ತಿಕೋಟಾ|ಬಾರದ ಮಳೆ: ಒಣಗುತ್ತಿರುವ ಬೆಳೆ

ತಿಕೋಟಾ ಹಾಗೂ ಬಬಲೇಶ್ವರ ತಾಲ್ಲೂಕುಗಳಲ್ಲಿ ಲಕ್ಷಾಂತರ ರೂಪಾಯಿ ಹಣ ಖರ್ಚು ಮಾಡಿ ಬೆಳೆದ ಕಬ್ಬು ಒಣಗಿ ನಿಂತಿವೆ. ಬೇಸಿಗೆ ಚಾಟ್ನಿ (ಕಟಾವು) ಮಾಡಿದ ನಂತರ ಬೆಳೆಯುತ್ತಿರುವ ದ್ರಾಕ್ಷಿ ಪಡದ ಕಡ್ಡಿಗಳು ನೀರಿನ ಅಭಾವದಿಂದ ಗಟ್ಟಿಯಾಗಿ ಬೆಳೆಯುತ್ತಿಲ್ಲ. ರೇಷ್ಮೆ ಹಾಗೂ ದಾಳಿಂಬೆ ಬೆಳೆ ಸಹ ಒಣಗುತ್ತಿವೆ.

ಬೆಳೆ ಉಳಿಸಲು ಟ್ಯಾಂಕರ್ ಮೊರೆ:

ತಪ್ಪಲು ಬಾಡಿ ಒಣಗಿ ಹೋಗುತ್ತಿರುವ ದ್ರಾಕ್ಷಿ ಪಡಗಳನ್ನು ಉಳಿಸಲು ದ್ರಾಕ್ಷಿ ಬೆಳೆಗಾರರು ಬಾಡಿಗೆ ನೀರಿನ ಟ್ಯಾಂಕರ್‌ಗಳಿಂದ ದೂರದ ಪ್ರದೇಶಗಳಿಂದ ನೀರನ್ನು ತಂದು ಕೃಷಿ ಹೊಂಡದಲ್ಲಿ ಹಾಕಿ ಬೆಳೆಗಳಿಗೆ ಹನಿ ನೀರಾವರಿ ಮೂಲಕ ನೀರು ಪೂರೈಸಿ ಬೆಳೆ ಉಳಿಸಿಕೊಳ್ಳುವ ಹರಸಾಹಸ ಮಾಡುತ್ತಿದ್ದಾರೆ.

ದನಕರಗಿಗೆ ಮೇವಿನ ಅಭಾವ:

ಬೆಳೆಯಷ್ಟೇ ಅಲ್ಲದೇ, ನೀರಿನ ಅಭಾವದಿಂದ ದನಕರುಗಳಿಗೆ ಮೇವಿನ ಅಭಾವ ಎದುರಾಗಿದೆ. ನೀರಿಲ್ಲದೇ ಕೃಷ್ಣಾ ನದಿಯ ದಡದಲ್ಲಿರುವ ಕಬ್ಬು ಬೆಳೆ ಸಹ ಒಣಗುತ್ತಿದೆ. ತಿಕೋಟಾ ಭಾಗದ ರೈತರು ನದಿ ದಡದಲ್ಲಿ ಒಣಗಿ ನಿಂತಿರುವ ಕಬ್ಬನ್ನು ದನಕರಗಳ ಮೇವಿಗಾಗಿ ಟನ್‌ಗೆ ₹ 3000 ದಿಂದ ₹ 4 000 ಹಾಗೂ ಟ್ರ್ಯಾಕ್ಟರ್ ಬಾಡಿಗೆ ₹ 5000 ಖರ್ಚು ಮಾಡಿ ಖರೀದಿಸುತ್ತಿದ್ದಾರೆ. ಬರಗಾಲ ಪೀಡಿತ ತಾಲ್ಲೂಕು ಎಂದು ಘೋಷಣೆ ಮಾಡಿ ಗೋ ಶಾಲೆ ತೆರೆಯುವಂತೆ ರೈತರು ಸರ್ಕಾರವನ್ನು ಆಗ್ರಹಿಸುತ್ತಿದ್ದಾರೆ.