ಕರ್ನಾಟಕದಲ್ಲೂ ಇದ್ದವು ಚೀತಾ

ಬೆಂಗಳೂರು: ಚೀತಾಗಳು ಈ ಹಿಂದೆ ಕರ್ನಾಟಕದಲ್ಲೂ ಇದ್ದವು ಎನ್ನುತ್ತವೆ ಐತಿಹಾಸಿಕ ದಾಖಲೆಗಳು ಮತ್ತು ಸಾಹಿತ್ಯ ಕೃತಿಗಳು. 2019ರ ಜುಲೈನಲ್ಲಿ ಪ್ರಕಟವಾಗಿರುವ ಬಾಂಬೆ ನ್ಯಾಚುರಲ್ ಹಿಸ್ಟರಿ ಸೊಸೈಟಿಯ ಜರ್ನಲ್‌ನಲ್ಲಿ ಈ ಬಗ್ಗೆ ಉಲ್ಲೇಖಿಸಲಾಗಿದೆ. 

ಬಾಂಬೆ ನ್ಯಾಚುರಲ್ ಹಿಸ್ಟರಿಯ ಜರ್ನಲ್‌ನಲ್ಲಿ ದಿವ್ಯಭಾನು ಸಿಂಹ ಮತ್ತು ರಾಜಾ ಕಾಸ್ಮಿ ಅವರು ಬರೆದಿರುವ ಲೇಖನದಲ್ಲಿ ಕರ್ನಾಟಕದಲ್ಲಿ ಚೀತಾ ಗಳಿದ್ದ ಬಗ್ಗೆ ಉಲ್ಲೇಖಿಸಿದ್ದಾರೆ. ಮೈಸೂರಿನ ಟಿಪ್ಪು ಸುಲ್ತಾನ್‌ ಒಟ್ಟು 16 ಚೀತಾಗಳನ್ನು ಸಾಕಿದ್ದ ಎಂದು ಈ ಲೇಖನದಲ್ಲಿ ಉಲ್ಲೇಖಿಸಲಾಗಿದೆ.

ಕೇಂದ್ರ ಅರಣ್ಯ ಸಚಿವಾಲಯವು ಸಿದ್ಧಪಡಿಸಿರುವ ‘ಪ್ರಾಜೆಕ್ಟ್‌ ಚೀತಾ’ ವರದಿಯಲ್ಲೂ, ಈ ಹಿಂದೆ ಕರ್ನಾಟಕದಲ್ಲಿ ಚೀತಾಗಳಿದ್ದವು ಎಂದು ಉಲ್ಲೇಖಿಸಲಾಗಿದೆ. ಈ ವರದಿಯಲ್ಲಿ ರಾಜ್ಯದ ಯಾವ ಭಾಗಗಳಲ್ಲಿ ಚೀತಾಗಳಿದ್ದವು ಎಂಬುದನ್ನು ಗುರುತಿಸಲಾಗಿದೆ. ಕೇಂದ್ರ ಅರಣ್ಯ ಸಚಿವಾಲಯದ ‘ಭಾರತಕ್ಕೆ ಚೀತಾಗಳ ಮರುಪರಿಚಯ ಕಾರ್ಯ ಯೋಜನೆ’ ವರದಿಯಲ್ಲೂ ಈ ಬಗ್ಗೆ ಉಲ್ಲೇಖಿಸಲಾಗಿದೆ. ಕರ್ನಾಟಕದಲ್ಲೂ ಚೀತಾಗಳ ಆವಾಸಕ್ಕೆ ಯೋಗ್ಯವಾದ ಪರಿಸರವಿರುವ ಪ್ರದೇಶಗಳಿವೆ ಎಂದು ಗುರುತಿಸಲಾಗಿದೆ. ಕರ್ನಾಟಕ, ಆಂಧ್ರಪ್ರದೇಶ ಮತ್ತು ತೆಲಂಗಾಣದ ಗಡಿಯಲ್ಲಿ ಇಂತಹ ಪ್ರದೇಶವಿದೆ ಎಂದು ನಕ್ಷೆಯಲ್ಲಿ ಗುರುತಿಸಲಾಗಿದೆ.