ಬಜೆಟ್ ಚಿತ್ತ ಉದ್ಯೋಗ ಸೃಷ್ಟಿಯತ್ತ?

ಬದುಕು ಕಟ್ಟಿಕೊಳ್ಳುವ ಆಶಯದೊಂದಿಗೆ ಪ್ರತಿವರ್ಷ, ಜನಸಂಖ್ಯಾಧಾರಿತ ಲಾಭಾಂಶದ (ಡೆಮೊಗ್ರಾಫಿಕ್ ಡಿವಿಡೆಂಡ್‌) ಭಾಗವಾದ ಎರಡು ಕೋಟಿ ಯುವಜನರು ಉದ್ಯೋಗ ಮಾರುಕಟ್ಟೆ ಪ್ರವೇಶಿಸುತ್ತಿದ್ದಾರೆ. ಉದ್ಯೋಗಸಹಿತ ಅಭಿವೃದ್ಧಿಗೆ ದಾರಿ ಮಾಡಬಲ್ಲ ಬಜೆಟ್‌ಗೆ ಇಡೀ ದೇಶ ಕಾದು ಕುಳಿತಿರುವಾಗಲೇ ಆರ್ಥಿಕ ವೃದ್ಧಿ ದರ ಶೇ 6.8ಕ್ಕೆ ಕುಸಿದಿರುವುದು ಕಳವಳಕಾರಿ. ಕೇಂದ್ರ ಸಾಂಖ್ಯಿಕ ಕಚೇರಿ (ಸಿಎಸ್ಒ) ಈ ಕುಸಿತದ ವರದಿ ಮಾಡಿದ ನಂತರ, ಕೇಂದ್ರ ಸರ್ಕಾರದ ಮಾಜಿ ಆರ್ಥಿಕ ಸಲಹೆಗಾರ ಅರವಿಂದ ಸುಬ್ರಮಣಿಯನ್ ತಮ್ಮ ಸಂಶೋಧನೆಯನ್ನೇ ಆಧಾರವಾಗಿ ಇಟ್ಟುಕೊಂಡು ಹೇಳಿಕೆಯೊಂದನ್ನು ನೀಡಿದ್ದಾರೆ. 2011-17ರ ಅವಧಿಯಲ್ಲಿ ಭಾರತ ಶೇ 7ರಷ್ಟು ವಾರ್ಷಿಕ ಬೆಳವಣಿಗೆ ದರದ ಬದಲು ಕೇವಲ ಶೇ 4.5ರಷ್ಟು ಬೆಳವಣಿಗೆ ಸಾಧಿಸಿತ್ತು ಎಂಬ ಅವರ ಮಾತು ಸರ್ಕಾರಕ್ಕೆ ಒಂದಿಷ್ಟು ಮುಜುಗರ ಉಂಟು ಮಾಡಿದೆ.

‘ಉದ್ಯೋಗ ಸೃಷ್ಟಿಯಾಗಿಲ್ಲ ಎಂದ ಮೇಲೆ ಬೆಳವಣಿಗೆ ದರ ಶೇ 7ರಷ್ಟಾಗಿದೆ ಎಂದರೆ ನಂಬುವುದೇ ಕಷ್ಟ’ ಎಂದು ಮೋದಿ ಸಂಪುಟದ ಸದಸ್ಯರೊಬ್ಬರು ತಮ್ಮೊಡನೆ ಹೇಳಿಕೊಂಡಿರುವುದಾಗಿ, ಆರ್‌ಬಿಐನ ಮಾಜಿ ಗವರ್ನರ್ ರಘುರಾಂ ರಾಜನ್ ಕಳೆದ ಮಾರ್ಚ್‌ನಲ್ಲಿ ಟಿ.ವಿ ಚಾನೆಲ್‌ವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದರು. ಬಜೆಟ್‌ ಮಂಡನೆ ಹತ್ತಿರದಲ್ಲಿ ಇರುವಾಗ ರಾಜನ್ ಅವರ ಹೇಳಿಕೆಗೆ ಪೂರಕವಾದ ಅರವಿಂದ ಸುಬ್ರಮಣಿಯನ್‌ ವಾದದಿಂದ, ಜಿಡಿಪಿ ಬೆಳವಣಿಗೆ ಸುತ್ತ ಇರುವ ಸ್ವಲ್ಪ ಹಳೆಯ ವಿವಾದಕ್ಕೆ ಇನ್ನೊಂದು ಬಲವಾದ ತಿರುವು ಬಂದಂತಾಗಿದೆ.

ಬಜೆಟ್ ಮಂಡನೆಗಿಂತ ಮೊದಲು ಸಂಸತ್ತಿನಲ್ಲಿ ಮಂಡನೆಯಾಗುವ 2018-19ನೇ ವರ್ಷದ ಆರ್ಥಿಕ ಸಮೀಕ್ಷೆಯು ಈಗ ತೀವ್ರತೆ ಪಡೆದಿರುವ ವಿವಾದಕ್ಕೆ ಪೂರ್ತಿಯಾಗಿ ತೆರೆ ಎಳೆಯದಿದ್ದರೂ, ಪರಿಣಾಮಕಾರಿ ಉತ್ತರ ನೀಡುವ ಸಂಭವ ಇದೆ. ಸಿಎಸ್ಒ ಸಮೀಕ್ಷೆ ಮಾಡಿದ ಶೇ 7ರ ದರದ ಅಂದಾಜನ್ನು ಸಮರ್ಥಿಸಿಕೊಳ್ಳಲೂಬಹುದು. ವಿವಾದಕ್ಕೆ ದೊರೆತ ಹೊಸ ತಿರುವನ್ನು ನಿರ್ಮಲಾ ಅವರುಬಜೆಟ್ ಭಾಷಣದಲ್ಲಿ ತಮ್ಮದೇ ವೈಖರಿಯಲ್ಲಿ ತೀಕ್ಷ್ಣವಾಗಿ ಪ್ರಸ್ತಾಪಿಸಬಹುದು, ಖಂಡಿಸಲೂಬಹುದು. ಆದರೆ, ಉದ್ಯೋಗ ಸೃಷ್ಟಿಸಬಲ್ಲ ಬೆಳವಣಿಗೆ ದರ (ಶೇ 7ಕ್ಕಿಂತ ಜಾಸ್ತಿ) ಸಾಧಿಸುವ ನಿಟ್ಟಿನಲ್ಲಿ ಉದ್ದೇಶಿತ ಬಜೆಟ್‌ ದೊಡ್ಡ ಹೆಜ್ಜೆ ಇಡುವ ಅನಿವಾರ್ಯ ಸೃಷ್ಟಿಯಾಗಿದೆ ಎನ್ನುವುದನ್ನು ಎಲ್ಲರೂ ಒಪ್ಪಿಕೊಳ್ಳಬೇಕಾಗಿದೆ. ವಿಶ್ವಾಸಾರ್ಹ ರೀತಿಯಲ್ಲಿ ಬೆಳವಣಿಗೆ ದರ ಜಾಸ್ತಿಯಾಗದಿದ್ದರೆ ಮುಂದಿನ ದಿನಗಳಲ್ಲಿ ವಿದೇಶಿ ನೇರ ಹೂಡಿಕೆಯ ಹರಿವು ಕಡಿಮೆಯಾಗಿ ಸಮಸ್ಯೆಯಾಗಲಿದೆ. ಸಚಿವೆ ಇದನ್ನೆಲ್ಲ ಗಮನಿಸಿ ಬಜೆಟ್ ರೂಪಿಸಬೇಕಾಗಿದೆ. ಈತನಕ ಸಾಧಿಸಲಾಗದ ಉದ್ಯೋಗಸಹಿತ ಆರ್ಥಿಕ ಬೆಳವಣಿಗೆಯನ್ನು ಮುಂದೆ ಸಾಧಿಸುವ ವಿಶ್ವಾಸವನ್ನು ಪ್ರಬಲವಾಗಿ ವ್ಯಕ್ತಪಡಿಸುವ ಸಾಧ್ಯತೆಯೂ ಇದೆ.

ದೇಶದಲ್ಲಿ ಬೆಳವಣಿಗೆ ಪ್ರಕ್ರಿಯೆಯು ಹೂಡಿಕೆ ಚಾಲಿತವಲ್ಲ, ಅದು ಗ್ರಾಹಕರ ಬೇಡಿಕೆ ಚಾಲಿತವಾಗಿದೆ. ‘ಭಾರತದಲ್ಲಿಯೇ ತಯಾರಿಸಿ’ ಕಾರ್ಯಕ್ರಮದ ಪರಿಧಿಯಲ್ಲಿರುವ ತಯಾರಿಕಾ ರಂಗದಲ್ಲಿ ಹೂಡಿಕೆ –ಅದರಲ್ಲೂ ಖಾಸಗಿ ಹೂಡಿಕೆ– ಏರಿಕೆಯಾಗದೇ ಉದ್ಯೋಗ ಸೃಷ್ಟಿಯು ಗಣನೀಯ ಪ್ರಮಾಣದಲ್ಲಿ ಆಗದು. 2014ರಲ್ಲಿ ಒಟ್ಟು ಹೂಡಿಕೆಯ ಪ್ರಮಾಣ ಜಿಡಿಪಿಯ ಶೇ 34 ಇದ್ದದ್ದು ಈಗ ಶೇ 30ಕ್ಕೆ ಇಳಿದಿದೆ. ಖಾಸಗಿ ಹೂಡಿಕೆ ಉತ್ತೇಜಿಸಲು ಬಜೆಟ್ ಕ್ರಮ ತೆಗೆದುಕೊಳ್ಳಬೇಕಾಗಿದೆ. ಕಾರ್ಪೊರೇಟ್ ವಲಯಕ್ಕೆ ಇನ್ನಷ್ಟು ತೆರಿಗೆ ಕಡಿತದ ಲಾಭವಾಗಬಹುದು.

ಅರವಿಂದ ಪನಗರಿಯಾ ಅವರು ನೀತಿ ಆಯೋಗದ ಉಪಾಧ್ಯಕ್ಷರಾಗಿದ್ದಾಗ, ಮಾನವಶ್ರಮ ಆಧಾರಿತ ವಿಧಾನಗಳನ್ನು ಕಡಿಮೆ ಮಾಡಿ ಬಂಡವಾಳ ಆಧಾರಿತ ವಿಧಾನಗಳನ್ನು ಅಳವಡಿಸಿಕೊಂಡು, ಉದ್ಯೋಗ ಸೃಷ್ಟಿಯ ಬದಲು ಉದ್ಯೋಗ ನಷ್ಟ ಉಂಟು ಮಾಡುತ್ತಿರುವ ಖಾಸಗಿ ರಂಗದ ಕೈಗಾರಿಕೆಗಳ ವಿರುದ್ಧ ಹರಿಹಾಯ್ದಿದ್ದರು. ಈಗ ಉದ್ಯೋಗ ಸೃಷ್ಟಿಯ ಮಾನದಂಡವನ್ನು ಉಪಯೋಗಿಸಿ, ತೆರಿಗೆ ಕಡಿತದ ಲಾಭವನ್ನು ಖಾಸಗಿ ರಂಗದ ಕೈಗಾರಿಕೆಗಳಿಗೆ ನೀಡುವುದು ಸಮಂಜಸವಾಗಬಹುದು. ತೆರಿಗೆ ಕಡಿತದ ಪರಿಣಾಮದ ಮೌಲ್ಯಮಾಪನಕ್ಕೆ ಬೇಕಾದ ಸಾಂಸ್ಥಿಕ ವ್ಯವಸ್ಥೆಯನ್ನು ರೂಪಿಸಲು ಕೇಂದ್ರ ಸರ್ಕಾರ ಮುತುವರ್ಜಿ ವಹಿಸಬೇಕಾಗಿದೆ.