ಬಿಚ್ಚುಗತ್ತಿ ಭರಮಣ್ಣ ನಾಯಕನಾಗಿ ರಾಜವರ್ಧನ್

‘ಬಿಚ್ಚುಗತ್ತಿ’ಯ ಚಿತ್ರಕಥೆ ಹಾಗೂ ಸಂಭಾಷಣೆಯ ಹೊಣೆಯನ್ನು ವೇಣು ಅವರೇ ಹೊತ್ತುಕೊಂಡಿದ್ದಾರೆ. ‘ಬಿಚ್ಚುಗತ್ತಿ ಭರಮಣ್ಣ ನಾಯಕ ನಡೆಸಿದ ದಂಗೆ ಈ ಸಿನಿಮಾದ ಕಥೆ. ಭರಮಣ್ಣ ನಾಯಕ ಚಿತ್ರದುರ್ಗ ಸೀಮೆಯಲ್ಲಿ ಬಹಳ ಜನಪ್ರಿಯ ವ್ಯಕ್ತಿ. ಆತನ ವ್ಯಕ್ತಿತ್ವ ಭಕ್ತಿ ಹಾಗೂ ಶಕ್ತಿಯ ಸಂಗಮ’ ಎಂದರು ವೇಣು.

ಈ ಚಿತ್ರದಲ್ಲಿ ನವರಸಗಳು ಇರಲಿವೆ. ಭರಮಣ್ಣ ಹಾಗೂ ಮುದ್ದಣ್ಣನ ಮುಖಾಮುಖಿ ಕೂಡ ಇದರಲ್ಲಿ ಇರಲಿದೆ ಎಂದು ತಿಳಿಸಿದರು. ಮುದ್ದಣ್ಣನ ಪಾತ್ರವನ್ನು ಪ್ರಭಾಕರ್ ನಿಭಾಯಿಸಲಿದ್ದಾರೆ. ‘ಇತಿಹಾಸ, ಸಾಹಿತ್ಯ ಹಾಗೂ ಸಿನಿಮಾ ಒಂದೇ ಅಲ್ಲ. ಹಾಗಾಗಿ, ಭರಮಣ್ಣನ ಕಥೆಯನ್ನು ಸಿನಿಮಾ ರೂಪದಲ್ಲಿ ಹೇಳುವಾಗ ಸಿನಿಮ್ಯಾಟಿಕ್‌ ಅಂಶಗಳನ್ನು ಸೇರಿಸಿಕೊಳ್ಳಲಾಗುತ್ತದೆ’ ಎಂಬುದನ್ನು ಸ್ಪಷ್ಟಪಡಿಸಿದರು ವೇಣು.

ಚಿತ್ರದ ನಿರ್ದೇಶನದ ಹೊಣೆ ಹೊತ್ತವರು ಹರಿ ಸಂತೋಷ್. ‘ಸಿನಿಮಾದಲ್ಲಿ ವಿಜೃಂಭಣೆ ಇರುವುದಿಲ್ಲ. ಚಿತ್ರದ ಬಹುತೇಕ ದೃಶ್ಯಗಳ ಚಿತ್ರೀಕರಣ ಸೆಟ್‌ಗಳಲ್ಲಿ ನಡೆಯಲಿದೆ. ಕೆಲವಷ್ಟು ದೃಶ್ಯಗಳನ್ನು ಚಿತ್ರದುರ್ಗದ ಕೋಟೆಯಲ್ಲಿ ಚಿತ್ರೀಕರಿಸಲಾಗುತ್ತದೆ. ನೂರು ದಿನಗಳ ಚಿತ್ರೀಕರಣ ನಡೆಸಬೇಕಿದೆ’ ಎಂದರು ಸಂತೋಷ್. ಚಿತ್ರದಲ್ಲಿ ಸಂದರ್ಭಕ್ಕೆ ಅಗತ್ಯವಿರುವಷ್ಟು ಹಾಡುಗಳು ಮಾತ್ರ ಇರಲಿವೆಯಂತೆ.

ಹರಿಪ್ರಿಯಾ ಅವರು ಸಿದ್ಧಾಂಬೆಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಅವರು ವರ್ಷಗಳ ಹಿಂದೆ ಕಲಿತಿದ್ದ ಕುದುರೆ ಸವಾರಿ ವಿದ್ಯೆ ಈ ಚಿತ್ರದಲ್ಲಿ ಕೆಲಸಕ್ಕೆ ಬರಲಿದೆ. ‘ನನಗೆ ಇತಿಹಾಸದ ಬಗ್ಗೆ ಹೆಚ್ಚೇನೂ ಗೊತ್ತಿಲ್ಲ. ಆದರೆ, ಈ ಚಿತ್ರದಲ್ಲಿ ಐತಿಹಾಸಿಕ ಪಾತ್ರವೊಂದು ಸಿಕ್ಕಿರುವುದು ನನ್ನ ಅದೃಷ್ಟ. ನಾನು ಬೇರೆ ಬೇರೆ ಬಗೆಯ ಪಾತ್ರಗಳ ಹುಡುಕಾಟದಲ್ಲಿ ಇದ್ದಾಗ ಇದು ಸಿಕ್ಕಿದೆ’ ಎಂದರು ಹರಿಪ್ರಿಯಾ.