ಸಂಪಾದಕೀಯ | ನಾವೀನ್ಯ: ಕ್ರಮಿಸಬೇಕಾದ ಹಾದಿ ಇನ್ನೂ ಬಹು ದೂರವಿದೆ

ದೇಶದಲ್ಲಿ ನಾವೀನ್ಯವು ಇಷ್ಟೊಂದು ಸದ್ದು ಮಾಡಲು ನವೋದ್ಯಮಗಳೇ ಕಾರಣ. ಅದರಲ್ಲೂ ಕರ್ನಾಟಕದಲ್ಲಿ ನವೋದ್ಯಮಗಳ ಬೆಳವಣಿಗೆಗೆ ‍ಪೂರಕವಾದ ವಾತಾವರಣ ಇದೆ.ತಂತ್ರಜ್ಞಾನ ಮತ್ತು ಮಾನವ ಸಂಪನ್ಮೂಲದ ವಿಷಯದಲ್ಲಿಯೂ ಬೇರೆ ರಾಜ್ಯಗಳಿಗಿಂತ ಶ್ರೀಮಂತವಾಗಿದೆ. 2016–17ರಲ್ಲಿ 733ರಷ್ಟಿದ್ದ ನವೋದ್ಯಮಗಳು 2020–21ರ ವೇಳೆಗೆ 67,128ಕ್ಕೆ ತಲುಪಿವೆ. ಕೋವಿಡ್‌ ಪೀಡಿತ ವರ್ಷಗಳಲ್ಲೂ ಶಿಕ್ಷಣ ಸೇರಿದಂತೆ ಕೆಲವು ಕ್ಷೇತ್ರಗಳು ನಾವೀನ್ಯದಿಂದಾಗಿ ಅತ್ಯಧಿಕ ಲಾಭ ಪಡೆದಿವೆ. ಹೊಸ ಆವಿಷ್ಕಾರಗಳಿಂದ ಆ ಕ್ಷೇತ್ರಗಳಲ್ಲಿ ಭಾರಿ ಬದಲಾವಣೆಗಳೂ ಆಗಿವೆ. ಆದರೆ,ಜಾಗತಿಕ ನಾವೀನ್ಯ ಸೂಚ್ಯಂಕದಲ್ಲಿ ಭಾರತದ ಸ್ಥಾನ ಗಮನಿಸಿದರೆ ಅಭಿವೃದ್ಧಿಯ ಹಾದಿಯಲ್ಲಿ ಅದು ಇನ್ನೂ ಬಹಳಷ್ಟು ದೂರ ಕ್ರಮಿಸಬೇಕಾಗಿದೆ. 2021ರ ಸೂಚ್ಯಂಕದಲ್ಲಿ ನಮ್ಮ ದೇಶ 46ನೇ ಸ್ಥಾನದಲ್ಲಿದೆ. ಅತ್ಯಧಿಕ ಜನಸಂಖ್ಯೆಯ ವಿಚಾರದಲ್ಲಿ ಇನ್ನೇನು ಚೀನಾವನ್ನು ಹಿಂದಿಕ್ಕಲಿರುವ ಭಾರತ,ಅಷ್ಟೊಂದು ಜನಸಂಖ್ಯೆಗೆ ಸಕಲ ಸೌಲಭ್ಯಗಳನ್ನು ಕಲ್ಪಿಸಲು ಪ್ರತಿಯೊಂದು ಕ್ಷೇತ್ರದಲ್ಲಿಯೂ ನಾವೀನ್ಯದೊಂದಿಗೆ ದಾಪುಗಾಲು ಹಾಕಬೇಕಿದೆ.

ಜಾಗತಿಕ ನಾವೀನ್ಯ ಸೂಚ್ಯಂಕದ ಮೊದಲ 25 ರಾಷ್ಟ್ರಗಳಲ್ಲಿ ತಾನೂ ಒಂದಾಗಬೇಕು ಎಂಬ ಕನಸನ್ನೇನೋ ಭಾರತ ಕಾಣುತ್ತಿದೆ. ಅದಕ್ಕೆ ಏನೇನು ಮಾಡಬೇಕು ಎಂಬುದನ್ನೂ ನೀತಿ ಆಯೋಗದ ವರದಿಯಲ್ಲಿ ಪಟ್ಟಿ ಮಾಡಲಾಗಿದೆ. ಸಂಶೋಧನೆ ಮತ್ತು ಅಭಿವೃದ್ಧಿಗಾಗಿ ವ್ಯಯಿಸುತ್ತಿರುವ ನಿವ್ವಳ ಆಂತರಿಕ ವೆಚ್ಚದ (ಜಿಡಿಇಆರ್‌ಡಿ) ಪ್ರಮಾಣವನ್ನು ಹೆಚ್ಚಿಸಬೇಕು ಎನ್ನುವುದು ಅವುಗಳಲ್ಲಿ ಒಂದು. ಸಂಶೋಧನೆ ಮತ್ತು ಅಭಿವೃದ್ಧಿಗಾಗಿ ಸದ್ಯ ಖರ್ಚು ಮಾಡುತ್ತಿರುವ ಪ್ರಮಾಣವು ನಿವ್ವಳ ಆಂತರಿಕ ಉತ್ಪನ್ನದ (ಜಿಡಿಪಿ) ಶೇ 0.7ರಷ್ಟು ಮಾತ್ರ. ಆ ಪ್ರಮಾಣವನ್ನು ಕನಿಷ್ಠ ಶೇ 2ಕ್ಕೆ ಹೆಚ್ಚಿಸಬೇಕು ಎಂದು ವರದಿ ಒತ್ತಾಯಿಸುತ್ತದೆ. ಕೈಗಾರಿಕಾ ವಲಯಕ್ಕೆ ಅಗತ್ಯವಿರುವ ಪ್ರತಿಭಾವಂತರ ಪ್ರಮಾಣ ಹಾಗೂ ಈಗ ಶಿಕ್ಷಣ ಸಂಸ್ಥೆಗಳಿಂದ ಸಿಗುತ್ತಿರುವ ಪ್ರತಿಭಾವಂತರ ಪ್ರಮಾಣದ ನಡುವೆ ಇರುವ ಅಂತರವನ್ನು ಕಡಿಮೆ ಮಾಡಬೇಕು ಎನ್ನುವ ಶಿಫಾರಸನ್ನೂ ಮಾಡಲಾಗಿದೆ. ಸಂಶೋಧನೆ ಮತ್ತು ಅಭಿವೃದ್ಧಿ ಕ್ಷೇತ್ರದಲ್ಲಿ ಖಾಸಗಿ ಪಾಲುದಾರಿಕೆ ಎಷ್ಟೊಂದು ಮಹತ್ವದ್ದು ಎನ್ನುವುದು ಅಮೆರಿಕ ಮತ್ತು ದಕ್ಷಿಣ ಕೊರಿಯಾದಲ್ಲಿ ನಡೆದಿರುವ ಬೆಳವಣಿಗೆಗಳನ್ನು ನೋಡಿದರೆ ಗೊತ್ತಾಗುತ್ತದೆ. ನಾವೀನ್ಯವನ್ನು ಉತ್ತೇಜಿಸಲು ವಿಶ್ವವಿದ್ಯಾಲಯಗಳು,ಕೈಗಾರಿಕೆಗಳು,ನಿಯಂತ್ರಣಾ ಪ್ರಾಧಿಕಾರಗಳು ಒಟ್ಟಾಗಿ ಕೆಲಸ ಮಾಡುವಂತಹ ಮತ್ತು ಸಮರ್ಪಕ ನೀತಿಗಳ ಮೂಲಕ ಈ ಸಂಶೋಧನಾ ಚಟುವಟಿಕೆಗಳಿಗೆ ಬೆಂಬಲವನ್ನೂ ನೀಡುವಂತಹ ವಾತಾವರಣ ನಿರ್ಮಿಸುವುದು ಅಗತ್ಯ.