ಆಸ್ಕರ್‌: ‘ಅನೋರಾ’ ಅತ್ಯುತ್ತಮ ಚಿತ್ರ

ಇಸ್ರೇಲ್‌ ಮತ್ತು ಪ್ಯಾಲೆಸ್ಟೀನ್‌ ಸಂಘರ್ಷದಿಂದ ಎದುರಾದ ಸಂಕಷ್ಟಗಳನ್ನು ಅನಾವರಣಗೊಳಿಸುವ 'ನೋ ಅದರ್ ಲ್ಯಾಂಡ್‌' ಚಿತ್ರವು ಅತ್ಯುತ್ತಮ ಸಾಕ್ಷ್ಯಚಿತ್ರ ವಿಭಾಗದಲ್ಲಿ ಪ್ರಶಸ್ತಿ ಗಿಟ್ಟಿಸಿದೆ. ಪ್ಯಾಲಿಸ್ಟೀನ್‌ ಹೋರಾಟಗಾರ ಬಸೇಲ್‌ ಆದ್ರಾ ಇಸ್ರೇಲಿ ಪತ್ರಕರ್ತ ಯುವಾಲ್‌ ಅಬ್ರಾಹಂ ಅವರು ಜೊತೆಯಾಗಿ ಸುಮಾರು ಐದು ವರ್ಷಗಳು ಶ್ರಮಿಸಿ ಈ ಸಾಕ್ಷ್ಯಚಿತ್ರ ನಿರ್ಮಿಸಿದ್ದಾರೆ. ಮಿಲಿಟರಿ ತರಬೇತಿಯ ಮೈದಾನಕ್ಕಾಗಿ ಇಸ್ರೇಲಿ ಯೋಧರು ಮನೆಗಳನ್ನು ಕೆಡುವುದು ಸೇರಿದಂತೆ ಸಂಘರ್ಷದಿಂದ ಜನರು ಅನುಭವಿಸಿದ ಪರಿಸ್ಥಿತಿಗಳನ್ನು ಚಿತ್ರದಲ್ಲಿ ಬಿಂಬಿಸಲಾಗಿದೆ. ‘ನೋ ಅದರ್ ಲ್ಯಾಂಡ್‌ ವಾಸ್ತವ ಸಂಗತಿಗಳನ್ನು ಬಿಚ್ಚಿಟ್ಟಿದೆ. ಗಾಜಾದಲ್ಲಿ ಜನರ ಮೇಲೆ ನಡೆಯುತ್ತಿರುವ ದೌರ್ಜನ್ಯಗಳು ನಿಲ್ಲಬೇಕು. ಗಾಜಾ ಮತ್ತು ಇಸ್ರೇಲ್‌ನ ಸಂಘರ್ಷವನ್ನು ಜಗತ್ತು ಅಂತ್ಯಗೊಳಿಸಬೇಕು. ಆದರೆ ಅಮೆರಿಕವು ತಡೆಯೊಡ್ಡುತ್ತಿದೆ’ ಎಂದು ನಿರ್ದೇಶಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ನವದೆಹಲಿ (ಪಿಟಿಐ): ‘ಬೆಸ್ಟ್‌ ಲೈವ್‌ ಆಕ್ಷನ್‌ ಶಾರ್ಟ್‌ ಫಿಲ್ಮ್‌’ ವಿಭಾಗದಲ್ಲಿ ನಾಮನಿರ್ದೇಶನಗೊಂಡಿದ್ದ ಕಿರುಚಿತ್ರ ‘ಅನುಜಾ’ಗೆ ಆಸ್ಕರ್‌ ಪ್ರಶಸ್ತಿ ಕೈತಪ್ಪಿದೆ. ಈ ವಿಭಾಗದಲ್ಲಿ 'ಐ ಆ್ಯಮ್‌ ನಾಟ್‌ ಟ ರೊಬೋಟ್‌' ಆಯ್ಕೆಯಾಗಿದೆ.  ಆಡಂ ಜೆ ಗ್ರೇವ್ಸ್‌ ಮತ್ತು ಸುಚಿತ್ರಾ ಮಟ್ಟೈ ಅವರು ‘ಅನುಜಾ’ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಬಾಲ ಕಾರ್ಮಿಕ ಪದ್ಧತಿ ಸಮಸ್ಯೆ ಬಗ್ಗೆ ಗಮನ ಸೆಳೆಯುತ್ತದೆ. ಎರಡು ಬಾರಿ ಆಸ್ಕರ್‌ ವಿಜೇತ ನಿರ್ಮಾಪಕ ಗುನೀತ್‌ ಮೊಂಗಾ ಮತ್ತು ನಟಿ ಪ್ರಿಯಾಂಕಾ ಚೋಪ್ರಾ ಕಾರ್ಯನಿರ್ವಾಹಕ ನಿರ್ಮಾಪಕರಾಗಿದ್ದು ಹಾಲಿವುಡ್‌ನ ಪ್ರಸಿದ್ಧ ಲೇಖಕ ಮಿಂಡಿ ಕಾಲಿಂಗ್‌ ನಿರ್ಮಾಪಕರಾಗಿದ್ದಾರೆ.