ಏನಾದ್ರೂ ಕೇಳ್ಬೋದು: ಮಕ್ಕಳ ಶಾಲಾ ಭಯಕ್ಕೆ ಪರಿಹಾರವೇನು?

ಮಗನಿಗೆ ನಾಲ್ಕು ವರ್ಷ. ಅಂಗನವಾಡಿಗೆ ಹೋಗುವುದಕ್ಕೆ ಹಟ ಮಾಡುತ್ತಾನೆ. ಮನೆಯಲ್ಲಿಯೇ ಇರಲು ಬಯಸುತ್ತಾನೆ. ಅಂಗನವಾಡಿಗೆ ಕಳಿಸುವುದು ಹೇಗೆ?
ಹೆಸರು ಊರು ತಿಳಿಸಿಲ್ಲ.

ಮಕ್ಕಳ ಮಿದುಳು ಇನ್ನೂ ಬೆಳವಣಿಗೆಯ ಪ್ರಾರಂಭದ ಹಂತದಲ್ಲಿರುತ್ತದೆ. ತರ್ಕ ವಿವೇಚನೆಗಳಿಗೆ ಬಳಸುವ ಹಣೆಯ ಹಿಂಭಾಗದಲ್ಲಿರುವ ಮಿದುಳಿನ ಭಾಗದ ಬೆಳವಣಿಗೆ ಈಗಷ್ಟೇ ಆರಂಭವಾಗುತ್ತದೆ. ಹಾಗಾಗಿ ದೊಡ್ಡವರ ಪ್ರಪಂಚದ ತರ್ಕಗಳನ್ನು ಬಳಸಿ ಅವರ ಜೊತೆ ಮಾತನಾಡಿದರೆ ಅದು ಅವರನ್ನು ತಲುಪುವುದಿಲ್ಲ. ಮಕ್ಕಳಿಗೆ ಅಗತ್ಯವಾಗಿ ಬೇಕಾಗಿರುವುದು ಸುರಕ್ಷಿತ ವಾತಾವರಣ. ಹುಟ್ಟಿನಿಂದಲೇ ಮನೆಯಲ್ಲಿ ಕುಟುಂಬದವರ ಜೊತೆ ಒಡನಾಡುತ್ತಾ ಬೆಳೆದಿರುವುದರಿಂದ ಅಲ್ಲಿ ಮಾತ್ರ ಅವರು ಸುರಕ್ಷಿತ ಭಾವನೆಯನ್ನು ಅನುಭವಿಸುತ್ತಾರೆ. ಹೊಸ ವಾತಾವರಣಕ್ಕೆ ಹೊಂದಿಕೊಳ್ಳಲು ಅವರಿಗೆ ಸಮಯದ ಅಗತ್ಯವಿದೆ. ಪೋಷಕರು ನಿಧಾನವಾಗಿ ಅಂತಹ ಭದ್ರತೆಯ ಭಾವವನ್ನು ತುಂಬಬೇಕಾಗುತ್ತದೆ.

ಮಗನನ್ನು ಬಲವಂತವಾಗಿ ಅಂಗನವಾಡಿಯಲ್ಲಿ ಬಿಟ್ಟು ಬರಬೇಡಿ. ಒಂದೆರೆಡು ದಿನ ನಿಮ್ಮ ಜೊತೆ ಕರೆದುಕೊಂಡು ಹೋಗಿ ಅಲ್ಲಿನ ವಾತಾವರಣವನ್ನು ತೋರಿಸಿ ಮತ್ತೆ ಕರೆದುಕೊಂಡು ಬನ್ನಿ. ಅಲ್ಲಿನ ಶಿಕ್ಷಕಿಯ ಮತ್ತು ಇತರ ಮಕ್ಕಳ ಪರಿಚಯ ಮಾಡಿಸಿ. ತಮ್ಮ ಭಾವನೆ ಅನಿಸಿಕೆಗಳನ್ನು ವ್ಯಕ್ತಪಡಿಸಲು ಅಗತ್ಯವಿರುವಷ್ಟು ಅವರ ಮಿದುಳು ಬೆಳೆದಿರುವುದಿಲ್ಲ. ಹಾಗಾಗಿ ಅವರ ಭಾವನೆಗಳಿಗೆ ನೀವು ಶಬ್ದರೂಪವನ್ನು ಕೊಡಬೇಕಾಗುತ್ತದೆ. ಅವನನ್ನು ಹತ್ತಿರ ಕೂರಿಸಿಕೊಂಡು ಪ್ರೀತಿಯಿಂದ ಕೆಲವು ಪ್ರಶ್ನೆಗಳನ್ನು ಕೇಳಿ. ಶಾಲೆಯಲ್ಲಿ ಅಮ್ಮ ಇರುವುದಿಲ್ಲ ಎಂದು ನಿನಗೆ ಹೆದರಿಕೆಯಾಗುತ್ತದೆಯಾ? ಶಾಲೆಗೆ ಕಳಿಸಿ ಹೋಗಿರುವ ಅಮ್ಮ ಮತ್ತೆ ಕರೆದುಕೊಂಡು ಹೋಗಲು ಬರದಿದ್ದರೆ ಎಂದು ಭಯವೇ? ಹಸಿವಾದರೆ, ಮಲ ಮೂತ್ರಗಳು ಬಂದರೆ ಶಾಲೆಯಲ್ಲಿ ಯಾರನ್ನು ಕೇಳುವುದು ಎಂದು ಹೆದರಿಕೆಯೇ? ಅಲ್ಲಿ ಸ್ನೇಹಿತರು ಜಗಳ ಮಾಡಿದರೆ ಹೊಡೆದರೆ ಎನ್ನುವ ಭಯವೇ? ಹೀಗೆ ನಿಧಾನವಾಗಿ ಪ್ರಶ್ನೆ ಕೇಳುತ್ತಾ ಹೋದರೆ ಅವನ ಹಿಂಜರಿಕೆಯ ಕಾರಣಗಳು ಅರ್ಥವಾಗುತ್ತವೆ. ನಂತರ ಅವುಗಳಿಗೆ ಸಮಾಧಾನಗಳನ್ನು ಹೇಳಬಹುದು. ಅಮ್ಮನಿಗೆ ನೀನು ಬಹಳ ಇಷ್ಟ, ಹಾಗಾಗಿ ದಿನಾ ಸಾಯಂಕಾಲ ಕರೆದುಕೊಂಡು ಹೋಗಲು ಬಂದೇ ಬರುತ್ತೇನೆ. ಹಸಿವಾದರೆ ಮಲ ಮೂತ್ರಗಳಿಗೆ  ಹೋಗಬೇಕಾದರೆ ಟೀಚರ್‌ನ್ನು ಕೇಳಬಹುದು. ಸ್ನೇಹಿತರು ನಿನಗೆ ತೊಂದರೆ ಕೊಡದಂತೆ ಟೀಚರ್‌ ನೋಡಿಕೊಳ್ಳುತ್ತಾರೆ. ನಿನಗೂ ಅವರು ಸ್ನೇಹಿತರಾಗುತ್ತಾರೆ. ಆಗ ಒಟ್ಟಾಗಿ ಆಟವಾಡಬಹುದು. ಹೀಗೆ ಅವರಿಗೆ ಭದ್ರತೆಯ ಭರವಸೆ ಮೂಡಿಸಬೇಕು. ಎಲ್ಲವನ್ನೂ ಒಂದೇ ದಿನ ಮಾಡಲು ಸಾಧ್ಯವಾಗದಿರಬಹುದು. ಹಂತಹಂತವಾಗಿ ಪ್ರಯತ್ನಮಾಡುತ್ತಾ ಹೋದರೆ ಹೊಸ ವಾತಾವರಣಕ್ಕೆ ಹೊಂದಿಕೊಳ್ಳುವುದನ್ನು ಮಕ್ಕಳು ಕಲಿಯುತ್ತಾ ಹೋಗುತ್ತಾರೆ.