ಶನಿವಾರ, ಏಪ್ರಿಲ್ 4, 2020
19 °C
ವಿಡಿಯೊ ಮೂಲಕ ಜನರಿಗೆ ರಕ್ಷಣಾ ಸಲಹೆ

ಬೆಂಕಿ ಅವಘಡ ತಡೆಗೆ ‘ಫೈರ್‌ಚಾಂಪ್’

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಒಂದು ವೇಳೆ ನಿಮ್ಮ ಮನೆಯಲ್ಲಿ ಬೆಂಕಿ ಅವಘಡ ಸಂಭವಿಸಿದಾಗ ಏನು ಮಾಡುತ್ತೀರಿ? ಅಯ್ಯೋ ಹೀಗೆ ಮಾಡಿದ್ದರೆ ಬೆಂಕಿ ಅವಘಡದಿಂದ ಪಾರಾಗಬಹುದು ಎಂಬ ಉಪಾಯ ನಿಮಗೆ ಗೊತ್ತಿದೆಯೇ? ಬೆಂಕಿಯಿಂದ ತಪ್ಪಿಸಿಕೊಳ್ಳಲು ಜನರಿಗೆ ನೀವು ಸಲಹೆಗಳನ್ನು ಹೇಳಬಯಸುವಿರಾ? ಹಾಗಾದರೆ ಈಗಲೇ ಕೈಜೋಡಿಸಿ ‘ಐ ಆ್ಯಮ್‌ ಫೈರ್‌ ಚಾಂಪಿಯನ್’ ಅಭಿಯಾನದ ಜೊತೆಗೆ.

ಕಾರ್ಲ್‌ಟನ್ ಅಗ್ನಿ ದುರಂತದ 10ನೇ ವರ್ಷದ ಸ್ಮರಣಾರ್ಥ ‘ಬಿಯಾಂಡ್‌ ಕಾರ್ಲ್‌ಟನ್’ ಟ್ರಸ್ಟ್‌ ಆರಂಭಿಸಿರುವ ಈ ಅಭಿಯಾನದ ಮೂಲಕ ಅಗ್ನಿ ದುರಂತ ತಡೆಯುವ ಚಾಂಪಿಯನ್ ನೀವಾಗಬಹುದು. ಅಪಾಯಕ್ಕೂ ಮುನ್ನವೇ ಜಾಗೃತಗೊಳಿಸುವುದು ಅಭಿಯಾನದ ಉದ್ದೇಶ.

ಅವಘಡದಿಂದ ಪಾರಾಗುವ ತಂತ್ರಗಾರಿಕೆಗಳ ಕೊರತೆಯಿಂದ ಅಗ್ನಿ ದುರಂತಗಳಲ್ಲಿ ಸಿಲುಕಿ, ಎಷ್ಟೋ ಮಂದಿ ಅಸಹಾಯಕರಾಗಿ ಪ್ರಾಣ ಬಿಟ್ಟಿದ್ದಾರೆ. ಆದರೆ, ಈ ಅಭಿಯಾನದ ಮೂಲಕ ನೀವು ನೀಡುವ ಸಲಹೆ ಹಾಗೂ ಮಾರ್ಗದರ್ಶನಗಳು ಮುಂದೆ ಎದುರಾಗುವ ಅವಘಡಗಳಿಂದ ಜನರನ್ನು ಪಾರು ಮಾಡಲಿದೆ. 

ಅಭಿಯಾನದಲ್ಲಿ ಭಾಗವಹಿಸುವುದು ಹೇಗೆ?

#Iamafirechamp ಅಭಿಯಾನದಲ್ಲಿ ಭಾಗವಹಿಸಲು ಇಚ್ಛಿಸುವವರು 15 ಸೆಕೆಂಡುಗಳ ವಿಡಿಯೊ ಶೂಟ್‌ ಮಾಡಿ ಕಳುಹಿಸಬೇಕು. ಅದರಲ್ಲಿ ತಮ್ಮ ವಾಸಸ್ಥಾನ ಹಾಗೂ ಮಾಡುವ ಕೆಲಸದ ಬಗ್ಗೆ ತಿಳಿಸಬೇಕು. ಬೆಂಕಿ ಅವಘಡ ಎದುರಾದಾಗ ಅನುಸರಿಸಬೇಕಾದ ಸುರಕ್ಷತಾ ಕ್ರಮಗಳನ್ನು ವಿಡಿಯೊ ಮೂಲಕ ಹಂಚಿಕೊಳ್ಳಬಹುದು.

ಪ್ರಾತ್ಯಕ್ಷಿಕೆ ಮೂಲಕವೂ ಪಾರಾಗುವ ತಂತ್ರಗಳನ್ನು ತಿಳಿಸಬಹುದು. ಕನ್ನಡ, ಇಂಗ್ಲಿಷ್‌, ಹಿಂದಿ ಸೇರಿ ಇತರೆ ಯಾವ ಭಾಷೆಯಲ್ಲಾದರೂ ವಿಡಿಯೊ ಚಿತ್ರೀಕರಿಸಬಹುದು. #Iamafirechamp ಹ್ಯಾಶ್‌ಟ್ಯಾಗ್‌ ಬಳಸಿ ಸಾಮಾಜಿಕ ಮಾಧ್ಯಮಗಳಾದ ಫೇಸ್‌ಬುಕ್, ಟ್ವಿಟರ್, ಇನ್‌ಸ್ಟಾಗ್ರಾಂ, ವಾಟ್ಸ್‌ಆ್ಯಪ್ ಅಥವಾ info@beyondcarlton.org ವಿಳಾಸದಲ್ಲಿ ನಿಮ್ಮ ವಿಡಿಯೊ ಹಂಚಿಕೊಳ್ಳಬಹುದು.

ಏನಿದು ‘ಬಿಯಾಂಡ್ ಕಾರ್ಲ್‌ಟನ್’ ?

ನಗರದ ಹಳೆ ವಿಮಾನ ನಿಲ್ದಾಣ ರಸ್ತೆಯಲ್ಲಿರುವ ಕಾರ್ಲ್‌ಟನ್ ಟವರ್ಸ್‌ ಸಂಕೀರ್ಣದಲ್ಲಿ 2010ರ ಫೆ.23ರಂದು ಸಂಭವಿಸಿದ ಅಗ್ನಿ ದುರಂತದಲ್ಲಿ ಒಂಬತ್ತು ಮಂದಿ ಪ್ರಾಣ ಕಳೆದುಕೊಂಡರು. ಈ ಕರಾಳ ಘಟನೆಯಲ್ಲಿ ತನ್ನ ಮಗನನ್ನು ಕಳೆದುಕೊಂಡ ಉದಯ್ ವಿಜಯನ್‌ ಎನ್ನುವವರು ಜನರಿಗೆ ಅಗ್ನಿ ಸುರಕ್ಷತಾ ಕ್ರಮಗಳ ಮಾಹಿತಿ ತಲುಪಿಸುವ ಉದ್ದೇಶದಿಂದ ‘ಬಿಯಾಂಡ್ ಕಾರ್ಲ್‌ಟನ್’ ಟ್ರಸ್ಟ್‌ ಪ್ರಾರಂಭಿಸಿದರು. ದುರಂತದಲ್ಲಿ ಪ್ರಾಣ ಕಳೆದುಕೊಂಡವರ ಪೋಷಕರು ಹಾಗೂ ಸಂಬಂಧಿಕರ ಜತೆಗೂಡಿ ಈ ಅಭಿಯಾನ ಆರಂಭಿಸಿದ್ದಾರೆ.

‘ಅಗ್ನಿ ಸುರಕ್ಷತಾ ಕಾನೂನುಗಳ ಕೊರತೆ’

‘ಅಗ್ನಿ ಸುರಕ್ಷತೆ ಪ್ರತಿಯೊಬ್ಬರ ಜವಾಬ್ದಾರಿ. ದೇಶದಲ್ಲಿ ಅಗ್ನಿ ಸುರಕ್ಷತಾ ಕಾನೂನು ಜಾರಿಗೆ ತರುವಲ್ಲಿ ನಿರಾಸಕ್ತಿ ತೋರಿದೆ. ಹೀಗಾಗಿ ವೇಗವಾಗಿ ಮಾಹಿತಿ ಪಸರಿಸುತ್ತಿರುವ ಸಾಮಾಜಿಕ ಮಾಧ್ಯಮಗಳನ್ನೇ ಅಭಿಯಾನದ ವೇದಿಕೆಯಾಗಿ ಬಳಸಿಕೊಳ್ಳುತ್ತಿದ್ದೇವೆ. ಈ ಅಭಿಯಾನ ನಾಗರಿಕರನ್ನು ಅಗ್ನಿ ಸುರಕ್ಷತೆಯ ಕಡೆಗೆ ಸನ್ನದ್ಧಗೊಳಿಸುವ ಒಂದು ಪ್ರಯತ್ನ’ ಎನ್ನುತ್ತಾರೆ ಬಿಯಾಂಡ್ ಕಾರ್ಲ್‌ಟನ್ ಸ್ಥಾಪಕ ಉದಯ್ ವಿಜಯನ್. 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು