ಶುಕ್ರವಾರ, ಡಿಸೆಂಬರ್ 4, 2020
22 °C

ಚುರುಮುರಿ: ಪಟಾಕಿ ಫಜೀತಿ

ಮಣ್ಣೆ ರಾಜು Updated:

ಅಕ್ಷರ ಗಾತ್ರ : | |

ಪಟಾಕಿ ಮಾರಾಟ ನಿಷೇಧ–ಪ್ರಾತಿನಿಧಿಕ ಚಿತ್ರ

ಪಟಾಕಿ ಚೀಟಿ ಪದ್ಮಾ, ಪಟಾಕಿ ಜೊತೆ ರೇಷ್ಮೆ ಸೀರೆ ಗಿಫ್ಟ್ ತಂದು ಸುಮಿಗೆ ಕೊಟ್ಟಳು.

‘ಈ ಪಟಾಕಿ ಬೇಡ, ಹಸಿರು ಪಟಾಕಿ ಕೊಡು’ ಎಂದಳು ಸುಮಿ.

‘ಬೇಕಾದ್ರೆ ಹಸಿರು ಕಲರ್ ರೇಷ್ಮೆ ಸೀರೆ ಕೊಡ್ತೀನಿ, ಹಸಿರು ಪಟಾಕಿ ಕೊಡಕ್ಕಾಗಲ್ಲ’ ಅಂದಳು.

‘ಈ ಪಟಾಕಿ ವಾಪಸ್ ತಗೊಂಡು, ಅದರ ಬದಲು ರೇಷ್ಮೆ ಸೀರೆಯ ಬ್ಲೌಸ್‍ನ ಸ್ಟಿಚ್ಚಿಂಗ್ ಚಾರ್ಜ್ ಕೊಡಿ’ ಎಂದ ಶಂಕ್ರಿ.

‘ವಾಪಸ್ ತಗೊಳ್ಳೋಲ್ಲ, ಬೇಕಾದ್ರೆ ಪಟಾಕಿ ಹೊಡೆಯಿರಿ, ಇಲ್ಲಾಂದ್ರೆ ತಿಪ್ಪೆಗೆ ಸುರಿಯಿರಿ’ ಎಂದು ಪದ್ಮಾ ಸಿಟ್ಟಿನಿಂದ ಹೇಳಿ ಹೋದಳು.

ಶಂಕ್ರಿ ಮನೇಲಿ ಪಟಾಕಿ ಇರುವ ವಿಷಯ ತಿಳಿದು ನೆರೆಹೊರೆ ಜನ ಧಾವಿಸಿ ಬಂದರು.

‘ನಮ್ಮ ಏರಿಯಾದಲ್ಲಿ ಈ ಬಾರಿ ಪಟಾಕಿ ಹಚ್ಚಬಾರದು ಅಂತ ತೀರ್ಮಾನ ಮಾಡಿದ್ದೀವಿ. ಆದರೂ ನೀವು ಅಪಾಯಕಾರಿ ಪಟಾಕಿಯನ್ನು ಅಕ್ರಮವಾಗಿ ಸಂಗ್ರಹಿಸಿ, ಕದ್ದುಮುಚ್ಚಿ ಹೊಡೆಯಲು ಪ್ಲಾನ್ ಮಾಡ್ತಿದ್ದೀರಿ’ ಅಂತ ಒಬ್ಬ ರೇಗಿದ.

‘ಪಟಾಕಿಯನ್ನು ಕದ್ದುಮುಚ್ಚಿ ಹೊಡೆಯಲು ಸಾಧ್ಯನಾ? ಸೌಂಡ್ ಕೇಳಿಸುತ್ತಲ್ಲ...’ ಅಂದ ಶಂಕ್ರಿ.

‘ಅದೆಲ್ಲಾ ಗೊತ್ತಿಲ್ಲ, ಹಾನಿಕಾರಕ ಪಟಾಕಿಯನ್ನು ಕೂಡಲೇ ವಿಲೇವಾರಿ ಮಾಡಬೇಕು’ ಎಂದರು.

‘ಆಗಲಿಬಿಡಿ, ಊರಿನಿಂದ ಆಚೆ ತಗೊಂಡು ಹೋಗಿ ಸುಟ್ಟು ಬರ್ತೀವಿ’ ಅಂದಳು ಸುಮಿ.

‘ಸುಡಕೂಡದು, ಪಟಾಕಿ ಸುಟ್ಟರೆ ವಾಯುಮಾಲಿನ್ಯ, ಪರಿಸರ ನಾಶ ಆಗುತ್ತೆ’ ಅಂದ ಇನ್ನೊಬ್ಬ.

‘ಆಳುದ್ದ ಹಳ್ಳ ತೆಗೆದು ಮಣ್ಣಿನಲ್ಲಿ ಹೂತುಬಿಡ್ತೀವಿ’.

‘ಬೇಡ, ಮಣ್ಣೂ ಕಲುಷಿತವಾಗುತ್ತದೆ, ನೀರಿನಲ್ಲೂ ವಿಸರ್ಜನೆ ಮಾಡಬೇಡಿ, ನೀರು ಮಲಿನ ಆಗುತ್ತೆ... ಗಾಳಿ, ನೀರು, ಮಣ್ಣಿಗೆ ಸೋಂಕದಂತೆ ವಿಲೇವಾರಿ ಮಾಡಬೇಕು...’ ಎಂದು ಎಚ್ಚರಿಕೆ ಕೊಟ್ಟು ಹೋದರು.

ಮಡಿಲಲ್ಲಿ ಕೆಂಡ ಕಟ್ಟಿಕೊಂಡಂತೆ ಮನೇಲಿ ಪಟಾಕಿ ಇಟ್ಟುಕೊಂಡು ಶಂಕ್ರಿ, ಸುಮಿ ಕಂಗಾಲಾಗಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು