Israel Hamas | 14 ಒತ್ತೆಯಾಳು; 42 ಕೈದಿಗಳ ಬಿಡುಗಡೆ ಇಂದು ಎಂದ ಇಸ್ರೇಲ್

ಜೆರುಸಲೇಮ್: ಹಮಾಸ್ ಹಾಗೂ ಇಸ್ರೇಲ್‌ ನಡುವೆ ನಾಲ್ಕು ದಿನಗಳ ಕದನ ವಿರಾಮ ಆರಂಭಗೊಂಡಿದ್ದು, ಒಪ್ಪಂದದಂತೆ ಗಾಜಾ ಪಟ್ಟಿಯಲ್ಲಿ ವಶಕ್ಕೆ ಪಡೆಯಲಾದ 14 ಒತ್ತೆಯಾಳುಗಳು ಹಾಗೂ 42 ಪ್ಯಾಲೆಸ್ಟೀನ್ ಕೈದಿಗಳನ್ನು ಬಿಡುಗಡೆ ಮಾಡಲಾಗುವುದು ಎಂದು ಇಸ್ರೇಲ್ ಹೇಳಿದೆ.

ನಾಲ್ಕು ದಿನಗಳ ಕದನ ವಿರಾಮದ ಎರಡನೇ ದಿನವಾದ ಶನಿವಾರ ಈ 42 ಜನರನ್ನು ಬಿಡುಗಡೆ ಮಾಡುವ ಭರವಸೆಯನ್ನು ಇಸ್ರೇಲ್ ನೀಡಿದೆ. ಇದರಲ್ಲಿ ಪುರುಷರು ಹಾಗೂ ಮಹಿಳೆಯರು ಇದ್ದಾರೆ.

ಹಮಾಸ್ ಹಾಗೂ ಇಸ್ರೇಲ್‌ ನಡುವಿನ ಈ ಒಪ್ಪಂದದನ್ವಯ 3 ಹಾಗೂ 1ರ ಅನುಪಾತದಲ್ಲಿ ಒತ್ತೆಯಾಳುಗಳ ಬಿಡುಗಡೆ ಪ್ರಕ್ರಿಯೆ ನಡೆಯಲಿದೆ. ಅಂದರೆ ಹಂತ, ಹಂತವಾಗಿ ಹಮಾಸ್‌ ಬಂಡುಕೋರರಿಂದ 50 ಒತ್ತೆಯಾಳುಗಳ ಬಿಡುಗಡೆ ಹಾಗೂ ಪ್ರತಿಯಾಗಿ ಇಸ್ರೇಲ್‌ನಿಂದ 150 ಪ್ಯಾಲೆಸ್ಟೀನ್‌ ಕೈದಿಗಳ ಬಿಡುಗಡೆ ಕುರಿತಂತೆ ಒಪ್ಪಂದ ಆಗಿತ್ತು. 

ಇಸ್ರೇಲ್-ಹಮಾಸ್ ನಡುವೆ ನಾಲ್ಕು ದಿನಗಳ ಕದನ ವಿರಾಮ ಆರಂಭದ ನಂತರ 13 ಇಸ್ರೇಲಿ ಹಾಗೂ 12 ಥಾಯ್‌ ಒತ್ತಾಳುಗಳು ಸೇರಿದಂತೆ ಒಟ್ಟು 25 ಜನರನ್ನು ಹಮಾಸ್ ಶುಕ್ರವಾರ ಬಿಡುಗಡೆ ಮಾಡಿತ್ತು. ಬಿಡುಗಡೆಯಾದವರಲ್ಲಿ ಮಕ್ಕಳು ಹಾಗು ಮಹಿಳೆಯರು ಸೇರಿದ್ದಾರೆ.