ನಕ್ಸಲ್‌ ಪ್ರಕರಣಗಳಿಗೆ ವಿಶೇಷ ನ್ಯಾಯಾಲಯ: ಸರ್ಕಾರಕ್ಕೆ ಶಿಫಾರಸು

 ಭೂಗತರಾಗಿದ್ದ 15 ನಕ್ಸಲರು, ಸರ್ಕಾರ ಶರಣಾಗತಿ ಪ್ಯಾಕೇಜ್‌ ಘೋಷಿಸಿದ ನಂತರ ಶರಣಾಗಿದ್ದರು. ಅವರಲ್ಲಿ 14 ಮಂದಿ ಜಾಮೀನಿನ ಮೇಲೆ ಹೊರಗೆ ಬಂದಿದ್ದಾರೆ. ಒಬ್ಬ ಮಹಿಳೆ ಜೈಲಿನಲ್ಲೇ ಇದ್ದಾರೆ. ಒಂದು ದಶಕವಾದರೂ ಅವರಿಗೆ ಜಾಮೀನು ದೊರೆತಿಲ್ಲ. ಪ್ರಕರಣಗಳ ವಿಚಾರಣೆಯೂ ಪೂರ್ಣ
ಗೊಂಡಿಲ್ಲ. ಜಾಮೀನಿನ ಮೇಲೆ ಹೊರಗೆ ಬಂದ ಕೆಲವರ ಮೇಲಿದ್ದ ಪ್ರಕರಣಗಳು ಖುಲಾಸೆಯಾಗಿದ್ದರೆ, ಇನ್ನೂ ಹಲವರ ಮೇಲಿನ ಪ್ರಕರಣಗಳ ವಿಚಾರಣೆ ವಿವಿಧ ನ್ಯಾಯಾಲಯಗಳಲ್ಲಿ ನಡೆಯುತ್ತಿವೆ. 

ಶರಣಾಗತರಾದ ನಕ್ಸಲರನ್ನು ಸಮಾಜದ ಮುಖ್ಯವಾಹಿನಿಗೆ ತರಲು ಸರ್ಕಾರ ವಿಶೇಷ ಪ್ಯಾಕೇಜ್‌ ಘೋಷಿಸಿತ್ತು. ನಕ್ಸಲ್ ಚಳವಳಿಯಲ್ಲಿದ್ದ ರಾಜ್ಯದವರು, ಹೊರ ರಾಜ್ಯದವರ ಅವರ ಚಟುವಟಿಕೆ, ಮೊಕದ್ದಮೆಗಳ ಆಧಾರದಲ್ಲಿ ಮೂರು ವರ್ಗಗಳಾಗಿ ವಿಂಗಡಿಸಿ, ₹2 ಲಕ್ಷದಿಂದ ₹5 ಲಕ್ಷದವರೆಗೆ ನಗದು, ಕೃಷಿ ಮಾಡಲು ಬಯಸುವವರಿಗೆ ತಲಾ ಎರಡು ಎಕರೆ ಜಮೀನು, ವಿವಿಧ ವೃತ್ತಿಪರ ತರಬೇತಿ ಪಡೆಯಲು ಬಯಸುವವರಿಗೆ ಒಂದು ವರ್ಷದವರೆಗೆ ಪ್ರತಿ ತಿಂಗಳು ತಲಾ ₹5,000 ನೆರವು ನಿಗದಿ ಮಾಡಿತ್ತು. ಅಂದು ಮೊದಲ ಕಂತು ನೀಡಿದ್ದ ಸರ್ಕಾರ ಉಳಿದದ್ದನ್ನು ಈವರೆಗೆ ಪಾವತಿಸಿಲ್ಲ. ಕೆಲವರಿಗೆ ಜಮೀನು ಮಂಜೂರಾದರೂ ಅರಣ್ಯ ಕಾಯ್ದೆ, ಭೂ ಮಂಜೂರಾತಿ ಮತ್ತಿತರ ಕಾರಣಗಳಿಂದ ಭೂ ಒಡೆತನವೂ ಸಿಕ್ಕಿಲ್ಲ.

ಪ್ರಮುಖ ನಕ್ಸಲರು ಹತ್ಯೆಯಾಗಿ, ಕೆಲವರು ಶರಣಾಗತರಾಗಿದ್ದರೂ, ರಾಜ್ಯದಲ್ಲಿ ನಕ್ಸಲ್‌ ಚಟುವಟಿಕೆ ಸಂಪೂರ್ಣ ಸ್ಥಗಿತವಾಗಿಲ್ಲ. ಇನ್ನೂ ಭೂಗತರಾಗಿರುವವರಿಗೆ ಶರಣಾಗಲು ರಾಜ್ಯ ಸರ್ಕಾರ ಮತ್ತೆ ಅವಕಾಶ ಮಾಡಿಕೊಟ್ಟಿದೆ. ಶರಣಾಗತಿ ಮತ್ತು ಪುನರ್ವಸತಿ ಯೋಜನೆಯನ್ನೂ ಪರಿಷ್ಕರಿಸಿದೆ. ಸ್ವಾವಲಂಬಿ ಬದುಕಿಗಾಗಿ ವೃತ್ತಿಪರ ತರಬೇತಿ ಪಡೆಯಲು ಇದ್ದ ಒಂದು ವರ್ಷದ ಮಿತಿಯನ್ನು ಎರಡು ವರ್ಷಗಳಿಗೆ ವಿಸ್ತರಿಸಿದೆ. ನಗದು ನೆರವನ್ನೂ ಹೆಚ್ಚಿಸಿದೆ.