ಹುಬ್ಬಿನ ಹೊಟ್ಟಿಗೆ ಪರಿಹಾರ

ಇಂಥ ಹುಬ್ಬುಗಳಿಗೆ ಹೊಟ್ಟಿನ(ಡ್ಯಾಂಡ್ರಫ್) ಸಮಸ್ಯೆ ತೀವ್ರವಾಗಿ ಕಾಡುತ್ತದೆ. ಇದರಿಂದ ಮುಖದ ಸೌಂದರ್ಯ ಕುಂದುವ ಜೊತೆಗೆ, ಕಿರಿ ಕಿರಿ ಉಂಟು ಮಾಡುತ್ತದೆ.

ಈ ಸಮಸ್ಯೆಗೆ ಕಾರಣವೇನು?

ತಲೆ ಹೊಟ್ಟಿನ ಸಮಸ್ಯೆ ಇರುವವರಲ್ಲಿ, ತಲೆಯಲ್ಲಿಯಾಗುವ ಸೋರಿಯಾಸಿಸ್‌(ಸ್ಕಾಲ್ಪ್), ಒಣಚರ್ಮ, ದೇಹದಲ್ಲಿ ಸೋರಿಯಾಸಿಸ್ ಇರುವವರಲ್ಲಿ ಹುಬ್ಬಿನ ಹೊಟ್ಟಿನ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ. ಈ ಸಮಸ್ಯೆಗಳಿರುವವರು ಸರಿಯಾದ ಚಿಕಿತ್ಸೆ ತಗೊಂಡರೆ, ಹುಬ್ಬಿನ ಹೊಟ್ಟು ಕಡಿಮೆಯಾಗುತ್ತದೆ.

ಹುಬ್ಬಿನಲ್ಲಿ ಹೊಟ್ಟಾಗಿದ್ದರೆ, ತುರಿಕೆ/ ನೆವೆ ಬರುತ್ತದೆ. ಸ್ವಲ್ಪ ಉರಿ ಉರಿ ಕಾಣಿಸಿಕೊಳ್ಳುತ್ತದೆ. ಇದು ದೀರ್ಘಕಾಲ ವಿರುತ್ತದೆ. ದೇಹದ ಯಾವುದೇ ಭಾಗದಲ್ಲಿ ಚರ್ಮದ ಸಮಸ್ಯೆ ಇದ್ದರೂ, ಹುಬ್ಬಿನಲ್ಲಿ ಈ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ.

ಪರಿಹಾರಗಳು

* ಶುಭ್ರವಾದ ಬಟ್ಟೆಯನ್ನು ತಂಪಾದ ನೀರಿನಲ್ಲಿ ಅದ್ದಿ ಹಿಂಡಿ ಹುಬ್ಬುಗಳನ್ನು ಸೂಕ್ಷ್ಮವಾಗಿ ಸವರುತ್ತಿರಿ. ಈ ರೀತಿ ಪ್ರತಿ ನಿತ್ಯ 15 ನಿಮಿಷಗಳ ಕಾಲ ಮಾಡಿ.

* ತೆಂಗಿನಕಾಯಿ ನೀರು, ಬೆಣ್ಣೆಹಣ್ಣು, ಟೀ ಟ್ರೀ ತರಹದ ನೈಸರ್ಗಿಕ ತೈಲವನ್ನು ಹುಬ್ಬುಗಳಿಗೆ ಹಚ್ಚುವುದರಿಂದ ಹೊಟ್ಟಾಗುವುದನ್ನು ತಪ್ಪಿಸಬಹುದು.

* ಹುಬ್ಬುಗಳಿಗೆ ಆಲಿವ್ ಎಣ್ಣೆ ಹಚ್ಚಿ ಕೆಲ ಕಾಲ ನುಣುಪಾಗಿ ಮಸಾಜ್ ಮಾಡಿ. ನಂತರ ತೊಳೆಯಿರಿ.

ಆಹಾರವೂ ಮುಖ್ಯ:

* ದೇಹದ ಇತರ ಭಾಗಗಳಲ್ಲಿ ಚರ್ಮದ ಸಮಸ್ಯೆ ಇದ್ದರೆ, ಕೇವಲ ಹುಬ್ಬಿನ ಚಿಕಿತ್ಸೆಯಿಂದ ಪ್ರಯೋಜನ ವಾಗುವುದಿಲ್ಲ. ಹಾಗಾಗಿ, ಚರ್ಮದ ಸಮಸ್ಯೆಗೂ ಚಿಕಿತ್ಸೆ ಪಡೆಯುವ ಅಗತ್ಯವಿದೆ.

* ಚಿಕಿತ್ಸೆಯ ಜೊತೆಗೆ, ಹೆಚ್ಚು ದ್ರವಾಂಶ, ತೈಲಾಂಶವಿರುವ (ಬಾದಾಮಿ, ಶೇಂಗಾ.. ಇತ್ಯಾದಿ) ಆಹಾರ ಸೇವಿಸಬೇಕು.

* ಒಂದು ಚಮಚ ಅರಿಸಿನವನ್ನು ಬಿಸಿಹಾಲು ಅಥವಾ ಬಿಸಿ ನೀರಿಗೆ ಹಾಕಿ ಕುಡಿಯಬಹುದು.

* ಚಳಿ ಮತ್ತು ಮಳೆಗಾಲದಲ್ಲಿ ಈ ಸಮಸ್ಯೆ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತದೆ. ಹಾಗಾಗಿ, ಆ ಕಾಲಗಳಿಗೆ ಮುನ್ನವೇ ಎಚ್ಚರಿಕೆ ಕ್ರಮಗಳನ್ನು ತೆಗೆದುಕೊಳ್ಳವುದು ಒಳ್ಳೆಯದು.

ಎಚ್ಚರಿಕೆ ಕ್ರಮಗಳು:

* ಹುಬ್ಬು ಕಣ್ಣಿನ ಮೇಲ್ಭಾಗದಲ್ಲಿರುವುದರಿಂದ, ಯಾವುದೇ ಚಿಕಿತ್ಸೆ ಮಾಡಿಕೊಳ್ಳುವಾಗ ಎಚ್ಚರಿಕೆ ಇರಬೇಕು. ಕಣ್ಣಿಗೆ ಬೀಳದಂತೆ ರಕ್ಷಣೆ ಮಾಡಿಕೊಳ್ಳಬೇಕು.

* ಮುಖ ತೊಳೆಯಲು ಬಳಸುವ ಸೋಪ್, ಫೇಸ್‌ವಾಷ್‌, ಮೇಕಪ್‌ಗೆ(ಪ್ರಸಾದನ) ಬಳಸುವ ಕ್ರೀಮ್‌ಗಳನ್ನು, ‘ತಮಗೆ ಅಲರ್ಜಿ ಆಗುತ್ತೆಯೇ‘ ಎಂಬುದನ್ನೂ ಪರೀಕ್ಷಿಸಿ ನಂತರ ಬಳಸಬೇಕು.

* ಚರ್ಮದ ಅಲರ್ಜಿ ಸಮಸ್ಯೆ ಇದ್ದವರಿಗೆ ಈ ಹುಬ್ಬಿನ ಹೊಟ್ಟಿನ ಸಮಸ್ಯೆ ಹೆಚ್ಚು ಬಾಧಿಸುತ್ತದೆ. ಈ ಬಗ್ಗೆಯೂ ಎಚ್ಚರವಿರಬೇಕು.