ಭಾರತ–ಚೀನಾ ಗಡಿಯಲ್ಲಿ ವಿವಾದ: ಸೇನಾ ಕಮಾಂಡರ್ ಹಂತದಲ್ಲಿ ಮಾತುಕತೆ

ನವದೆಹಲಿ: ಭಾರತ ಮತ್ತು ಚೀನಾ ಗಡಿಯಲ್ಲಿ ಮೂಡಿರುವ ಉದ್ವಿಗ್ನ ಪರಿಸ್ಥಿತಿಯನ್ನು ಶಮನಗೊಳಿಸುವ ಕ್ರಮವಾಗಿ ಸೇನಾ ಕಮಾಂಡರ್‌ಗಳ ಹಂತದಲ್ಲಿ ಮಂಗಳವಾರ ಮತ್ತೊಂದು ಸುತ್ತಿನ ಮಾತುಕತೆ ನಡೆಯಿತು.

ಪೂರ್ವ ಲಡಾಖ್‌ನಲ್ಲಿ ಗಡಿ ನಿಯಂತ್ರಣ ರೇಖೆಯ ಭಾರತೀಯ ಭೂಭಾಗದಲ್ಲಿ ಇರುವ ಚುಶುಲ್ ನಲ್ಲಿ ಮಾತುಕತೆ ನಡೆದಿದ್ದು, ಪಾಂಗಾಂಗ್ ಸರೋವರ ವಿಷಯಕ್ಕೆ ಸಂಬಂಧಿಸಿದಂತೆ ನಿರ್ದಿಷ್ಟವಾಗಿ ಮಾತುಕತೆ ನಡೆಯುತ್ತಿದೆ ಎಂದು ಮೂಲಗಳು ತಿಳಿಸಿವೆ.

ಪಾಂಗಾಂಗ್ ಸರೋವರ ಸಮೀಪ ಯಥಾಸ್ಥಿತಿಯಯನ್ನು ಉಲ್ಲಂಘಿಸಲು ಚೀನಾ ಸೈನಿಕರು ಮುಂದಾಗಿದ್ದರಿಂದ ಪರಿಸ್ಥಿತಿ ಉದ್ವಿಗ್ನಗೊಂಡಿತ್ತು.

ಇದನ್ನೂ ಓದಿ: ಬೇರೆ ದೇಶಗಳ ಒಂದಿಂಚು ಪ್ರದೇಶವನ್ನೂ ನಾವು ಆಕ್ರಮಿಸಿಲ್ಲ ಎಂದ ಚೀನಾ

ಚೀನಾ ಸೇನೆಯು ಮತ್ತೊಮ್ಮೆ ಯಥಾಸ್ಥಿತಿ ನಿಯಮ ಉಲ್ಲಂಘಿಸಿ, ಗಡಿ ಭಾಗದತ್ತ ಮುಂದುವರಿದಿತ್ತು. ಆದರೆ, ಈ ಯತ್ನವನ್ನು ಭಾರತೀಯ ಸೇನೆ ವಿಫಲಗೊಳಿಸಿತ್ತು.

ಉಭಯ ಮುಖಂಡರ ನಡುವೆ ಸೋಮವಾರ ಸುಮಾರು ಆರು ಗಂಟೆ ಕಾಲ ಮಾತುಕತೆ ನಡೆದಿದ್ದರೂ, ಯಾವುದೇ ಫಲಶ್ರುತಿ ಹೊರಬಿದ್ದಿರಲಿಲ್ಲ.

ಇದನ್ನೂ ಓದಿ: ಪಾಂಗಾಂಗ್‌ ಸರೋವರದ ಬಳಿ ಚೀನಾ ಸೇನೆಯಿಂದ ಮತ್ತೆ ಯಥಾಸ್ಥಿತಿ ಉಲ್ಲಂಘನೆ: ಭಾರತ

ಚೀನಾ ಸೇನಯ ಈ ಯತ್ನದಿಂದಾಗಿ ಭಾರತೀಯ ಸೇನೆಯು ಗಡಿಯಲ್ಲಿ ತನ್ನ ಸಾಮರ್ಥ್ಯವನ್ನು ಇನ್ನಷ್ಟು ಬಲಪಡಿಸಿದೆ. ಸೇನೆ ಮುಖ್ಯಸ್ಥ ಎಂ.ಎಂ.ನರವಣೆ ಅವರೇ ಒಟ್ಟಾರೆ ಪರಿಸ್ಥಿತಿಯನ್ನು ಅವಲೋಕಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.