ಗುರ್‌ಗಾಂವ್‌: ಪ್ರಧಾನಿ ನರೇಂದ್ರ ಮೋದಿಯವರು ಸೋಮವಾರ ದೇಶದಾದ್ಯಂತ ವಿವಿಧ ರಾಜ್ಯಗಳನ್ನು ಸಂಪರ್ಕಿಸುವ ₹1ಲಕ್ಷ ಕೋಟಿ ಮೊತ್ತದ 114 ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳನ್ನು ಉದ್ಘಾಟಿಸಿ ಶಂಕುಸ್ಥಾಪನೆ ನೆರವೇರಿಸಿದರು.
ಪ್ರಮುಖ ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳಲ್ಲಿ, ಹೆಗ್ಗುರುತಾಗಿರುವ ದ್ವಾರಕಾ ಎಕ್ಸ್‌ಪ್ರೆಸ್‌ವೇಯ ಹರಿಯಾಣ ವಿಭಾಗವನ್ನೂ ಮೋದಿ ಉದ್ಘಾಟಿಸಿದರು.
ದ್ವಾರಕಾ ಎಕ್ಸ್ಪ್ರೆಸ್ ವೇನ ಉದ್ದ 29 ಕಿ.ಮೀ. ಅದರಲ್ಲಿ 18.9 ಕಿ.ಮೀ ದೂರ ಹರಿಯಾಣ ಮತ್ತು 10.1 ಕಿ.ಮೀ ದೂರ ದೆಹಲಿಯ ಭಾಗಕ್ಕೆ ಸೇರುತ್ತದೆ. ಈ ಎಕ್ಸ್ಪ್ರೆಸ್ ವೇ ನಿರ್ಮಾಣದಿಂದಾಗಿ ರಾಷ್ಟ್ರೀಯ ಹೆದ್ದಾರಿ (ಎನ್‌ಎಚ್‌) –48ರಲ್ಲಿ ಉಂಟಾಗುವ ಸಂಚಾರ ದಟ್ಟಣೆ ಸಮಸ್ಯೆಯನ್ನು ತಪ್ಪಿಸಬಹುದಾಗಿದೆ.
ದ್ವಾರಕಾ ಎಕ್ಸ್‌ಪ್ರೆಸ್‌ವೇ ಭಾರತದ ಮೊದಲ 8 ಲೇನ್‌ಗಳ ಎತ್ತರಿಸಿದ ನಗರ ಎಕ್ಸ್ಪ್ರೆಸ್ ವೇ ಆಗಿದ್ದು, ರಾಷ್ಟ್ರ ರಾಜಧಾನಿಯ ಜನದಟ್ಟಣೆಯನ್ನು ಕಡಿಮೆ ಮಾಡಲು ಎನ್‌ಸಿಆರ್‌ನಲ್ಲಿ ಕೇಂದ್ರದ ₹60 ಸಾವಿರ ಕೋಟಿ ಹೆದ್ದಾರಿ ಅಭಿವೃದ್ಧಿ ಯೋಜನೆಯ ಭಾಗವಾಗಿ ₹9,000 ಕೋಟಿ ವೆಚ್ಚದಲ್ಲಿ ನಿರ್ಮಿಸಲಾಗಿದೆ.
2019ರ ಮಾರ್ಚ್ 9 ರಂದು ಆಗಿನ ಕೇಂದ್ರ ಸಚಿವೆ ಸುಷ್ಮಾ ಸ್ವರಾಜ್‌, ಅರುಣ್‌ ಜೆಟ್ಲಿ ಮತ್ತು ನಿತಿನ್‌ ಗಡ್ಕರಿ ಅವರು ದ್ವಾರಕಾ ಎಕ್ಸ್ಪ್ರೆಸ್ ವೇ ಗೆ ಅಡಿಗಲ್ಲು ಇಟ್ಟಿದ್ದರು.
