ಲಂಡನ್‌: ಸಾಂಕ್ರಾಮಿಕ ರೋಗ ಕೋವಿಡ್‌ ಚಿಕಿತ್ಸೆಗಾಗಿ ‘ಮೆರ್ಕ್ ಮತ್ತು ರಿಡ್ಜ್‌ಬ್ಯಾಕ್ ಬಯೋಥೆರಪ್ಯೂಟಿಕ್ಸ್’ ಸಂಸ್ಥೆಗಳು ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ಮಾತ್ರೆಯ ಬಳಕೆಗೆ ಬ್ರಿಟನ್ ಅನುಮೋದನೆ ನೀಡಿದೆ.
ಕೋವಿಡ್‌ ವಿರುದ್ಧದ ಮಾತ್ರೆಗೆ ಅನುಮೋದನೆ ನೀಡಿದ ಮೊದಲ ದೇಶವಾಗಿ ಬ್ರಿಟನ್ ಹೊರಹೊಮ್ಮಿದೆ.
ಕೋವಿಡ್‌ ಪಾಸಿಟಿವ್‌ ಮತ್ತು ರೋಗ ಲಕ್ಷಣಗಳು ಕಂಡು ಬಂದ ಐದು ದಿನಗಳ ಒಳಗಾಗಿ ‘ಮೊಲ್‌ನಪಿರವಿರ್’ ಎಂಬ ಹೆಸರಿನ ಈ ಔಷಧವನ್ನು ಬಳಸಬೇಕು ಎಂದು ‘ಮೆಡಿಸಿನ್ಸ್ ಅಂಡ್ ಹೆಲ್ತ್‌ಕೇರ್ ಪ್ರಾಡಕ್ಟ್ ರೆಗ್ಯುಲೇಟರಿ ಏಜೆನ್ಸಿ (ಎಂಎಚ್‌ಆರ್‌ಎ)’ ಶಿಫಾರಸು ಮಾಡಿದೆ.
ಈ ಔಷಧವನ್ನು ಯಾವ ಸಮಯದಲ್ಲಿ, ಹೇಗೆ ನೀಡಬೇಕು ಎಂಬುದನ್ನು ಸರ್ಕಾರ ಮತ್ತು ರಾಷ್ಟ್ರೀಯ ಆರೋಗ್ಯ ಸೇವೆ ತಿಳಿಸಲಿದೆ.
ಈ ವರ್ಷದ ಅಂತ್ಯದ ವೇಳೆಗೆ ಔಷಧಿಯ ಒಂದು ಕೋಟಿ ಕೋರ್ಸ್‌ಗಳನ್ನು ಉತ್ಪಾದಿಸುವ ನಿರೀಕ್ಷೆಯಿದೆ. 2022ರ ವೇಳೆಗೆ ಕನಿಷ್ಠ 2 ಕೋಟಿ ಕೋರ್ಸ್‌ ತಯಾರಿಸಲು ಉದ್ದೇಶಿಸಲಾಗುತ್ತಿದೆ ಎಂದು ಔಷಧ ತಯಾರಿಕಾ ಸಂಸ್ಥೆ ‘ಮೆರ್ಕ್’ ಹೇಳಿದೆ.
