ಬತ್ತಿದ ನದಿಗೆ ರೈತರಿಂದ ನೀರು: ಪ್ರಾಣಿ ಪಕ್ಷಿಗಳ ನೀರಿನ ದಾಹ ತಣಿಸಲು ನೆರವು

ತಾಲ್ಲೂಕಿನ ಸಂಗೂರು ಗ್ರಾಮದ ಭುವನೇಶ್ವರ ಶಿಡ್ಲಾಪುರ ಅವರು ತಮ್ಮ ಜಮೀನಿನಲ್ಲಿ ಮಾರ್ಚ್‌ 5ರಂದು ಹೊಸ ಕೊಳವೆಬಾವಿ ಕೊರೆಸಿ, ಅದರಲ್ಲಿ ಸಿಕ್ಕ ನೀರನ್ನು ವರದಾ ನದಿಗೆ ಬಿಡುವ ಕಾರ್ಯದಲ್ಲಿ ನಿರತರಾಗಿದ್ದಾರೆ.

ಜಿಲ್ಲೆಯ ‘ವರದಾ’ ನದಿ ಜೂನ್‌ನಿಂದ ಜನವರಿಯವರೆಗೆ ಮಾತ್ರ ಹರಿಯುತ್ತದೆ. ಮಳೆ ಕೊರತೆಯಿಂದ ನದಿಯ ಒಡಲು ಮೂರು ತಿಂಗಳಿನಿಂದ ಬರಿದಾಗಿದೆ. ಸಂಗೂರು ಗ್ರಾಮದಲ್ಲಿನ ಬ್ಯಾರೇಜ್ ಬಳಿಯೂ ನೀರು ಖಾಲಿಯಾಗಿದೆ. ಅದಕ್ಕೆ ಭುವನೇಶ್ವರ ಅವರು ಒಂದು ತಿಂಗಳಿನಿಂದ ನಿತ್ಯ 6 ಗಂಟೆ ನದಿಗೆ ನೀರು ಹರಿಸುತ್ತಾರೆ.

‘ಹೊಳೆದಂಡೆಯಲ್ಲಿ ನನಗೆ 20 ಎಕರೆ ಜಮೀನಿದೆ. ಕಬ್ಬು, ಅಡಿಕೆ, ಮೆಕ್ಕೆಜೋಳ ಬೆಳೆಯಲು ಎರಡು ಕೊಳವೆಬಾವಿಗಳ ನೀರು ಬಳಸುತ್ತಿದ್ದೆ. ಬೇಸಿಗೆಯಲ್ಲಿ ನೀರು ಕಡಿಮೆ ಆಗಬಹುದೆಂದು ಹೊಸ ಕೊಳವೆಬಾವಿ ಕೊರೆಸಿದೆ. 5 ಇಂಚು ನೀರು ಸಿಕ್ಕಿತು. ಹೊಲಕ್ಕೆ ಬರುತ್ತಿದ್ದ ಕೃಷ್ಣಮೃಗ, ನವಿಲು, ಕೋತಿ, ನರಿ, ಪಕ್ಷಿಗಳ ಬಾಯಾರಿಕೆ ತಣಿಯಿತು. ಪಶು–ಪಕ್ಷಿಗಳ ನೀರಿನ ದಾಹ ತೀರಿಸಲು ವರದಾ ನದಿಗೆ ನೀರು ಹರಿಸುತ್ತಿರುವೆ’ ಎಂದು ಭುವನೇಶ್ವರ ಶಿಡ್ಲಾಪುರ ತಿಳಿಸಿದರು.  

12 ವರ್ಷಗಳಿಂದ ನೀರಿನ ಸೇವೆ: ಹಾನಗಲ್‌ ತಾಲ್ಲೂಕಿನ ಕೂಡಲ ಗ್ರಾಮದ ಕೃಷಿ ಪತ್ತಿನ ಸಹಕಾರ ಸಂಘದ ಕಾರ್ಯದರ್ಶಿ ಪುಟ್ಟಪ್ಪ ಸೊಪ್ಪಿನ 12 ವರ್ಷಗಳಿಂದ ಬೇಸಿಗೆ ವೇಳೆ ತಮ್ಮ ಕೊಳವೆಬಾವಿಯಿಂದ ವರದಾ ನದಿಗೆ ನೀರು ಹರಿಸುತ್ತಾರೆ.

‘2012ರ ಬೇಸಿಗೆಯಲ್ಲಿ ನೀರಿನ ಸಮಸ್ಯೆ ಉಂಟಾಗಿತ್ತು. ಆಗ ಹೊಳೆದಂಡೆಯಲ್ಲಿನ ನಮ್ಮ ಹೊಲದ ಕೊಳವೆಬಾವಿಯಿಂದ ವರದಾ ನದಿಗೆ ನೀರು ಹರಿಸಿದೆ. ದನ ಕರು, ಪಶು–ಪಕ್ಷಿಗಳು ಬಾಯಾರಿಕೆ ನೀಗಿಸಿಕೊಳ್ಳಲು ನದಿ ಬಳಿ ಬರತೊಡಗಿದವು. ಆದ್ದರಿಂದ ನಾನು ಪ್ರತಿ ಬೇಸಿಗೆಯಲ್ಲೂ ನೀರು ಹರಿಸುತ್ತಿರುವೆ’ ಎಂದು ರೈತ ಪುಟ್ಟಪ್ಪ ಸೊಪ್ಪಿನ ತಿಳಿಸಿದರು. 

‘ವರದಾ ನದಿಯ ಗುಂಡಿಗಳಲ್ಲಿ ನೀರು ತುಂಬಿದ್ದರಿಂದ ಹೊಳೆ ದಂಡೆಯಲ್ಲಿರುವ ಗ್ರಾಮಸ್ಥರು ದನ ಕರುಗಳಿಗೆ ಕುಡಿಯಲು, ಮೈ ತೊಳೆಯಲು, ಬಟ್ಟೆ ಒಗೆಯಲು, ವಾಹನಗಳನ್ನು ತೊಳೆಯಲು ನೀರು ಬಳಸುತ್ತಿದ್ದಾರೆ’ ಎಂದರು.