ಕಾಲಿವುಡ್‌ನ ಖ್ಯಾತ ನಟ ವಿಶಾಲ್, ರೆಜಿನಾ ಕಸ್ಸಂದ್ರ ಹಾಗೂ ಕನ್ನಡತಿ ಶೃದ್ಧಾ ಶ್ರೀನಾಥ್ ನಟನೆಯ, ಎಂಎಸ್‌ ಆನಂದನ್‌ ನಿರ್ದೇಶನದ 'ಚಕ್ರ’ ಸಿನಿಮಾ ಫೆಬ್ರುವರಿ 19ಕ್ಕೆ ಪ್ರಪಂಚದಾದ್ಯಂತ ಬಿಡುಗಡೆಯಾಗಲಿದೆ.
ಈ ವಿಷಯವನ್ನು ತಮ್ಮ ಟ್ವಿಟರ್ ಖಾತೆಯಲ್ಲಿ ತಿಳಿಸಿದ್ದಾರೆ ವಿಶಾಲ್. ‘ನಿಮ್ಮ ಸಿನಿಮಾ ಬಿಡುಗಡೆಯ ದಿನಾಂಕ ಪಕ್ಕಾ ಆಗಿದೆ. ಆ್ಯಕ್ಷನ್ ಥ್ರಿಲ್ಲರ್ ಸಿನಿಮಾವಾಗಿರುವ ಚಕ್ರವನ್ನು ಫೆಬ್ರುವರಿ 19ಕ್ಕೆ ಬಿಡುಗಡೆ ಮಾಡಲಾಗುವುದು. ಇದು ದಕ್ಷಿಣದ ನಾಲ್ಕು ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ. ಸಿನಿಮಾದ ಬಿಡುಗಡೆಗಾಗಿ ಎದುರು ನೋಡುತ್ತಿದ್ದೇನೆ’ ಎಂದು ಬರೆದುಕೊಂಡಿದ್ದಾರೆ.
‘ಚಕ್ರ ಫೆ.19ಕ್ಕೆ ಥಿಯೇಟರ್‌ನಲ್ಲಿ ನಾಲ್ಕು ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದೆ. ಒಂದು ಭವ್ಯ ವರ್ಷಕ್ಕೆ ಭವ್ಯ ಆರಂಭ’ ಎಂದು ಟ್ವಿಟರ್‌ನಲ್ಲಿ ಬರೆದುಕೊಂಡಿದ್ದಾರೆ ರೆಜಿನಾ.
ಸೈಬರ್ ಅಪರಾಧ ಹಿನ್ನೆಲೆಯುಳ್ಳ ಚಕ್ರ ಸಿನಿಮಾವನ್ನು ವಿಶಾಲ್ ಫಿಲ್ಮ್ ಪ್ರೊಡಕ್ಷನ್ ಅಡಿಯಲ್ಲಿ ವಿಶಾಲ್ ನಿರ್ಮಾಣ ಮಾಡಿದ್ದಾರೆ.
