₹400 ಕೋಟಿ ದಾಟಿದ ಶಾರುಕ್ ಖಾನ್ ಅಭಿನಯದ ‘ಡಂಕಿ’ ಸಿನಿಮಾ

ಬಾಕ್ಸ್ ಆಫೀಸ್‌ ಗಳಿಕೆ ಕುರಿತಂತೆ ಚಿತ್ರ ನಿರ್ಮಾಣ ಸಂಸ್ಥೆ ರೆಡ್ ಚಿಲ್ಲೀಸ್ ಎಂಟರ್‌ಟೈನ್‌ಮೆಂಟ್, ‘ಎಕ್ಸ್‌‘ನಲ್ಲಿ ಪೋಸ್ಟ್‌ ಹಂಚಿಕೊಳ್ಳುವ ಮೂಲಕ ಮಾಹಿತಿ ನೀಡಿದೆ.

ನೀವು ‘ಡಂಕಿ‘ ಸಿನಿಮಾ ಮೇಲೆ ತೋರುತ್ತಿರುವ ಪ್ರೀತಿಯಿಂದಾಗಿ ಚಿತ್ರವು ವಿಶ್ವದಾದ್ಯಂತ ₹400.40 ಕೋಟಿ ಗಳಿಸಿದೆ ಎಂದು ಚಿತ್ರ ನಿರ್ಮಾಣ ಸಂಸ್ಥೆ ಪೋಸ್ಟ್‌ನಲ್ಲಿ ಹೇಳಿದೆ.

ನೈಜ ಘಟನೆ ಆಧರಿತ ಈ ಚಿತ್ರವನ್ನು ಮುನ್ನಾಬಾಯಿ ಎಂಬಿಬಿಎಸ್, 3 ಈಡಿಯಟ್ಸ್ ಚಿತ್ರಗಳ ನಿರ್ದೇಶಕ ರಾಜಕುಮಾರ್ ಹಿರಾನಿ ನಿರ್ದೇಶಿಸಿದ್ದಾರೆ

ಚಿತ್ರವು ‘ಡಾಂಕಿ ಫ್ಲೈಟ್’ಎಂಬ ಅಕ್ರಮ ವಲಸೆ ತಂತ್ರಗಾರಿಕೆಯ ಕಥಾಹಂದರವನ್ನು ಹೊಂದಿದ್ದು, ತಾಪ್ಸಿ ಪನ್ನು, ವಿಕ್ಕಿ ಕೌಶಲ್, ಬೊಮನ್ ಇರಾನಿ, ವಿಕ್ರಮ ಕೊಚ್ಚಾರ್ ಮತ್ತು ಅನಿಲ್ ಗ್ರೋವರ್ ತಾರಾಗಣವಿದೆ.

ಈ ವರ್ಷ (2023) ಬಿಡುಗಡೆಗೊಂಡ ಶಾರುಖ್‌ ಅವರ ಮೂರನೇ ಚಿತ್ರ ಇದಾಗಿದೆ. ಶಾರುಕ್ ಅವರ ಪಠಾಣ್‌ ಮತ್ತು ಜವಾನ್‌ ಚಿತ್ರಗಳಿಗೆ ಹೋಲಿಸಿದರೆ ‘ಡಂಕಿ’ ಚಿತ್ರದ ಗಳಿಕೆಯಲ್ಲಿ ಇಳಿಕೆ ಕಂಡಿದೆ.

ವಿಶ್ವದಾದ್ಯಂತ ಪಠಾಣ್ ₹1,050.30 ಕೋಟಿ ಹಾಗೂ ಜವಾನ್ ಚಿತ್ರ ₹1,148.32 ಕೋಟಿ ಗಳಿಕೆ ಕಂಡಿತ್ತು