ಬೋನಿ ಕಪೂರ್, ಶ್ರೀದೇವಿ ದಂಪತಿಯ ಎರಡನೇ ಮಗಳು ಖುಷಿ ಕಪೂರ್ ಬಾಲಿವುಡ್‌ಗೆ ಪದಾರ್ಪಣೆ ಮಾಡಲಿದ್ದಾರೆ.
ಈ ಬಗ್ಗೆ ಖುಷಿ ಕಪೂರ್ ತಂದೆ ಬೋನಿ ಕಪೂರ್ ಮಾಹಿತಿ ನೀಡಿದ್ದಾರೆ. ಖುಷಿಯ ಸಿನಿಮಾವನ್ನು ಬೋನಿ ಕಪೂರ್ ನಿರ್ಮಾಣ ಮಾಡುವುದು ಬಹುತೇಕ ಖಚಿತವಾಗಿದೆ. ಇದೇ ಸಿನಿಮಾದಲ್ಲಿ ಶಾರೂಖ್‌ ಖಾನ್ ಪುತ್ರಿ ಸುಹಾನಾ ಖಾನ್, ಅಮಿತಾಭ್‌ ಮೊಮ್ಮಗ ಅಗಸ್ತ್ಯಾ ನಂದಾ ಕೂಡ ತೆರೆಹಂಚಿಕೊಳ್ಳುತ್ತಿದ್ದಾರೆ ಎನ್ನಲಾಗಿದೆ.ಈ ಸಿನಿಮಾವನ್ನು ಜೋಯಾ ಅಖ್ತರ್‌ ನಿರ್ದೇಶನ ಮಾಡುತ್ತಿದ್ದಾರೆ ಎಂದು ಬಾಲಿವುಡ್ ಮೂಲಗಳು ತಿಳಿಸಿವೆ.
ಪುತ್ರಿಯ ನಟನೆ ಬಗ್ಗೆ ಶಾರೂಖ್‌ ಖಾನ್ ಹಾಗೂ ಅಗಸ್ತ್ಯಾ ನಟನೆ ಬಗ್ಗೆ ಅಮಿತಾಭ್‌ ಕುಟುಂಬದವರು ಯಾವುದೇ ಅಧಿಕೃತ ಮಾಹಿತಿ ಹಂಚಿಕೊಂಡಿಲ್ಲ. ಆದಾಗ್ಯೂ ಅಗಸ್ತ್ಯಾ ಮತ್ತು ಸುಹಾನಾ ಪದೇ ಪದೇ ಜೋಯಾ ಅಖ್ತರ್‌ ಕಚೇರಿಯಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇವರು ಸಿನಿಮಾ ಮಾಡುವುದು ಅಧಿಕೃತ ಎಂದು ಜೋಯಾ ಅಖ್ತರ್‌ ಆಪ್ತರು ಖಚಿತಪಡಿಸಿದ್ದಾರೆ.
ಒಂದೇ ವೇಳೆ ಸುಹಾನಾ, ಅಗಸ್ತ್ಯಾ ಈ ಸಿನಿಮಾದಿಂದ ದೂರ ಸರಿದರೂ ಖುಷಿಯ ಸಿನಿಮಾ ಮಾಡುವುದು ಖಚಿತ ಎಂದು ಬೋನಿ ಕಪೂರ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಬೋನಿ ಕಪೂರ್ ಕಚೇರಿ ಮೂಲಗಳ ಪ್ರಕಾರ, ಏಪ್ರಿಲ್ನಲ್ಲಿಸಿನಿಮಾ ಚಿತ್ರೀಕರಣ ಆರಂಭವಾಗಲಿದ್ದು ಈ ಚಿತ್ರ ನೇರವಾಗಿ ನೆಟ್ಫ್ಲಿಕ್ಸ್ನಲ್ಲಿ ಬಿಡುಗಡೆಯಾಗಲಿದೆ ಎನ್ನಲಾಗಿದೆ.
ಬಾಲಿವುಡ್ನಲ್ಲಿ ಯಶಸ್ವಿ ನಿರ್ಮಾಪಕನಾಗಿ ಗುರುತಿಸಿಕೊಂಡಿರುವ ಬೋನಿ ಕಪೂರ್ ಅವರ ಹಿರಿಯ ಮಗ ಅರ್ಜುನ್ ಕಪೂರ್, ಪುತ್ರಿ ಜಾನ್ವಿ ಕಪೂರ್ ಈಗಾಗಲೇ ಸ್ಟಾರ್ ಆಗಿದ್ದಾರೆ. ಈಗ ಖುಷಿ ಕಪೂರ್ ಕೂಡ ಸಿನಿ ಪಯಣ ಆರಂಭಿಸುತ್ತಿದ್ದಾರೆ.
