ಪೆಶಾವರ| ಆತ್ಮಾಹುತಿ ದಾಳಿ, 40 ಸಾವು

ಇಲ್ಲಿನ ಬಜೌರ್ ಖರ್‌ನಲ್ಲಿ ಜಮೈತ್‌ ಉಲೆಮಾ ಇ ಇಸ್ಲಾಂ ಫಜ್ಲ್ (ಜೆಯುಐ–ಎಫ್‌) ಪಕ್ಷದ ಸಭೆಯಲ್ಲಿ ಸ್ಫೋಟ ಸಂಭವಿಸಿತು. 200ಕ್ಕೂ ಅಧಿಕ ಜನರು ಗಾಯಗೊಂಡಿದ್ದು, ಕೆಲವರ ಸ್ಥಿತಿ ಗಂಭೀರವಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಭದ್ರತಾ ಸಿಬ್ಬಂದಿ ಸ್ಥಳವನ್ನು ಸುತ್ತುವರಿದಿದ್ದಾರೆ. ಸ್ಫೋಟದ ಸ್ವರೂಪವನ್ನು ಪರಿಶೀಲಿಸಲಾಗುತ್ತದೆ. ಇದೊಂದು ಆತ್ಮಾಹುತಿ ಸ್ಫೋಟ ಕೃತ್ಯ ಎಂದು ಹೇಳಲಾಗಿದೆ ಎಂದು ಪ್ರಾಥಮಿಕ ವರದಿಗಳು ತಿಳಿಸಿವೆ.

ಯಾವುದೇ ಸಂಘಟನೆಯು ಇದುವರೆಗೂ ಸ್ಫೋಟದ ಹೊಣೆಯನ್ನು ಹೊತ್ತುಕೊಂಡಿಲ್ಲ ಎಂದು ಮಲಕ್ಕಾಡ್‌ ವಲಯದ ಡಿಐಜಿ ಮೆಹಮೂದ್‌ ಸಟ್ಟಿ ತಿಳಿಸಿದರು.  

‘ಸ್ಫೋಟ ಸಂಭವಿಸಿದಾಗ ಸಭೆಯಲ್ಲಿ ಸುಮಾರು 500 ಜನರು ಸೇರಿದ್ದರು. ಸ್ಥಳಕ್ಕೆ ಐದು ಆಂಬುಲೆನ್ಸ್‌ಗಳು ಧಾವಿಸಿವೆ’ ಎಂದು ರಕ್ಷಣಾ ಸಹಾಯವಾಣಿ 1122ರ ವಕ್ತಾರ ಬಿಲಾಲ್‌ ಫೈಜಿ ಅವರು ತಿಳಿಸಿದ್ದಾರೆ.

ಜೆಯುಐ–ಎಫ್‌ ಮುಖ್ಯಸ್ಥ ಮೌಲಾನಾ ಫಜ್ಲುರ್‌ ರೆಹಮಾನ್ ಅವರು, ಪ್ರಧಾನಿ ಶೆಹಬಾಜ್‌ ಷರೀಫ್‌ ಮತ್ತು ಉಸ್ತುವಾರಿ ಪ್ರಧಾನಿ ಅಜಂ ಖಾನ್ ಅವರಿಗೆ ಕೃತ್ಯದ ಸಮಗ್ರ ತನಿಖೆಗೆ ಆಗ್ರಹಪಡಿಸಿದ್ದಾರೆ.

ಪಕ್ಷದ ಕಾರ್ಯಕರ್ತರು ನೊಂದವರ ನೆರವಿಗಾಗಿ ಆಸ್ಪತ್ರೆಗೆ ಧಾವಿಸಬೇಕು ಹಾಗೂ ಶಾಂತಿ ಕಾಯ್ದುಕೊಳ್ಳಬೇಕು. ಸರ್ಕಾರ ಗಾಯಾಳುಗಳಿಗೆ ಉತ್ತಮ ಚಿಕಿತ್ಸೆಯನ್ನು ಒದಗಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಕೃತ್ಯವನ್ನು ಖಂಡಿಸಿರುವ ಪಕ್ಷದ ಇನ್ನೊಬ್ಬ ಮುಖಂಡ ಹಫೀಜ್‌ ಹಮ್‌ದುಲ್ಹಾ ಅವರು, ‘ಇದು ಜಿಹಾದ್ ಅಲ್ಲ, ಭಯೋತ್ಪಾದನೆಯ ಕೃತ್ಯ ಎಂದಷ್ಟೇ ಇದರ ಹಿಂದಿರುವವರಿಗೆ ಹೇಳಲು ಬಯಸುತ್ತೇನೆ’ ಎಂದು ಪ್ರತಿಕ್ರಿಯಿಸಿದರು.