯಲ್ಲಿರುವ ವಡಗಟ್ಟಾ ಕೆರೆ, ವನ್ಯಜೀವಿಗಳ ಬಾಯಾರಿಕೆ ಇಂಗಿಸುವ ಜಲಮೂಲವಾಗಿದೆ. ಅರಣ್ಯ ವ್ಯಾಪ್ತಿಯಲ್ಲಿ ಬರುವ ಈ ಕೆರೆಯ ಹೂಳೆತ್ತುವ ಕೆಲಸ ಆಗದಿರುವುದರಿಂದ, ಪ್ರಾಣಿ, ಪಕ್ಷಿಗಳು ಹನಿನೀರಿಗೂ ಬತ್ತಿರುವ ನೆಲ ನೆಕ್ಕುತ್ತವೆ.

ಅರಣ್ಯ ಕಾಯ್ದೆ ಅಡ್ಡಿ: ಎರಡು ತಾಲ್ಲೂಕುಗಳ ಗಡಿಭಾಗದಲ್ಲಿ ಇರುವ ಕೆರೆ ಕಾಮಗಾರಿ ಮಾಡಿಸಲು ಅರಣ್ಯ ಕಾಯ್ದೆ ಅಡ್ಡಿಯಾಗಿದೆ. ಕೆರೆಯ ಒಂದು ಭಾಗ ಮುಂಡಗೋಡ ತಾಲ್ಲೂಕಿಗೆ ಸೇರಿದರೆ, ಉಳಿದ ಭಾಗ ಶಿಗ್ಗಾಂವಿ ತಾಲ್ಲೂಕಿನ ದುಂಢಶಿ ಉಪವಲಯದಲ್ಲಿದೆ. ಎರಡೂ ತಾಲ್ಲೂಕುಗಳ ಅರಣ್ಯ ಅಧಿಕಾರಿಗಳ ಸಮನ್ವಯದ ಕೊರತೆಯಿಂದ ಕೆರೆ ಬಡವಾಗುತ್ತಿದೆ.

‘ದಟ್ಟ ಕಾನನದ ಮಧ್ಯೆ ಇರುವ ಕೆರೆಯ ಹೂಳೆತ್ತುವ ಕೆಲಸ ಮಾಡಿದರೆ, ಸಾಕಷ್ಟು ಪ್ರಮಾಣದಲ್ಲಿ ನೀರು ಸಂಗ್ರಹಗೊಳ್ಳುತ್ತದೆ. ಇದರಿಂದ ಬೇಸಿಗೆಯಲ್ಲಿಯೂ ವನ್ಯಜೀವಿಗಳಿಗೆ ಅನುಕೂಲವಾಗುತ್ತದೆ. ಅರಣ್ಯ ಪ್ರದೇಶದಿಂದ ಹೆಚ್ಚಿನ ಪ್ರಮಾಣದ ನೀರು ಮಳೆಗಾಲದಲ್ಲಿ ಹರಿದುಬರುತ್ತದೆ. ಕೆರೆಯು ಆಳವಿಲ್ಲದಿರುವುದರಿಂದ, ಕೆರೆಯ ಮೇಲ್ಭಾಗದಲ್ಲಿ ಮಾತ್ರ ನೀರು ಸಂಗ್ರಹಗೊಂಡು ವರ್ಷದ ಆರಂಭದ ತಿಂಗಳಲ್ಲಿಯೇ ಬರಿದಾಗುತ್ತದೆ’ ಎಂದು ವಡಗಟ್ಟಾದ ಕೆ.ರಾಜು ಅಭಿಪ್ರಾಯಪಡುತ್ತಾರೆ.

‘ಕೆಲವೊಮ್ಮೆ ಸಾರ್ವಜನಿಕರೇ ಬತ್ತಿರುವ ಕೆರೆಗೆ ಟ್ಯಾಂಕರ್‌ ಮೂಲಕ ನೀರು ಹಾಕಿಸಿ ಪ್ರಾಣಿಗಳಿಗೆ ಅನುಕೂಲ ಮಾಡಿಕೊಡುತ್ತಿದ್ದಾರೆ. ಅವಕಾಶ ನೀಡಿದರೆ ರೈತರೇ ಹೂಳೆತ್ತಿ ಮಣ್ಣು ತೆಗೆದುಕೊಂಡು ಹೋಗುತ್ತಾರೆ’ ಎಂದು ರೈತ ಸೋಮಣ್ಣ ಹೇಳಿದರು.

ಹೂಳೆತ್ತಲು ಸೂಚನೆ: ‘ಸರ್ವೇ ನಂಬರ್ 39ರಲ್ಲಿ ಇರುವ ಕೆರೆ ಹೂಳೆತ್ತುವ ಬಗ್ಗೆ ವಲಯ ಅರಣ್ಯಾಧಿಕಾರಿಗೆ ಸೂಚನೆ ನೀಡಲಾಗುವುದು. ಕಾಡುಪ್ರಾಣಿ, ಪಕ್ಷಿಗಳಿಗೆ ನೀರು ಒದಗಿಸುವುದು ಪುಣ್ಯದ ಕೆಲಸ. ಸರ್ಕಾರದ ವಿವಿಧ ಅನುದಾನದಡಿ ಕಾಮಗಾರಿ ಮಾಡಬಹುದು. ಸ್ಟೇಟಸ್ ಆಫ್ ಲ್ಯಾಂಡ್ ಪರಿಶೀಲಿಸಿ ಅಗತ್ಯ ಕ್ರಮ ಕೈಗೊಳ್ಳಲಾಗುವುದು’ ಎಂದು ಶಿಗ್ಗಾಂವಿ ಎಸಿಎಫ್ ಬಿ.ಪಿ.ಡುಗ್ಗಿ ‘ಪ್ರಜಾವಾಣಿ’ಗೆ ತಿಳಿಸಿದರು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !