ದೆಹಲಿ: 'ತಾಂಡವ್' ವೆಬ್ ಸರಣಿಯ ಕುರಿತ ವಿವಾದಕ್ಕೆ ಸಂಬಂಧಿಸಿದಂತೆ ಆನ್‌ಲೈನ್‌ ಸ್ಟ್ರೀಮಿಂಗ್‌ ವೇದಿಕೆ 'ಅಮೆಜಾನ್ ಪ್ರೈಮ್' ಮಂಗಳವಾರ ಬೇಷರತ್‌ ಕ್ಷಮೆ ಕೋರಿದೆ. ಅಲ್ಲದೆ, ಆಕ್ಷೇಪಿಸಲಾದ ದೃಶ್ಯಾವಳಿಗಳನ್ನು ತೆಗೆದುಹಾಕಿರುವುದಾಗಿ ಖಚಿತಪಡಿಸಿದೆ.
ಸೈಫ್ ಅಲಿ ಖಾನ್ ಮತ್ತು ಮೊಹಮ್ಮದ್ ಝೀಷನ್ ಅಯೂಬ್ ಅಭಿನಯದ, ರಾಜಕೀಯ ಕಥಾಹಂದರದ ವೆಬ್ ಸರಣಿಯ ಕಾಲೇಜಿನ ನಾಟಕದ ದೃಶ್ಯಕ್ಕೆ ಸಂಬಂಧಿಸಿದಂತೆ ಭಾರಿ ವಿವಾದ ಉಂಟಾಗಿತ್ತು. ಈ ಕಾರ್ಯಕ್ರಮವು ಧಾರ್ಮಿಕ ಭಾವನೆಗಳಿಗೆ ಧಕ್ಕೆಯುಂಟುಮಾಡಿದೆ ಎಂದು ಆರೋಪಿಸಿ ಹಲವು ಎಫ್ಐಆರ್ ದಾಖಲಾಗಿದ್ದವು.
'ಇತ್ತೀಚೆಗೆ ಪ್ರಾರಂಭವಾದ ವೆಬ್ ಸರಣಿ 'ತಾಂಡವ್'ನಲ್ಲಿ ಕೆಲವು ದೃಶ್ಯಗಳನ್ನು ಆಕ್ಷೇಪಾರ್ಹವೆಂದು ವೀಕ್ಷಕರು ಪರಿಗಣಿಸಿದ್ದಾರೆ. ಇದು ನಮ್ಮ ಉದ್ದೇಶವಾಗಿರಲಿಲ್ಲ. 'ಅಮೆಜಾನ್ ಪ್ರೈಮ್' ಮತ್ತೊಮ್ಮೆ ತೀವ್ರ ವಿಷಾದ ವ್ಯಕ್ತಪಡಿಸುತ್ತಿದೆ. ಆಕ್ಷೇಪಿಸಿದ ದೃಶ್ಯಗಳನ್ನು ನಮ್ಮ ಗಮನಕ್ಕೆ ಬಂದ ಕೂಡಲೇ ತೆಗೆದುಹಾಕಲಾಗಿದೆ,' ಎಂದು ಪ್ರೈಮ್ ತಿಳಿಸಿದೆ.
