ಕ್ರಿಕೆಟ್ ಸ್ಟಾರ್ ವಿರಾಟ್ ಕೊಹ್ಲಿ ಅವರೊಂದಿಗಿನ ವಿವಾಹ ಸಂಬಂಧಿ ವಿಷಯಗಳ ಮೇಲೆನಟಿ ಅನುಷ್ಕಾ ಶರ್ಮಾ ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ತುಂಬ ಮನಬಿಚ್ಚಿ ಮಾತನಾಡಿದ್ದಾರೆ. ‘ಪ್ರೇಕ್ಷಕರು ನಮ್ಮನ್ನು ತೆರೆಯ ಮೇಲೆ ನೋಡಲು ಇಷ್ಟಪಡುತ್ತಾರೆ. ಸಿನಿಮಾ ನೋಡುವ ಸಂದರ್ಭದಲ್ಲಿ ನಮ್ಮ ಸ್ವಂತ ಜೀವನದ ಬಗ್ಗೆ ಅವರು ತಲೆಕೆಡಿಸಿಕೊಳ್ಳುವುದಿಲ್ಲ. ನಟ ಅಥವಾ ನಟಿಗೆ ಮದುವೆಯಾಗಿದೆಯಾ, ತಾಯಿ ಅಥವಾ ತಂದೆಯಾಗಿದ್ದಾರಾ? ಎನ್ನುವುದು ಕೂಡ ಮುಖ್ಯ ಅಲ್ಲ. ಇದನ್ನೆಲ್ಲಾ ಮೊದಲು ನಾವು ನಮ್ಮ ತಲೆಯಿಂದ ತೆಗೆಯಬೇಕು. ನಾನು 29 ವರ್ಷಕ್ಕೆ ಮದುವೆಯಾದೆ. ನಟಿಯಾಗಿ ಯೋಚಿಸಿದರೆ ಇದು ಸಣ್ಣ ವಯಸ್ಸು. ಆದರೂ ನಾನು ಹಿಂದೆ ಸರಿಯಲಿಲ್ಲ. ಯಾಕೆಂದರೆ ನಾನು ಪ್ರೀತಿಯಲ್ಲಿದ್ದೆ. ಮದುವೆ ಅನ್ನುವುದು ನೈಸರ್ಗಿಕವಾದದ್ದು ಅಷ್ಟೇ’ ಎಂದು ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದ್ದಾರೆ.