ಕಕ್ಕೇರಾ ಪುರಸಭೆ: ಗರಿಗೆದರಿದ ರಾಜಕೀಯ ಗೆಲುವಿನ ಲೆಕ್ಕಾಚಾರ

ಪುರಸಭೆ ಅಧ್ಯಕ್ಷ ಸ್ಥಾನ ಹಿಂದುಳಿದ ವರ್ಗ (ಎ) ಹಾಗೂ ಉಪಾಧ್ಯಕ್ಷ ಪರಿಶಿಷ್ಟ ಪಂಗಡಕ್ಕೆ ಮೀಸಲಿದ್ದು, ನೀವು 15 ತಿಂಗಳು ಕಾರ್ಯನಿರ್ವಹಿಸಿ, ಉಳಿದವರಿಗೆ 15 ತಿಂಗಳು ಅಧ್ಯಕ್ಷಸ್ಥಾನ ಮಾಡಬೇಕೆಂಬ ಮಾತುಗಳು ಕೇಳಿಬರುತ್ತಿದ್ದು, ಪುರಸಭೆ ಸದಸ್ಯರ ತೀರ್ಮಾನ ಅಂತಿಮವಾಗಲಿದೆ.

ಒಟ್ಟು 23 ಸದಸ್ಯರಿರುವ ಪುರಸಭೆಗೆ ಕಾಂಗ್ರೆಸ್ 17, ಬಿಜೆಪಿ 6 ಜನ ಸದಸ್ಯರಿದ್ದು, ಕಾಂಗ್ರೆಸ್‌ಗೆ ಬಹುಮತ ಇದೆ. 4ನೇ ವಾರ್ಡ್‌ ಸದಸ್ಯ ಪರಮಣ್ಣ ಕಮತಗಿ ಹಾಗೂ 23ನೇ ವಾರ್ಡ್‌ ಸದಸ್ಯ ಅಯ್ಯಾಳಪ್ಪ ಪೂಜಾರಿ ನಡುವೆ ಅಧ್ಯಕ್ಷ ಸ್ಥಾನಕ್ಕೆ ತೀವ್ರ ಪೈಪೋಟಿ ಏರ್ಪಟ್ಟಿದೆ.

19ನೇ ವಾರ್ಡ್‌ನಿಂದ ಪರಮವ್ವ ನಾಗಪ್ಪ ಮಲಮುತ್ತೇರ ಅವರು ಪ್ರಥಮ ಬಾರಿಗೆ ಪುರಸಭೆ ಸದಸ್ಯರಾಗಿದ್ದು, ಮೀಸಲಾತಿ ನಮಗೂ ಬಂದಿದೆ. ಸದಸ್ಯರು ಬೆಂಬಲಿಸುವರು ಎಂಬ ನಂಬಿಕೆಯಿದೆ. ನಾನು ಅಧ್ಯಕ್ಷ ಸ್ಥಾನದ ಆಕಾಂಕ್ಷಿ ಎನ್ನುತ್ತಾರೆ.

ಪುರಸಭೆ ಸದಸ್ಯರಾದ ದೇವಿಂದ್ರಪ್ಪ ದೇಸಾಯಿ, ಜಟ್ಟೆಪ್ಪ ದಳಾರ, ಪರಶುರಾಮ ಗೋವಿಂದರ್, ಹೊಸೂರು ಅಮರೇಶ ದೊರೆ ಉಪಾಧ್ಯಕ್ಷ ಸ್ಥಾನದ ಆಕಾಂಕ್ಷಿಯಾಗಿದ್ದಾರೆ. ಅಧ್ಯಕ್ಷ ಸ್ಥಾನದ ಚುನಾವಣೆ ಕುತೂಹಲದಿಂದ ಸಾರ್ವಜನಿಕರು ನೋಡುತ್ತಿದ್ದಾರೆ. ಈಗಾಗಲೇ ಆಕಾಂಕ್ಷಿಗಳು ದೇವಸ್ಥಾನ ಹಾಗೂ ಶಾಸಕರ ಭೇಟಿ ನೀಡಿ ಚರ್ಚಿಸುತ್ತಿದ್ದಾರೆ.  ಮುಖಂಡರ ಮನವೊಲಿಸುವ ಕಾರ್ಯವೂ ನಡೆದಿದೆ. ಚುನಾವಣೆ ದಿನಾಂಕ ನಂತರ ಅಂತಿಮ ತೀರ್ಮಾನ ಹೊರಬೀಳಲಿದೆ.