ಹಣ ಚಿಂದಿ ಮಾಡಿದ ಇಲಿಗಳು!

ತಿನ್ಸುಕಿಯಾದ ಲೈಪುಲಿ ಪ್ರದೇಶದಲ್ಲಿರುವ ಭಾರತೀಯ ಸ್ಟೇಟ್‌ ಬ್ಯಾಂಕ್‌ನ ಎಟಿಎಂನಲ್ಲಿ ಈ ಪ್ರಕರಣ ನಡೆದಿದೆ. ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಯಾಗುತ್ತಿದೆ.

ಎಟಿಎಂನಲ್ಲಿ ತಾಂತ್ರಿಕ ತೊಂದರೆ ಕಾಣಿಸಿಕೊಂಡಿದ್ದರಿಂದ ಮೂರು ವಾರಗಳಿಂದ ಸ್ಥಗಿತಗೊಂಡಿತ್ತು. ಇದನ್ನು ದುರಸ್ತಿ ಮಾಡಲು ಕಳೆದ ಗುರುವಾರ ತಂತ್ರಜ್ಞರು ಬಂದಾಗ ಅಚ್ಚರಿ ಕಾದಿತ್ತು. ₹2,000 ಮತ್ತು ₹500ರ ಚೂರು ಚೂರಾದ ನೋಟುಗಳು ಪತ್ತೆಯಾದವು. ಆದರೆ, ಇದರಲ್ಲೇ ಇದ್ದ ಉಳಿದ ₹17.10 ಲಕ್ಷಕ್ಕೆ ಯಾವುದೇ ರೀತಿಯ ಹಾನಿಯಾಗಿರಲಿಲ್ಲ.

ಪೊಲೀಸರು ತನಿಖೆ ನಡೆಸಿದಾಗ ಇಲಿಗಳೇ ಈ ಕೃತ್ಯವೆಸಗಿದ್ದು, ಯಾವುದೇ ರೀತಿಯ ದುಷ್ಕೃತ್ಯ ಕಂಡು ಬಂದಿಲ್ಲ ಎನ್ನುವುದು ದೃಢಪಟ್ಟಿತು. ಈ ಪ್ರಕರಣದ ಬಗ್ಗೆ ಭಾರತೀಯ ಸ್ಟೇಟ್‌ ಬ್ಯಾಂಕ್‌ ಆಂತರಿಕ ತನಿಖೆಗೆ ಆದೇಶ ನೀಡಿದೆ.