ಚೆನ್ನೈ: ತಮಿಳುನಾಡು ಸರ್ಕಾರವು ಸೋಮವಾರ ಬಜೆಟ್‌ ಮಂಡನೆ ಮಾಡಿದ್ದು, ಸಾಮಾಜಿಕ ನ್ಯಾಯ ಮತ್ತು ಮಹಿಳಾ ಸಬಲೀಕರಣ ಸೇರಿದಂತೆ ‘ತಮಿಳರ ಅಭಿವೃದ್ಧಿಗೆ 7 ಗುರಿಗಳನ್ನು’ ಸಾಕಾರಗೊಳಿಸಲು ಹಲವು ಯೋಜನೆಗಳನ್ನು ಘೋಷಿಸಿದೆ.
ಹಣಕಾಸು ಸಚಿವ ತಂಗಮ್ ಥೆನ್ನರಸು ಅವರು ಕಾಗದ ರಹಿತ ಇ–ಬಜೆಟ್‌ ಮಂಡಿಸಿದ್ದು, ‘2024–25ನೇ ಸಾಲಿನಲ್ಲಿ ₹49,279 ಕೋಟಿ ಆದಾಯ ಕೊರತೆಯಾಗಲಿದೆ’ ಎಂದು ತಿಳಿಸಿದ್ದಾರೆ.
‘ಮಾಜಿ ಮುಖ್ಯಮಂತ್ರಿ ಎಮ್‌.ಕರುಣಾನಿಧಿ ಹೆಸರಲ್ಲಿ ವಸತಿ ಯೋಜನೆಯನ್ನು ರೂಪಿಸಲಾಗಿದೆ. 2030ರ ವೇಳೆ ಎಲ್ಲರಿಗೂ ಸೂರು ಒದಗಿಸುವ ನಿಟ್ಟಿನಲ್ಲಿ ಗ್ರಾಮೀಣ ಪ್ರದೇಶದಲ್ಲಿ 8 ಲಕ್ಷ ಮನೆಗಳನ್ನು ನಿರ್ಮಿಸುವ ಗುರಿ ಹೊಂದಲಾಗಿದೆ. ಇದಕ್ಕಾಗಿ ₹3,500 ಕೋಟಿ ಮೀಸಲಿರಿಸಲಾಗಿದೆ ’ ಎಂದು ತಿಳಿಸಿದರು.
‘₹3,48,289 ಕೋಟಿ ಕಂದಾಯ ವೆಚ್ಚವಿದ್ದು, ₹1,08,690 ಕೋಟಿ ವಿತ್ತೀಯ ಕೊರತೆ ಆಗಲಿದೆ. ಇದು ಜಿಎಸ್‌ಡಿಪಿಯ ಶೇ 3.44 ರಷ್ಟಿರಲಿದೆ’ ಎಂದು ತಿಳಿಸಿದ್ದಾರೆ.
‘ರಸ್ತೆ ಸೇರಿದಂತೆ ಇನ್ನಿತರ ಮೂಲಭೂತ ಸೌಕರ್ಯಗಳಿಗಾಗಿ ₹300 ಕೋಟಿ ಮೀಸಲಿರಿಸಲಾಗಿದೆ’ ಎಂದು ಹೇಳಿದರು.
