ರಾಜ್‌ಕುಮಾರ್‌ ಸ್ಮಾರಕ ಪುನರಾಭಿವೃದ್ಧಿ: ಮುಖ್ಯಮಂತ್ರಿ ಸಿದ್ದರಾಮಯ್ಯ ಭರವಸೆ

ನಗರದ ರ್‍ಯಾಡಿಸನ್‌ ಬ್ಲೂ ಹೋಟೆಲ್‌ನಲ್ಲಿ ನಟ ದಿವಂಗತ ಪುನೀತ್‌ ರಾಜ್‌ಕುಮಾರ್‌ ಅವರ 3ಡಿ ಮುದ್ರಿತ ಕಿರುಪ್ರತಿಮೆ ಅನಾವರಣ ಕಾರ್ಯಕ್ರಮದಲ್ಲಿ, ಪುನೀತ್‌ ಅವರ ಪತ್ನಿ ಅಶ್ವಿನಿ ಪುನೀತ್‌ ರಾಜ್‌ಕುಮಾರ್‌ ಅವರು ನೀಡಿದ ಮನವಿಯನ್ನು ಸ್ವೀಕರಿಸಿ ಸಿದ್ದರಾಮಯ್ಯ ಈ ಭರವಸೆ ನೀಡಿದರು. ಜೊತೆಗೆ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ಘೋಷಣೆಯಾಗಿದ್ದ ಸ್ಫೂರ್ತಿ ದಿನಾಚರಣೆಯನ್ನು(ಮಾರ್ಚ್‌ 17) ಕಾರ್ಯರೂಪಕ್ಕೆ ತರುವುದಾಗಿ ತಿಳಿಸಿದರು.‌

‘ಪುನೀತ್‌ ಅಪರೂಪದ ವ್ಯಕ್ತಿತ್ವ ಇದ್ದ ನಟ. ಅವರಲ್ಲಿ ಸ್ವಲ್ಪವೂ ಅಹಂ ಇರಲಿಲ್ಲ. ಬಡವರಿಗೆ ಸ್ಪಂದಿಸುವ ಮನೋಭಾವ ಹೊಂದಿದ್ದ ಅವರು ಅತಿ ಹೆಚ್ಚು ಅಭಿಮಾನಿಗಳನ್ನು ಹೊಂದಿದ್ದರು ಎಂದರೆ ಅತಿಶಯೋಕ್ತಿಯಲ್ಲ. ನಾವು ಇನ್ನೊಬ್ಬ ಪುನೀತ್‌ ಅವರನ್ನು ನೋಡಲು ಸಾಧ್ಯವಿಲ್ಲ’ ಎಂದರು.

ಸ್ಫೂರ್ತಿ ದಿನ ಜಾರಿಗೆ ಬರಲಿ: ನಟ ರಾಘವೇಂದ್ರ ರಾಜ್‌ಕುಮಾರ್‌ ಮಾತನಾಡಿ, ‘ವ್ಯಕ್ತಿಯೊಬ್ಬ ಹೇಗೆ ಬದುಕಬೇಕು ಎಂದು ತೋರಿಸಿಕೊಟ್ಟವನು ಪುನೀತ್‌. ಪುನೀತ್‌ ಮೊದಲು ಕುಟುಂಬದ ಜೊತೆ ಬದುಕಿದ್ದ. ಇದೀಗ ಎಲ್ಲರ ಮನಸ್ಸಿನಲ್ಲೂ ಬದುಕಿದ್ದಾನೆ. ಈ ಕಿರುಪ್ರತಿಮೆಯನ್ನು ಕಷ್ಟಪಟ್ಟು ಮಾಡಿಲ್ಲ, ಬದಲಾಗಿ ಇಷ್ಟಪಟ್ಟು ಮಾಡಿದ್ದಾರೆ. ಕೈಯಲ್ಲೊಂದು ಕ್ಯಾಮೆರಾ ಹಿಡಿದ ಪ್ರತಿಮೆಯಿದು. ಆವಾಗ ಅಪ್ಪಾಜಿ ಬಳಿ ಒಂದು ಪೆಂಟಾಕ್ಸ್‌ ಎಂಬ ಕ್ಯಾಮೆರಾ ಇತ್ತು. ಅದರಲ್ಲಿ ಅಪ್ಪಾಜಿ ಫೋಟೊ ತೆಗೆಯುತ್ತಿದ್ದ. ಆತನ ಕೊನೆಯ ಸಿನಿಮಾದಲ್ಲೂ ಆತ ಕ್ಯಾಮೆರಾ ಹಿಡಿದಿದ್ದ. ಜೀವಂತವಾಗಿರುವ ಪುನೀತ್‌ನನ್ನು ಮನೆಗೆ ಕರೆದೊಯ್ಯುತ್ತಿರುವ ರೀತಿ ಭಾವನೆ ಮೂಡಿದೆ. ಪುನೀತ್‌ ಜನ್ಮದಿನವಾದ ಮಾರ್ಚ್‌ 17ನ್ನು ಸ್ಫೂರ್ತಿ ದಿನ ಎಂದು ಘೋಷಣೆ ಮಾಡಿದರು. ಆದರೆ ಅದು ಜಾರಿಗೆ ಬರಲಿಲ್ಲ. ಸರ್ಕಾರ ಅದನ್ನು ಕಾರ್ಯರೂಪಕ್ಕೆ ತರಬೇಕು’ ಎಂದು ಆಗ್ರಹಿಸಿದರು.   

ವಿಶೇಷವಾದ 3ಡಿ ಪ್ರತಿಮೆ 

ಪಿಆರ್‌ಕೆ ಸ್ಟುಡಿಯೋಸ್‌ ಸಹಯೋಗದಲ್ಲಿ ಎನ್‌3ಕೆ ಡಿಸೈನ್‌ ಸ್ಟುಡಿಯೊ ನಿರ್ಮಾಣ ಮಾಡಿರುವ ಈ 3ಡಿ ಕಿರುಪ್ರತಿಮೆ ಹಲವು ವಿಶೇಷಗಳಿಂದ ಕೂಡಿದೆ. ವಿಚಾರ್‌ ಬಿ.ಎನ್‌ ಈ ಕಿರುಪ್ರತಿಮೆಗೆ ಜೀವನೀಡಿದ್ದು ಝೆಡ್‌ಬ್ರಷ್‌ ಸಾಫ್ಟ್‌ವೇರ್ ಬಳಸಿಕೊಂಡು ಪೋರ್ಚ್‌ಗಲ್‌ನಲ್ಲಿ ಈ ಪ್ರತಿಮೆ ರಚಿಸಿದ್ದಾರೆ. ಹಾಲಿವುಡ್‌ನ ‘ಅವತಾರ್‌’ ಸಿನಿಮಾ ಸೇರಿದಂತೆ ಹಲವು ಸಿನಿಮಾಗಳಲ್ಲಿನ ಪಾತ್ರಗಳನ್ನು ಈ ತಂತ್ರಜ್ಞಾನ ಬಳಸಿ ರಚಿಸಲಾಗಿದೆ. ಅತ್ಯಂತ ಸೂಕ್ಷ್ಮವಾದ ವಿವರಗಳೂ ಈ ಪ್ರತಿಮೆಯಲ್ಲಿ ಕಾಣಬಹುದಾಗಿದೆ. ಉದಾಹರಣೆಗೆ ಪುನೀತ್‌ ಅವರ ಕೈಯ ನರಗಳನ್ನೂ ಇದರಲ್ಲಿ ಕಾಣಬಹುದು. ನಡೆಯುವ ಮಾದರಿಯಲ್ಲಿ ಈ ಪ್ರತಿಮೆ ರೂಪುಗೊಂಡಿದ್ದು ಇದೇ ರೀತಿಯಲ್ಲಿ ಹಲವು ಮಾದರಿಯ 3ಡಿ ಪ್ರತಿಮೆಗಳ ರಚನೆಯಾಗಿದೆ. ಪುನೀತ್‌ ಅವರು ನಿಂತಿರುವ ಕಲ್ಲು ನಕ್ಷತ್ರಾಕಾರದಲ್ಲಿದ್ದು ಪುನೀತ್‌ ಅವರ ಮುಗುಳ್ನಗೆ ಬೇರೆ ಬೇರೆ ಕಡೆಯಿಂದ ಬೀಳುವ ಬೆಳಕಿಗೆ ಅನುಗುಣವಾಗಿ ಬದಲಾಗುತ್ತಾ ಹೋಗುತ್ತದೆ.