‘ನಿನ್ನ ಸನಿಹಕೆ’ ಸಿನಿಮಾ ಸೆಟ್ಟೇರಿದಾಗಿನಿಂದ ಈ ಸಿನಿಮಾದ ಬಗ್ಗೆ ಕುತೂಹಲ ದುಪ್ಪಟ್ಟಾಗಿದೆ. ಯಾಕೆಂದರೆ ಇದರ ಮೂಲಕ ರಾಜ್ಕುಮಾರ್ ಕುಟುಂಬದ ಮೊದಲ ಹೆಣ್ಣು ಕುಡಿಯೊಬ್ಬರು ನಾಯಕಿಯಾಗಿ ಚಂದನವನಕ್ಕೆ ಕಾಲಿರಿಸುತ್ತಿದ್ದಾರೆ. ವರನಟ ರಾಜ್ಕುಮಾರ್ ಮೊಮ್ಮಗಳು, ನಟರಾದ ರಾಮ್ಕುಮಾರ್ ಮಗಳು ಧನ್ಯಾ ರಾಮ್ಕುಮಾರ್ ನಿನ್ನ ಸನಿಹಕೆ ಚಿತ್ರದ ನಾಯಕಿ. ಸೂರಜ್ ಗೌಡ ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿರುವ ಈ ಸಿನಿಮಾದಲ್ಲಿ ತಾವೇ ಮುಖ್ಯಪಾತ್ರದಲ್ಲೂ ನಟಿಸಿದ್ದಾರೆ. ಸದ್ಯ ಸಿನಿಮಾ ಬಿಡುಗಡೆಯ ಹಂತದಲ್ಲಿದ್ದು ಏಪ್ರಿಲ್ ತಿಂಗಳಿನಲ್ಲಿ ಸಿನಿಮಾ ಬಿಡುಗಡೆಯಾಗಲಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಬರೆದುಕೊಂಡಿದ್ದಾರೆ ಸೂರಜ್.