ಚುರುಮುರಿ: ಇ-ಟೆಂಡರ್, ಅರ್ಹ ರೆಬೆಲ್ ರಾಜಕಾರಣಿಗಳಿಂದ ಅರ್ಜಿ ಆಹ್ವಾನ

ಸರ್ಕಾರ ರಚನೆ ಮತ್ತು ಮಂತ್ರಿ ಪದವಿ ಹಂಚಿಕೆಯಲ್ಲಿ ಬಂಡಾಯ, ಬೆದರಿಕೆ, ಕಚ್ಚಾಟ ಗಳಲ್ಲಿ ಸಮಯ ವ್ಯರ್ಥವಾಗುತ್ತಾ ಅಕ್ರಮ ಸಂಪಾದನೆಗೆ ಹೆಚ್ಚು ಸಮಯ ದೊರೆಯುತ್ತಿಲ್ಲ. ಈ ಕಾರಣದಿಂದ ಬಂಡಾಯ ರಾಜಕಾರಣಿಗಳಿಗೆ ಅನುಕೂಲವಾಗುವಂತೆ ಹೊಸದಾಗಿ ಇ-ಎಂಎಲ್‍ಎ ಪೋರ್ಟಲ್ ಆರಂಭಿಸಲಾಗಿದೆ. ಬಂಡಾಯಗಾರರು ತಮ್ಮ ವಶದಲ್ಲಿರುವ ಜನಪ್ರತಿನಿಧಿಗಳ ಸಂಖ್ಯೆ, ಹೆಸರುಗಳ ಪೂರ್ಣ ವಿವರಗಳನ್ನು ಇ-ಟೆಂಡರ್ ಮೂಲಕ ದ್ವಿ ಲಕೋಟೆಯಲ್ಲಿ ಸಲ್ಲಿಸುವುದು. ಇಲಾಖೆಯು ಟೆಂಡರನ್ನು ಪರಿಶೀಲಿಸಿದ ನಂತರ ಮುಂದಿನ ಸರ್ಕಾರದಲ್ಲಿ ಪಕ್ಷದ ಮೂಲನಿವಾಸಿಗಳನ್ನು ಮೂಲೆಗುಂಪು ಮಾಡಿ ಇ-ರೆಬೆಲ್ ಶಾಸಕರಿಗೆ ಭಾರಿ ಖಾತೆಗಳನ್ನು ನೀಡಲಾಗುವುದು.

ರೆಬೆಲ್ ನಾಯಕರು ದೂರದ ರೆಸಾರ್ಟುಗಳಿಗೆ ಜನಪ್ರತಿನಿಧಿಗಳ ವಿಮಾನಯಾನದ ಖರ್ಚಿನ ಮಾಹಿತಿ, ಹೋಟೆಲ್ ವಾಸದಲ್ಲಿ ಊಟ–ಉಪಚಾರದ ವೆಚ್ಚ, ರೆಬೆಲ್ ಪ್ರತಿನಿಧಿ ನಿರೀಕ್ಷಿಸುವ ಈವಿಲ್ ಪರ್ಸೆಂಟೇಜ್, ಜನಪ್ರತಿನಿಧಿಗಳು ನಿರೀಕ್ಷಿಸುವ ತಲಾವಾರು ಮೊತ್ತ 100 ಕೋಟಿಯ ಒಳಗೆ ಇರುವಂತೆ ಸೂಚಿಸತಕ್ಕದ್ದು.

ಜನಪ್ರತಿನಿಧಿಗಳು ಮುಂದಿನ ಚುನಾವಣೆಯಲ್ಲಿ ತಮ್ಮ ಕುಟುಂಬಕ್ಕೆ ನಿರೀಕ್ಷಿಸುವ ಟಿಕೆಟುಗಳ ಸಂಖ್ಯೆ, ಮಂತ್ರಿ ಖಾತೆಗಳ ಸಂಖ್ಯೆಯನ್ನು ಎಗ್ಗು ತಗ್ಗಿಲ್ಲದೆ ನಮೂದಿಸಬಹುದು.

ಟೆಂಡರ್ ನಮೂನೆಗಳನ್ನು ಇ-ಎಂಎಲ್‍ಎ ರಾಜಕೀಯ ಪೋರ್ಟಲ್ಲಿನಿಂದ ಡೌನ್‍ಲೋಡ್ ಮಾಡಿಕೊಳ್ಳುವುದು. ಹೆಚ್ಚಿನ ವಿವರಗಳನ್ನು ಇಲಾಖೆ ಅಥವಾ ಪಕ್ಷದ ಕಚೇರಿಯಿಂದ ರಹಸ್ಯವಾಗಿ ಪಡೆಯಬಹುದು. ಸೂಕ್ತ ಟೆಂಡರು ಬಾರದಿದ್ದಲ್ಲಿ ಸಿಎಂ, ಮಂತ್ರಿ ಪದವಿಗಳನ್ನು ಬಹಿರಂಗ ಹರಾಜಿಗೆ ಇಡಲಾಗುವುದು.