ಶನಿವಾರ, 22 ಜೂನ್ 2024
×
ADVERTISEMENT
ಈ ಕ್ಷಣ :
ADVERTISEMENT

ಎರಡು ವರ್ಷಗಳಿಂದ ಗೌರವಧನ ನಿರೀಕ್ಷಿಸುತ್ತಿರುವ ಹಂಪಿಯ ಪ್ರವಾಸಿ ಮಾರ್ಗದರ್ಶಿಗಳು

Published 17 ಮೇ 2024, 6:09 IST
Last Updated 17 ಮೇ 2024, 6:09 IST
ಅಕ್ಷರ ಗಾತ್ರ

ಹೊಸಪೇಟೆ (ವಿಜಯನಗರ): ವಿಶ್ವ ಪಾರಂಪರಿಕ ತಾಣ ಹಂಪಿಯಲ್ಲಿ 28 ಮಂದಿ ಅಧಿಕೃತ ಪ್ರವಾಸಿ ಮಾರ್ಗದರ್ಶಿಗಳು (ಗೈಡ್‌) ಎರಡು ವರ್ಷಗಳಿಂದ ಗೌರವಧನದ ನಿರೀಕ್ಷೆಯಲ್ಲಿದ್ದಾರೆ. ಪ್ರವಾಸಿ ಮಾರ್ಗದರ್ಶಿ ಆಗಲು ಮೂರು ತಿಂಗಳ ಕೋರ್ಸ್ ಪೂರೈಸಿ, ಪ್ರಮಾಣಪತ್ರ ಪಡೆದ ಈ 28 ಜನರಲ್ಲಿ 12 ಮಹಿಳೆಯರೂ ಇದ್ದಾರೆ.

ಹಂಪಿಯಲ್ಲಿ ಸದ್ಯ ಇರುವ 151 ಮಂದಿ ಅಧಿಕೃತ ಪ್ರವಾಸಿ ಮಾರ್ಗದರ್ಶಿಗಳು ಸರ್ಕಾರದಿಂದ ತಿಂಗಳಿಗೆ ₹ 5 ಸಾವಿರ ಗೌರವಧನ ಪಡೆಯುತ್ತಿದ್ದಾರೆ. ಅವರಲ್ಲಿ ಇಬ್ಬರು ಮಹಿಳೆಯರಿದ್ದಾರೆ.

ಎಲ್ಲ ಅರ್ಹತೆ ಗಳಿಸಿ, ಪ್ರವಾಸಿ ಮಾರ್ಗದರ್ಶಿಗಳಾಗಿ ಕೆಲಸವನ್ನೂ ಮಾಡುತ್ತಿರುವ ಇತರ 28 ಮಂದಿಗೂ ಗೌರವಧನ ಕೊಡಬೇಕು ಎಂದು ಹಲವು ಸಲ ಮನವಿ ಸಲ್ಲಿಸಿದರೂ ಹಣಕಾಸು ಇಲಾಖೆಯಿಂದ ಸ್ಪಂದನೆ ಸಿಕ್ಕಿಲ್ಲ.

‘ಹಂಪಿಗೆ ಪ್ರವಾಸಿಗಳು ದೊಡ್ಡ ಸಂಖ್ಯೆಯಲ್ಲಿ ಭೇಟಿ ನೀಡುವುದು ಆರು ತಿಂಗಳು ಮಾತ್ರ. ಇನ್ನುಳಿದ ಆರು ತಿಂಗಳಲ್ಲಿ ಪ್ರವಾಸಿ ಮಾರ್ಗದರ್ಶಿಗಳ ಬದುಕು ಕಷ್ಟದಿಂದ ಕೂಡಿರುತ್ತದೆ. ಸರ್ಕಾರ ನೀಡುವ ಗೌರವಧನದಿಂದ ಅವರ ಬದುಕಿನಲ್ಲಿ ಕೊಂಚ ನೆಮ್ಮದಿ ಮೂಡುತ್ತದೆ. ಗೌರವಧನವನ್ನು ₹5 ಸಾವಿರದಿಂದ ₹7.5 ಸಾವಿರಕ್ಕೆ ಹೆಚ್ಚಿಸಬೇಕೆಂಬ ಬೇಡಿಕೆಯನ್ನೂ ಮುಂದಿಟ್ಟಿದ್ದೇವೆ. ಸರ್ಕಾರ ಮೊದಲಿಗೆ ಅರ್ಹ 28 ಮಂದಿಗೆ ₹ 5 ಸಾವಿರ ಪ್ರೋತ್ಸಾಹಧನ ಪಾವತಿಸಬೇಕು’ ಎಂದು ಕಮಲಾಪುರದ ಮಾನವೀಯ ಸಹಾಯ ಸಂಸ್ಥೆಯ ಅಧ್ಯಕ್ಷ ಶ್ರೀನಿವಾಸ ಕೆಂಗೇರಿ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಎರಡು ವರ್ಷಗಳ ಗೌರವಧನವನ್ನು ಒಮ್ಮೆಲೇ  ಬಿಡುಗಡೆ ಮಾಡಬೇಕು. ಇಲ್ಲದಿದ್ದರೆ, ಹಂಪಿ ವಿರೂಪಾಕ್ಷ ದೇವಾಲಯದಿಂದ ಬೆಂಗಳೂರು ವಿಧಾನಸೌಧದವರೆಗೆ ಪಾದಯಾತ್ರೆ ಮಾಡುತ್ತೇವೆ. ಬೇಡಿಕೆ ಈಡೇರಿಸುವಂತೆ ಸರ್ಕಾರಕ್ಕೆ ಒತ್ತಡ ಹೇರುತ್ತೇವೆ’ ಎಂದು ಅವರು ತಿಳಿಸಿದರು.

ಬಾಡಿಗೆ ಮನೆಯಲ್ಲಿ ನಾವೆಲ್ಲರೂ ವಾಸವಿದ್ದೇವೆ. ನನ್ನ ಪತಿಗೂ ಕೆಲಸ ಇಲ್ಲ ಕುಟುಂಬ ನಿರ್ವಹಣೆ ಕಷ್ಟವಾಗಿದೆ. ಸರ್ಕಾರ ಗೌರವಧನ ಶೀಘ್ರ ನೀಡಲಿ.
ಶ್ರೀದೇವಿ. ಹಂಪಿ ಪ್ರವಾಸಿ ಮಾರ್ಗದರ್ಶಿ
ಮಾರ್ಗದರ್ಶಿ ಕೆಲಸವಿಲ್ಲದ ಕಾರಣ ಮಕ್ಕಳ ಶಾಲಾ ಶಿಕ್ಷಣ ಶುಲ್ಕವನ್ನು ಕಟ್ಟಲು ಸಹ ತೊಂದರೆಯಾಗುತ್ತಿದೆ. ಸರ್ಕಾರ ನಮ್ಮ ಕಷ್ಟಗಳಿಗೆ ಸ್ಪಂದಿಸಬೇಕು
- ಶ್ವೇತಾ. ಹಂಪಿ ಪ್ರವಾಸಿ ಮಾರ್ಗದರ್ಶಿ
ಸರ್ಕಾರ ಗ್ಯಾರಂಟಿಯ ಹೆಸರಲ್ಲಿ ನಮ್ಮಂತವರನ್ನು ಮರೆತೇಬಿಟ್ಟಿದೆ. 390 ಪುರುಷರಿಗೆ ಗೌರವಧನ ನೀಡುತ್ತಿದ್ದೀರಿ ನಮ್ಮನ್ನೇಕೆ ನಿರ್ಲಕ್ಷಿಸುತ್ತಿದ್ದೀರಿ?
ರೇಖಾ. ಹಂಪಿ ಪ್ರವಾಸಿ ಮಾರ್ಗದರ್ಶಿ
ಹಂಪಿಯಲ್ಲಿ ನುರಿತ ಅನುಭವಿ ಪ್ರವಾಸಿ ಮಾರ್ಗದರ್ಶಿಗಳ ಅಗತ್ಯ ಇದೆ. ಅವರಿಗೆ ಗೌರವಧನ ಪಾವತಿಸುವಂತೆ ಹಣಕಾಸು ಇಲಾಖೆಗೆ ಶಿಫಾರಸು ಮಾಡಲಾಗಿದೆ.
-ಪ್ರಭುಲಿಂಗ ತಳಕೇರಿ ಉಪನಿರ್ದೇಶಕ ಪ್ರವಾಸೋದ್ಯಮ ಇಲಾಖೆ

ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT