ಪಾಲಿಟೆಕ್ನಿಕ್ ಪರೀಕ್ಷೆಯಲ್ಲಿ ಪಠ್ಯೇತರ ಪ್ರಶ್ನೆಗೆ ಆತಂಕ
ಬೆಂಗಳೂರು, ಮೇ 19– ಪಾಲಿಟೆಕ್ನಿಕ್ ಪ್ರಥಮ ವರ್ಷದ ವಿದ್ಯಾರ್ಥಿಗಳಿಗೆ ಮೇ 5ರಂದು ನಡೆದ ಪರೀಕ್ಷೆಯ ಪ್ರಶ್ನೆಪತ್ರಿಕೆಯಲ್ಲಿ20 ಅಂಕಗಳ ಪ್ರಶ್ನೆಯೊಂದು ಪಠ್ಯೇತರ ಪ್ರಶ್ನೆಯಾಗಿದ್ದು, ವಿದ್ಯಾರ್ಥಿಗಳಿಗೆ ಆತಂಕವನ್ನುಂಟು ಮಾಡಿದೆ.
ಈ ಪ್ರಶ್ನೆಗೆ ಪರಿಹಾರ ದೊರೆಯದಿದ್ದಲ್ಲಿ 100 ಅಂಕಗಳಲ್ಲಿ 20 ಅಂಕಗಳು ತಾವಾಗಿಯೇ ಕೈಬಿಟ್ಟು ಹೋಗುವುದರಿಂದ ಪಡೆಯುವ ಅಂಕ ಕಡಿಮೆಯಾಗಿ, ಫಲಿತಾಂಶವೂ ಕಡಿಮೆಯಾಗುವ ಸಂಭವವಿದೆ.
ಪ್ರಥಮ ವರ್ಷದ ಫಲಿತಾಂಶಶೇ 20ರಿಂದ 25ರಷ್ಟು ಇದ್ದು, ಆ ಪ್ರಮಾಣ ಈ ವರ್ಷ ಏಳೆಂಟರಷ್ಟು ಕಡಿಮೆಯಾಗುವ ಆತಂಕ ಇದೆ ಎಂಬುದು ನಗರದ ಸರ್ಕಾರಿ ಪಾಲಿಟೆಕ್ನಿಕ್ ಉಪನ್ಯಾಸಕರೊಬ್ಬರ ಅಭಿಪ್ರಾಯ.
ಸೋನಿಯಾ ಅಭಿಮಾನಿ ಆತ್ಮಾಹುತಿ ಯತ್ನ
ನವದೆಹಲಿ, ಮೇ 19 (ಯುಎನ್ಐ, ಪಿಟಿಐ)– ಸೋನಿಯಾ ಗಾಂಧಿ ಅವರು ಕಾಂಗ್ರೆಸ್ ಪಕ್ಷದ ಅಧ್ಯಕ್ಷ ಸ್ಥಾನಕ್ಕೆ ನೀಡಿರುವ ರಾಜೀನಾಮೆಯನ್ನು ಹಿಂತೆಗೆದುಕೊಳ್ಳಬೇಕು ಎಂದು ಆಗ್ರಹಿಸಿ ಇಲ್ಲಿನ ಅವರ ನಿವಾಸದ ಸಮೀಪ ಸೇರಿದಂತೆ ದೇಶದ ವಿವಿಧ ಭಾಗಗಳಲ್ಲಿ ಅಭಿಮಾನಿಗಳು ಆತ್ಮಾಹುತಿಗೆ ಯತ್ನಿಸಿದ ಘಟನೆಗಳು ಬುಧವಾರ ನಡೆದಿವೆ.
ಸೋನಿಯಾ ಅವರ ನಿವಾಸದ ಹೊರಗೆ ಮಹಿಳಾ ಅಭಿಮಾನಿಯೊಬ್ಬರು ತಮ್ಮ ಮೈಮೇಲೆ ಬೆಂಕಿ ಹಚ್ಚಿಕೊಂಡರೆ,ಹೈದರಾಬಾದಿನಲ್ಲಿ ಕಾಂಗ್ರೆಸ್ ಕಾರ್ಯಕರ್ತೆಯರು ನಡೆಸಿದ ಆತ್ಮಾಹುತಿ ಯತ್ನವನ್ನು ವಿಫಲಗೊಳಿಸಲಾಯಿತು.
