ಪಪುವಾ ನ್ಯೂಗಿನಿಯಲ್ಲಿ ಭೂಕಂಪ: ಕನಿಷ್ಠ ಮೂವರು ಸಾವು

ಪೂರ್ವ ಸೆಪಿಕ್‌ ಪ್ರಾಂತ್ಯದ ಅಂಬುಂಟಿ ಪಟ್ಟಣದ ಬಳಿ ಭಾನುವಾರ ಸುಮಾರು 6.30ಕ್ಕೆ ಭೂಕಂಪ ಸಂಭವಿಸಿದೆ. ಸುಮಾರು 40 ಕಿ.ಮೀ. ಆಳದಲ್ಲಿ ಭೂಕಂಪದ ಕೇಂದ್ರಬಿಂದು ಪತ್ತೆಯಾಗಿದೆ.

‘ಮಾರ್ಚ್‌ ಆರಂಭದಲ್ಲಿ ಸಂಭವಿಸಿದ್ದ ಪ್ರವಾಹದಿಂದ ಈ ಪ್ರದೇಶವು ತತ್ತರಿಸಿತ್ತು. ಈ ಪ್ರದೇಶದಲ್ಲಿ ಪ್ರವಾಹ ಪರಿಸ್ಥಿತಿಯು ಸಾಮಾನ್ಯವಾದ್ದರಿಂದ ಜನರು ಅದಕ್ಕೆ ತಯಾರಿರುತ್ತಾರೆ. ಆದರೆ, ಭೂಕಂಪವು ಇಲ್ಲಿಯ ಜನರಿಗೆ ಹೊಸದು. ಇದು ಹೆಚ್ಚಿನ ಹಾನಿ ಉಂಟುಮಾಡಿರುವ ಸಾಧ್ಯತೆ ಇದೆ’ ಎಂದು ಪೂರ್ವ ಸೆಪಿಕ್‌ ಗವರ್ನರ್‌ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.   

ಕಳೆದ ವರ್ಷ ಏಪ್ರಿಲ್‌ನಲ್ಲೂ ಪಪುವಾ ನ್ಯೂಗಿನಿಯಲ್ಲಿ ಎರಡು ಬಾರಿ ಪ್ರಬಲ ಭೂಕಂಪಗಳು ಸಂಭವಿಸಿದ್ದವು.