17 ಗ್ರಾ.ಪಂ ಚುನಾವಣೆಗೆ ಸಕಲ ಸಿದ್ಧತೆ

ತಾಲ್ಲೂಕಿನ ಎಲ್ಲಾ 17 ಗ್ರಾಮ ಪಂಚಾಯತಿಗಳ 233 ಸ್ಥಾನಗಳಿಗೆ ಶಾಂತಿಯುತ ಹಾಗೂ ಉತ್ತಮ ಮತದಾನ ಜರುಗಿಸಲು ಸಿದ್ಧತೆಗಳು ನಡೆದಿವೆ. ಪಟ್ಟಣದ ಸರ್ಕಾರಿ ಪ್ರಥಮ ದರ್ಜೆ ಪದವಿ ಮಹಾವಿದ್ಯಾಲಯವನ್ನು ಸ್ಟ್ರಾಂಗ್ ರೂಮ್ ಆಗಿ ಬಳಕೆ ಮಾಡಿಕೊಳ್ಳುವುದು ಹಾಗೂ ಮತ ಎಣಿಕೆ ಕೇಂದ್ರವಾಗಿ ಬಳಕೆ ಮಾಡಿಕೊಳ್ಳಲು ಗುರುತಿಸಲಾಗಿದೆ.

ಎಲ್ಲಾ ಮತಗಟ್ಟೆಗಳಲ್ಲಿ ಸುರಕ್ಷಿತ ಅಂತರ ಕಾಯ್ದುಕೊಳ್ಳಲು ಗುರುತುಗಳನ್ನು ಹಾಕುವುದು, ವಿದ್ಯುತ್, ಬೆಳಕು, ರ‍್ಯಾಂಪ್, ಗಾಲಿಕುರ್ಚಿ ವ್ಯವಸ್ಥೆ ಸೇರಿದಂತೆ ಎಲ್ಲಾ ರೀತಿಯಲ್ಲಿಯೂ ಮತಗಟ್ಟೆಗಳನ್ನು ಸಿದ್ಧಗೊಳಿಸುವ ನಿಟ್ಟಿನಲ್ಲಿ ತಾಲ್ಲೂಕು ಆಡಳಿತ ಮುತುವರ್ಜಿ ವಹಿಸುತ್ತಿದೆ.

ತಾಲ್ಲೂಕಿನ ಒಟ್ಟು 18 ಗ್ರಾಮ ಪಂಚಾಯತಿಗಳಲ್ಲಿ ಅನಪುರ ಪಂಚಾಯತಿಯ ಅವಧಿ ಮುಗಿಯದ ಕಾರಣ 17 ಪಂಚಾಯತಿಗಳ 302 ಸ್ಥಾನಗಳಿಗೆ ಚುನಾವಣೆ ನಡೆಸಲಾಗುತ್ತಿದ್ದು, 68 ಜನ ಅವಿರೋಧ ಆಯ್ಕೆ, ಗಾಜರಕೋಟದ ಸಾಮಾನ್ಯ ಸ್ಥಾನದಲ್ಲಿ ಯಾರೂ ನಾಮಪತ್ರ ಸಲ್ಲಿಸದಿರುವುದರಿಂದಾಗಿ 233 ಸ್ಥಾನಗಳಿಗೆ ಚುನಾವಣೆ ನಡೆಸಲು ಸಿದ್ಧತೆ ನಡೆದಿದೆ.

ಯಂಪಾಡ 2, ವಂಕಸಂಬರ 2, ನಜರಾಪುರ 1, ಕಣೇಕಲ್ 1, ಬದ್ದೇಪಲ್ಲಿ 4, ಜೈಗ್ರಾಮ 1, ಕೊಂಕಲ್ 4, ಯಲ್ಹೇರಿ 5, ಚಿನ್ನಾಕಾರ 3, ಚಪೆಟ್ಲಾ 2, ಗಾಜರಕೋಟ 1 ಸೇರಿ ತಾಲ್ಲೂಕಿನಲ್ಲಿ ಒಟ್ಟು 26 ನಾಮಪತ್ರಗಳು ತಿರಸ್ಕೃತಗೊಂಡಿವೆ. 68 ಜನ ಅಭ್ಯರ್ಥಿಗಳ ಅವಿರೋಧ ಆಯ್ಕೆಯ ನಂತರ ಉಳಿದ 581 ನಾಮಪತ್ರಗಳು ಕ್ರಮಬದ್ಧವಾಗಿದ್ದು. ಚುನಾವಣಾ ಕಣದಲ್ಲಿದ್ದಾರೆ.