ದೆಹಲಿಯಲ್ಲಿ ಉಚಿತ ವ್ಯಾಕ್ಸಿನೇಷನ್ ಶಿಬಿರ ಹಮ್ಮಿಕೊಳ್ಳಲಿರುವ ಗಂಭೀರ್

ನವದೆಹಲಿ: ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಸಂಸದ ಹಾಗೂ ಮಾಜಿ ಕ್ರಿಕೆಟಿಗ ಗೌತಮ್ ಗಂಭೀರ್ ಅವರು ಸೋಮವಾರದಿಂದ ರಾಷ್ಟ್ರ ರಾಜಧಾನಿ ನವದೆಹಲಿಯಲ್ಲಿ ಕೋವಿಡ್-19 ಉಚಿತ ಲಸಿಕೆ ಶಿಬಿರಗಳನ್ನು ಪ್ರಾರಂಭಿಸಲಿದ್ದಾರೆ.

ಗೌತಮ್ ಗಂಭೀರ್ ಫೌಂಡೇಷನ್ ಮಾಹಿತಿ ಪ್ರಕಾರ, ಖಾಸಗಿ ಆಸ್ಪತ್ರೆಗಳ ಸಹಯೋಗದಲ್ಲಿ ಕ್ಯಾಂಪ್‌ಗಳನ್ನು ಆಯೋಜಿಸಲಾಗುವುದು. ಅದರಿಂದಲೇ ಎಲ್ಲ ಖರ್ಚುಗಳನ್ನು ಭರಿಸಲಾಗುವುದು ಎಂದಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಗೌತಮ್ ಗಂಭೀರ್, ನಾವು ಸೋಮವಾರದಿಂದ ಕೋವಿಡ್ ಉಚಿತ ವ್ಯಾಕ್ಸಿನೇಷನ್ ಶಿಬಿರಗಳನ್ನು ಹಮ್ಮಿಕೊಂಡಿದ್ದೇವೆ. ದೆಹಲಿಯ ಜನತೆಗೆ ಸಂಪೂರ್ಣವಾಗಿ ಲಸಿಕೆ ಲಭ್ಯವಾಗುವ ವರೆಗೂ ನಾವು ಈ ಶಿಬಿರಗಳನ್ನು ಮುಂದುವರಿಸುತ್ತೇವೆ. ನಮ್ಮ ಸಹಾಯಾರ್ಥ ಸಂಸ್ಥೆಯು ಈ ಹಿಂದೆಯೂ ಜನರಿಗೆ ನೆರವಾಗಿದ್ದು, ದೆಹಲಿ ಜನತೆಯ ಪ್ರಾಣ ಉಳಿಸುವ ವರೆಗೂ ನಮ್ಮ ಹೋರಾಟ ಮುಂದುವರಿಯಲಿದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ದೆಹಲಿಯಲ್ಲಿ ಲಾಕ್‌ಡೌನ್ ಸಡಿಲಿಕೆ: ಸಮ–ಬೆಸ ಸಂಖ್ಯೆಯಲ್ಲಿ ತೆರೆಯಲು ಅವಕಾಶ

ಸ್ಲಮ್ ಕ್ಲಸ್ಟರ್‌ಗಳಲ್ಲೂ ಶಿಬಿರಗಳನ್ನು ಪ್ರಾರಂಭಿಸಲಾಗುವುದು ಎಂದು ಗಂಭೀರ್ ತಿಳಿಸಿದ್ದಾರೆ.

ನಾವು ವ್ಯಾಕ್ಸಿನೇಷನ್ ಶಿಬಿರಗಳನ್ನು ವಿಸ್ತರಿಸಲಿದ್ದೇವೆ. ಅದನ್ನು ಕ್ಲಸ್ಟರ್‌ಗಳಿಗೂ ಒಯ್ಯಲಿದ್ದೇವೆ. ಮೊಬೈಲ್ ವ್ಯಾಕ್ಸಿನೇಷನ್ ವ್ಯಾನ್ ಮೂಲಕ ಕ್ಲಸ್ಟರ್‌ನಲ್ಲಿ ಜನರಿಗೆ ಲಸಿಕೆ ಹಾಕಿಸಲಿದ್ದೇವೆ. ಪ್ರತಿ ಭಾನುವಾರವೂ ಈ ಸೌಲಭ್ಯ ದೊರಕಲಿವೆ. ಅಗತ್ಯವಿದ್ದರೆ ಸೇವೆಯನ್ನು ಮತ್ತಷ್ಟು ಹೆಚ್ಚಿಸಲಿದ್ದೇವೆ ಎಂದಿದ್ದಾರೆ.

ಸದ್ಯ 45 ವರ್ಷ ಮೇಲ್ಪಟ್ಟವರಿಗೆ ಶಿಬಿರವನ್ನು ಆಯೋಜಿಸಲಾಗುತ್ತಿದ್ದು, ಮುಂದಿನ ದಿನಗಳಲ್ಲಿ 18-44 ವರ್ಷ ವಯೋಮಾನದ ಜನರಿಗೂ ಲಸಿಕೆ ಹಾಕಿಸಿಕೊಳ್ಳಲಾಗುವುದು ಎಂದು ಗಂಭೀರ್ ವಿವರಿಸಿದ್ದಾರೆ.