ಗಾಂಧೀಜಿ ಅವರ ಆರೋಗ್ಯ ಹಾಗೂ ಅನುಕೂಲಕ್ಕಾಗಿ ಅವರಿಗೆ ತಿಂಗಳಿಗೆ ₹100 ಭತ್ಯೆ ನೀಡಲು ಬ್ರಿಟಿಷರು (ಬಾಂಬೆ ಸರ್ಕಾರ) ನಿರ್ಧರಿಸಿದ್ದರು. ಆದರೆ, ಗಾಂಧೀಜಿ ಅವರು ಬ್ರಿಟಿಷರ ಭತ್ಯೆಯನ್ನು ನಿರಾಕರಿಸಿದ್ದರು. ಈ ಸಂಬಂಧ ಬ್ರಿಟಿಷರಿಗೆ ಅವರು ಪತ್ರವನ್ನೂ ಬರೆದಿದ್ದರು. ಈ ಪತ್ರವು ‘ದಿ ಕಲೆಕ್ಟೆಡ್‌ ವರ್ಕ್‌ ಆಫ್‌ ಮಹಾತ್ಮ ಗಾಂಧಿ ವಾಲ್ಯುಮ್‌ 49’ ಪುಸ್ತಕದಲ್ಲಿ ಮುದ್ರಿತವಾಗಿದೆ. ಜೊತೆಗೆ, ಬ್ರಿಟಿಷರು ಗಾಂಧೀಜಿ ಅವರಿಗೆ ಮಾತ್ರವೇ ಇಂಥ ಭತ್ಯೆ ನೀಡುವ ನಿರ್ಧಾರ ಮಾಡಿರಲಿಲ್ಲ. ಇನ್ನು ಹಲವು ಸ್ವಾತಂತ್ರ್ಯ ಹೋರಾಟಗಾರರಿಗೆ ಇದೇ ರೀತಿ ಭತ್ಯೆಯನ್ನು ನೀಡುತ್ತಿದ್ದರು. ಆದ್ದರಿಂದ, ಇಡೀ ಪ್ರಕರಣದ ಅರ್ಧವನ್ನು ಮಾತ್ರವೇ ಹಂಚಿಕೊಂಡು, ಗಾಂಧೀಜಿ ಅವರು ಬ್ರಿಟಿಷರಿಂದ ಪಿಂಚಣಿ ಪಡೆದುಕೊಳ್ಳುತ್ತಿದ್ದರು ಎಂಬುದು ಸುಳ್ಳು ಸುದ್ದಿ ಎಂದು ‘ಲಾಜಿಕಲಿ ಫ್ಯಾಕ್ಟ್ಸ್‌’ ಫ್ಯಾಕ್ಟ್‌ಚೆಕ್‌ ಪ್ರಕಟಿಸಿದೆ.
