ಸಂಪಾದಕೀಯ | ಮಾರ್ಗಸೂಚಿ ದರ ಪರಿಷ್ಕರಣೆ: ವಿಳಂಬವಾದರೂ ಸರಿಯಾದ ತೀರ್ಮಾನ

ವಾಸ್ತವದಲ್ಲಿ, ಇಂದು ಸ್ಥಿರಾಸ್ತಿಯು ಮಾರಾಟವಾಗುವ ನೈಜ ಮಾರುಕಟ್ಟೆ ಬೆಲೆಗೂ ಮಾರ್ಗಸೂಚಿ ದರಕ್ಕೂ ಬಹಳ ವ್ಯತ್ಯಾಸ ಇದೆ. ಮುದ್ರಾಂಕ ಶುಲ್ಕ ಹಾಗೂ ಬಂಡವಾಳ ವೃದ್ಧಿ ತೆರಿಗೆಯನ್ನು ಪಾವತಿಸುವುದು ಮಾರ್ಗಸೂಚಿ ದರವನ್ನು ಆಧರಿಸಿದೆ. ಸಚಿವ ಕೃಷ್ಣ ಬೈರೇಗೌಡ ಅವರು ಹೇಳಿರುವ ಪ್ರಕಾರ, ಬೆಂಗಳೂರಿನ ಎಲೆಕ್ಟ್ರಾನಿಕ್ ಸಿಟಿ ಹಾಗೂ ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಸ್ಥಿರಾಸ್ತಿಗಳ ಮಾರುಕಟ್ಟೆ ಬೆಲೆಯು ಮಾರ್ಗಸೂಚಿ ಬೆಲೆಗಿಂತ ಐನೂರು ಪಟ್ಟು ಹೆಚ್ಚಿದೆ. ರಾಷ್ಟ್ರೀಯ ಹೆದ್ದಾರಿ ಸಮೀಪದಲ್ಲಿ ಸ್ಥಿರಾಸ್ತಿಗಳ ಮಾರ್ಗಸೂಚಿ ಬೆಲೆಯು ಎಕರೆಗೆ ₹ 5 ಲಕ್ಷದಿಂದ ₹ 10 ಲಕ್ಷದವರೆಗೆ ಇದೆ. ಆದರೆ ಮಾರುಕಟ್ಟೆ ಬೆಲೆಯು ಎಕರೆಗೆ ₹ 10 ಕೋಟಿಗೂ ಹೆಚ್ಚಾಗಿದೆ. ಇಂತಹ ಕಡೆಗಳಲ್ಲಿ ಮಾರ್ಗಸೂಚಿ ದರವನ್ನು ಶೇಕಡ 50ರವರೆಗೆ ಹೆಚ್ಚಿಸಲಾಗುತ್ತಿದೆ. ಮಾರ್ಗಸೂಚಿ ದರ ಹಾಗೂ ಮಾರುಕಟ್ಟೆ ಬೆಲೆಯ ಮಧ್ಯದ ಮೊತ್ತವನ್ನು ಸಾಮಾನ್ಯವಾಗಿ ನಗದು ರೂಪದಲ್ಲಿ ಪಾವತಿ ಮಾಡಲಾಗುತ್ತಿದೆ.

ಇದು ಬಂಡವಾಳ ವೃದ್ಧಿ ತೆರಿಗೆ ಹಾಗೂ ಮುದ್ರಾಂಕ ಶುಲ್ಕದ ವಂಚನೆಗೆ ಕಾರಣವಾಗುತ್ತಿದೆ. ಸ್ಥಿರಾಸ್ತಿಗಳ ಮಾರಾಟ ನಡೆದಾಗ ಅದರ ಮಾರಾಟ ಬೆಲೆಯನ್ನು ಕಡಿಮೆ ಮಟ್ಟದಲ್ಲಿ ತೋರಿಸುತ್ತಿರುವುದರ ಪರಿಣಾಮವಾಗಿ ಕಪ್ಪುಹಣದ ಸೃಷ್ಟಿಯಾಗುತ್ತಿದೆ ಎಂದು ಆದಾಯ ತೆರಿಗೆ ಇಲಾಖೆಯು ಮತ್ತೆ ಮತ್ತೆ ಹೇಳಿದೆ. ಈ ವಹಿವಾಟುಗಳಲ್ಲಿ ಆಸ್ತಿ ಖರೀದಿ ಮಾಡುವವರು ಕಪ್ಪುಹಣವನ್ನು ಸ್ಥಿರಾಸ್ತಿಗಳಲ್ಲಿ ತೊಡಗಿಸುತ್ತಿದ್ದಾರೆ. ಅಂದರೆ, ಆಸ್ತಿ ಮಾರಾಟ ಮಾಡುವವರು ಹಣಕಾಸು ವ್ಯವಸ್ಥೆಯ ಲೆಕ್ಕಕ್ಕೇ ಸಿಗದ ಹಣವನ್ನು ಪಡೆದುಕೊಳ್ಳುತ್ತಿದ್ದಾರೆ.

ಮಾರ್ಗಸೂಚಿ ದರವನ್ನು ಹೆಚ್ಚು ಮಾಡಿರುವ ಕಾರಣ ಮುದ್ರಾಂಕ ಶುಲ್ಕವೂ ಹೆಚ್ಚಾಗುತ್ತದೆ. ಹೀಗಾಗಿ ಸ್ಥಿರಾಸ್ತಿಗಳ ಬೆಲೆ ತುಸು ಹೆಚ್ಚಳವಾಗುವುದು ಸಹಜ. ಹೀಗಿದ್ದರೂ, ಮಾರ್ಗಸೂಚಿ ದರವನ್ನು ಪರಿಷ್ಕರಿಸಿರುವುದರಲ್ಲಿ ರಾಜ್ಯದ, ರಿಯಲ್ ಎಸ್ಟೇಟ್ ವಲಯದ ಮತ್ತು ಆಸ್ತಿ ಖರೀದಿದಾರರ ಹಿತ ಇದೆ. ಏಕೆಂದರೆ, ದರ ಪರಿಷ್ಕರಣೆಯ ಕಾರಣದಿಂದಾಗಿ ಕಪ್ಪುಹಣದ ಚಲಾವಣೆಯ ಮೇಲೆ ನಿಯಂತ್ರಣ ಹೇರಲು ಸಾಧ್ಯವಾಗುತ್ತದೆ, ಸರ್ಕಾರದ ವರಮಾನ ಹೆಚ್ಚಾಗುತ್ತದೆ ಹಾಗೂ ವಹಿವಾಟುಗಳಲ್ಲಿ ಒಂದಿಷ್ಟು ಪಾರದರ್ಶಕತೆ ಬರುತ್ತದೆ.