ಭೋಪಾಲ್‌/ಸಿಂಗ್ರೌಲಿ(ಮಧ್ಯಪ್ರದೇಶ): ಸಾರ್ವಜನಿಕ ಸಭೆಯೊಂದರಲ್ಲಿ ಮಹಿಳಾ ಸಿಬ್ಬಂದಿಯೊಬ್ಬರು ಉಪವಿಭಾಗಾಧಿಕಾರಿಯ (ಎಸ್‌ಡಿಎಂ) ಶೂಗಳ ಲೇಸ್‌ ಕಟ್ಟುತ್ತಿರುವ ಚಿತ್ರ ಹರಿದಾಡಿದ ಬೆನ್ನಲ್ಲೇ, ಉಪವಿಭಾಗಾಧಿಕಾರಿಯನ್ನು ವರ್ಗಾವಣೆ ಮಾಡಿ ಮುಖ್ಯಮಂತ್ರಿ ಮೋಹನ್ ಯಾದವ್ ಗುರುವಾರ ಆದೇಶಿಸಿದ್ದಾರೆ.
ಸಿಂಗ್ರೌಲಿ ಜಿಲ್ಲೆಯ ಚಿತ್ರಂಗಿಯಲ್ಲಿ ಜ.22ರಂದು ಹಮ್ಮಿಕೊಂಡಿದ್ದ ಧಾರ್ಮಿಕ ಕಾರ್ಯಕ್ರಮದಲ್ಲಿ ಈ ಘಟನೆ ನಡೆದಿದೆ. ಆರತಿ ಮಾಡುವುದಕ್ಕಾಗಿ ಚಿರಾವನ್ ಅವರು ಶೂ ಬಿಚ್ಚಿದ್ದರು. ನಂತರ, ಮಹಿಳಾ ಸಿಬ್ಬಂದಿಯೊಬ್ಬರು ಚಿರಾವನ್ ಅವರ ಶೂಲೇಸ್‌ ಕಟ್ಟಿದ್ದರು. ಇದರ ಚಿತ್ರಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡಿದ ನಂತರ ಯಾದವ್ ಕ್ರಮ ಕೈಗೊಂಡಿದ್ದಾರೆ.
ಭೋಪಾಲ್‌ನಲ್ಲಿ ನಡೆದ ಕಾರ್ಯಕ್ರಮ ಉದ್ದೇಶಿಸಿ ಮಾತನಾಡುವಾಗ ಈ ವಿಷಯ ಪ್ರಸ್ತಾಪಿಸಿದ ಮುಖ್ಯಮಂತ್ರಿ ಯಾದವ್, ‘ಉಪವಿಭಾಗಾಧಿಕಾರಿ ಚಿರಾವನ್ ಈ ಮೊದಲೇ ಗಾಯಗೊಂಡಿದ್ದರು. ಹೀಗಾಗಿ, ಅವರ ನೆರವಿಗೆ ಧಾವಿಸಿದ್ದ ಮಹಿಳಾ ಸಿಬ್ಬಂದಿ, ಅವರ ಶೂಲೇಸ್‌ ಕಟ್ಟಿದ್ದಾರೆ ಎಂದೂ ಗೊತ್ತಾಗಿದೆ. ಆದರೆ, ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡಿರುವ ಚಿತ್ರ ಒಳ್ಳೆಯ ಸಂದೇಶ ರವಾನಿಸುವುದಿಲ್ಲ’ ಎಂದಿದ್ದಾರೆ.
‘ಆ ಮಹಿಳೆ ಸ್ವ ಇಚ್ಛೆಯಿಂದಲೇ ಈ ಕಾರ್ಯ ಮಾಡಿದ್ದರು ಹಾಗೂ ಇಂತಹ ನಡೆ ಹಿಂದೆ ಯಾವುದೇ ದುರುದ್ದೇಶವೂ ಇರಲಿಲ್ಲ ಎಂಬುದು ಗೊತ್ತಿದೆ. ಆದರೆ, ಮಹಿಳೆಗೆ ಗೌರವ ನೀಡುವುದು ನನ್ನ ಸರ್ಕಾರದ ಪಾಲಿಗೆ ಬಹಳ ಮಹತ್ವದ ವಿಚಾರ’ ಎಂದು ಹೇಳಿದ್ದಾರೆ.
