ಜಮ್ಮು–ಕಾಶ್ಮೀರ ವಿಧಾನಸಭೆ ಚುನಾವಣೆ: ಒಮರ್, ಮೆಹಬೂಬಾ ಜಟಾಪಟಿ ಜೋರು

ಒಂದು ಕಾಲದಲ್ಲಿ ಗುಪ್ಕರ್‌ ಮೈತ್ರಿಕೂಟದ ಅಂಗಪಕ್ಷಗಳಾಗಿದ್ದ ಎನ್‌ಸಿ ಹಾಗೂ ಪಿಡಿಪಿ, ಈಗ ಪರಸ್ಪರರ ವಿರುದ್ಧ ಬಿರು ಮಾತಿನ ಪ್ರಹಾರ ಆರಂಭಿಸಿವೆ. ಜಮ್ಮು–ಕಾಶ್ಮೀರದ ಪ್ರಸಕ್ತ ಸನ್ನಿವೇಶಕ್ಕೆ ಪಿಡಿಪಿ ವಿರುದ್ಧ ಎನ್‌ಸಿ ದೂರುತ್ತಿದ್ದರೆ, ಎನ್‌ಸಿ ಕಾರಣ ಎಂದು ಪಿಡಿಪಿ ವಾಗ್ದಾಳಿ ನಡೆಸುತ್ತಿದೆ.

ಅಬ್ದುಲ್ಲಾಗಳು ಕುಟುಂಬ ರಾಜಕಾರಣ ಮಾಡುತ್ತಿದ್ದಾರೆ ಎಂದು ಟೀಕಿಸಿದ್ದ ಮೆಹಬೂಬಾ ಮುಫ್ತಿ ವಿರುದ್ಧ ಪರೋಕ್ಷ ವಾಗ್ದಾಳಿ ನಡೆಸಿರುವ ಒಮರ್‌, ‘ನಮ್ಮ ವಿರುದ್ಧ ಕುಟುಂಬ ರಾಜಕಾರಣದ ಆರೋಪ ಮಾಡುತ್ತಿರುವವರು ತಮ್ಮ ಸಂಬಂಧಿಕರನ್ನೇ ಚುನಾವಣಾ ಕಣಕ್ಕಿಳಿಸಿದ್ಧಾರೆ’ ಎಂದು ಹರಿಹಾಯ್ದಿದ್ದಾರೆ.

‘ಅವರು ನಿಜವಾಗಿಯೂ ಕುಟುಂಬ ರಾಜಕಾರಣದ ವಿರುದ್ಧ ಇದ್ದಲ್ಲಿ, ತಮ್ಮ ಕುಟುಂಬದವರ ಬದಲಾಗಿ ಬೇರೆಯವರಿಗೆ ಅವಕಾಶ ನೀಡಬೇಕಿತ್ತು’ ಎಂದು ಮೆಹಬೂಬಾ ವಿರುದ್ಧ ಪರೋಕ್ಷ ಟೀಕೆ ಮಾಡಿದ್ದಾರೆ.

ಮೆಹಬೂಬಾ ಅವರ ಪುತ್ರಿ ಇಲ್ತಿಜಾ ಅವರು ಪಿಡಿಪಿ ಅಭ್ಯರ್ಥಿಯಾಗಿದ್ದಾರೆ.

ತಮ್ಮ ವಿರುದ್ಧದ ಟೀಕೆಗಳಿಗೆ ಪ್ರತಿಕ್ರಿಯಿಸಿರುವ ಮೆಹಬೂಬಾ, ‘ಪ್ರತಿ ಬಾರಿಯೂ ಚುನಾವಣೆಗಳ ಸಮಯದಲ್ಲಿ ನ್ಯಾಷನಲ್‌ ಕಾನ್ಫರೆನ್ಸ್‌ ತನ್ನ ನಿಲುವುಗಳನ್ನು ಬದಲಿಸುತ್ತಾ ಬಂದಿದೆ. ತಮ್ಮ ರಾಜಕೀಯ ಅನುಕೂಲಕ್ಕೆ ತಕ್ಕಂತೆ ಕೆಲವೊಮ್ಮೆ ಚುನಾವಣೆಗಳನ್ನು ‘ಹರಾಮ್‌’ ಎಂದರೆ, ಕೆಲವು ಬಾರಿ ‘ಹಲಾಲ್‌’ ಎಂಬುದಾಗಿ ಕರೆಯಲಾಗುತ್ತಿತ್ತು’ ಎಂದು ಒಮರ್‌ ಅವರಿಗೆ ತಿರುಗೇಟು ನೀಡಿದ್ದಾರೆ.