ಸಿ.ಎಂ– ಡಿಸಿಎಂ ಕೈಯಲ್ಲಿ ‘ಸ್ಯಾಂಟೋಸ್‌ ಕಾರ್ಟಿಯರ್’: ಮತ್ತೆ ದುಬಾರಿ ವಾಚ್ ಸದ್ದು

ಸ್ವಿಡ್ಜರ್ಲೆಂಡ್‌ನ ಸ್ಯಾಂಟೋಸ್‌ ಕಾರ್ಟಿಯರ್ ಕಂಪನಿಯು ವಾಚ್‌ ಆಭರಣ ಬ್ಯಾಗ್‌ ಸೆಂಟ್‌ ಸೇರಿದಂತೆ ದುಬಾರಿ ಬೆಲೆಯ ಲೈಫ್‌ಸ್ಟೈಲ್ ಉತ್ಪನ್ನಗಳನ್ನು ತಯಾರಿಸುತ್ತದೆ. ಈ ಕಂಪನಿಯ ವಾಚ್‌ನ ಬೆಲೆ ಸರಿಸುಮಾರು ₹4 ಲಕ್ಷದಿಂದ ಆರಂಭವಾಗಿ ₹2.5 ಕೋಟಿಯವರೆಗೂ ಇದೆ. ಸಿದ್ದರಾಮಯ್ಯ ಅವರ ಕೈಯಲ್ಲಿದ್ದ ವಾಚ್‌ನ ಬೆಲೆ ₹43 ಲಕ್ಷ ಎಂದು ವಿರೋಧ ಪಕ್ಷಗಳು ಆರೋಪಿಸಿವೆ.  ಆದರೆ ಈ ಬಗ್ಗೆ ಸಿದ್ದರಾಮಯ್ಯ ಹಾಗೂ ಅವರ ಸಚಿವಾಲಯ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

‘ಸಿದ್ದರಾಮಯ್ಯನವರೇ ಸಮಾಜವಾದದ ನಿಮ್ಮ ವ್ಯಾಖ್ಯಾನಕ್ಕೆ ಹೆಚ್ಚಿನ ಬೆಲೆ ಬಂದಂತೆ ಕಾಣುತ್ತಿದೆ. ಕರ್ನಾಟಕದ ಜನರು ಬರ ಮತ್ತು ಮೂಲಸೌಕರ್ಯ ಸಮಸ್ಯೆಯಿಂದಾಗಿ ಪರದಾಡುತ್ತಿದ್ದಾರೆ. ಆದರೆ ನಮ್ಮ ‘ಸರಳ ಸಮಾಜವಾದಿ’ ಮುಖ್ಯಮಂತ್ರಿ ಸ್ಯಾಂಟೋಸ್ ಡಿ ಕಾರ್ಟಿಯರ್ ವಾಚ್ ಧರಿಸಿ ಅದನ್ನು ಪ್ರದರ್ಶಿಸುತ್ತಿದ್ದಾರೆ’ ಎಂದು ಬಿಜೆಪಿ ‘ಎಕ್ಸ್‌’ ಮಾಡಿದೆ.

‘ಹೇಳಿಕೊಳ್ಳುವುದು ನಾನೊಬ್ಬ ಸಮಾಜವಾದಿ. ಅಸಲಿಗೆ ದೊಡ್ಡ ಮಜಾವಾದಿ. ಅಂದು ₹ 70 ಲಕ್ಷಕ್ಕೂ ಹೆಚ್ಚು ಬೆಲೆ ಬಾಳುವ ‘ಹ್ಯೂಬ್ಲೊ ವಾಚ್‌’ ಕಟ್ಟಿ ಟೀಕೆಗೆ ಗುರಿಯಾಗಿದ್ದರು. ಇಂದು ಅವರ ಕೈಯಲ್ಲಿ ಚಿನ್ನದಿಂದ ತಯಾರಿಸಿದ ಕಾರ್ಟಿಯರ್‌ ಬ್ರ್ಯಾಂಡ್‌ನ ₹ 43 ಲಕ್ಷ ಬೆಲೆ ಬಾಳುವ ಐಷಾರಾಮಿ ವಾಚ್‌. ಸಿದ್ದರಾಮಯ್ಯ ಅವರೇ, ಸಮಾಜವಾದದ ಬಗ್ಗೆ ಬೊಗಳೆ ಭಾಷಣ ಮಾಡಲು ನಿಮಗೆ ಯಾವ ನೈತಿಕತೆ ಇದೆ’ ಎಂದು ಜೆಡಿಎಸ್‌ ‘ಎಕ್ಸ್‌’ ಮಾಡಿ ಟೀಕಿಸಿದೆ.