ಕದಂಬೋತ್ಸವ |ನೆನೆವುದೆನ್ನ ಮನಂ ಬನವಾಸಿ ದೇಶಂ: ಕವಿವಾಣಿ ನೆನಪಿಸಿದ ಕಲಾವಿದರು

ಸಮಾರೋಪದಲ್ಲಿ ಮಾತನಾಡಿದ ಹಿರಿಯ ಸಾಹಿತಿ ಝಮೀರುಲ್ಲಾ ಷರೀಫ, ಕನ್ನಡ ನಾಡಿಗೆ ಕದಂಬರು ನೀಡಿದ ಕೊಡುಗೆಗಳ ಸ್ಮರಣೆ ಮಾಡಬೇಕು.  ಇತಿಹಾಸದ ಸಾರ್ವಕಾಲಿಕ ಸಂದೇಶಗಳ ಪಾಲನೆ ಆಗಬೇಕು. ಅವಮಾನ ಮೆಟ್ಟಿನಿಂತು ಭವಿಷ್ಯ ಬೆಳಗಿದ ಕದಂಬ ವಂಶದ ಸಂಸ್ಥಾಪಕ ಮಯೂರ ವರ್ಮ ನೀಡಿದ ಆದರ್ಶ ಎಲ್ಲರಿಗೂ ಪಾಠವಾಗಬೇಕು. ಸಮಾಜದಲ್ಲಿನ ಮೌಲ್ಯಗಳ ಪುನರುತ್ಥಾನ ಆಗಬೇಕು. ಪ್ರತಿಯೊಬ್ಬರೂ ಮನುಷ್ಯತ್ವದ ಸಂದೇಶ ಸಾರುವವರಾಗಬೇಕು ಎಂದು ಹೇಳಿದರು. 

ಮತಧರ್ಮಗಳು ಮನುಕುಲಕ್ಕೆ ಧಕ್ಕೆ ಮಾಡುತ್ತಿರುವ ಸಂದರ್ಭದಲ್ಲಿ ಕನ್ನಡ ಸಾಹಿತ್ಯ ಮನಸ್ಸುಗಳ ಜೋಡಿಸುವ ಕಾರ್ಯ ಮಾಡಿದೆ. ಪಂಪ ಸಾಹಿತ್ಯವು ಮನುಷ್ಯ ತಾನೊಂದೇ ವಲಂ ಸಾರುವ ಮೂಲಕ ಮಾನವ ಕುಲ ಒಂದೇ ಎಂಬುದನ್ನು ಸಾರಿದೆ. ಅಂಥ ಸಾಹಿತ್ಯದ ಮೂಲಕ ಕನ್ನಡ ಸಾಹಿತ್ಯ ಇಂದಿಗೂ ಶ್ರೀಮಂತವಾಗಿದೆ. ಅದರಲ್ಲಿನ ಕೆಲ ಅಂಶಗಳನ್ನಾದರೂ ಜೀವನದಲ್ಲಿ ಅಳವಡಿಸಿಕೊಂಡರೆ ಕನ್ನಡ ನಾಡು ಇನ್ನಷ್ಟು ಸುಂದರವಾಗುತ್ತದೆ ಎಂದ ಅವರು, ಬನವಾಸಿಯು ದಕ್ಷಿಣದ ಕಾಶಿ ಹಾಗೂ ಸಸ್ಯ ಕಾಶಿಯಾಗಿದೆ ಎಂದು ಶ್ಲಾಘಿಸಿದರು. 

ವೇದಿಕೆಯಲ್ಲಿ ಜಿಲ್ಲಾಧಿಕಾರಿ ಗಂಗೂಬಾಯಿ ಮಾನಕರ್, ಹೆಚ್ಚುವರಿ ಜಿಲ್ಲಾಧಿಕಾರಿ ಪ್ರಕಾಶ ರಜಪೂತ, ನಗರಾಭಿವೃದ್ಧಿ ಕೋಶದ ಜಿಲ್ಲಾ ಯೋಜನಾಧಿಕಾರಿ ಸ್ಟೆಲ್ಲಾ ವರ್ಗೀಸ್, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಅಧಿಕಾರಿ ರಾಮಚಂದ್ರ ಮಡಿವಾಳ, ಶಿರಸಿ ಉಪವಿಭಾಗಾಧಿಕಾರಿ ಅಪರ್ಣಾ ರಮೇಶ, ಬನವಾಸಿ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಬಿಬಿ ಆಯೀಷಾ ಇದ್ದರು. 

ಗಮನ ಸೆಳೆದ ಕುಸ್ತಿ:

ಮೊದಲ ಬಾರಿಗೆ ಕದಂಬೋತ್ಸವ ಮೈದಾನದಲ್ಲಿ ರಾಜ್ಯ ಮಟ್ಟದ ಕುಸ್ತಿ ಸ್ಪರ್ಧೆ ಜರುಗಿತು. 30ರಿಂದ 80 ಕೆಜಿ ವಿಭಾಗಗಳಲ್ಲಿ 150 ಕುಸ್ತಿಪಟುಗಳು ಪಾಲ್ಗೊಂಡು ಶಕ್ತಿ ಪ್ರದರ್ಶಿಸಿದರು. ಇದೇ ವೇಳೆ ವಿಶೇಷವಾಗಿ ಕದಂಬ ಕೇಸರಿ ಕುಸ್ತಿ ಸ್ಪರ್ಧೆಯೂ ಜರಿಗಿತು. ಸಾವಿರಾರು ಕುಸ್ತಿ ಪ್ರೀಯರು ಅಖಾಡದ ಸುತ್ತ ಜಮಾಯಿಸಿ ಕುಸ್ತಿ ಸ್ಪರ್ಧೆಯನ್ನು ಆನಂದಿಸಿದರು.