ವಿಷವರ್ತುಲದಲ್ಲಿ ಮಿಂಚುಕಂಗಳ ಚಿಣ್ಣರು

ಒಂದು ಬಾರಿ ಮದ್ಯ ಸರಬರಾಜು ಮಾಡಿದರೆ ಐದರಿಂದ ಹತ್ತು ರೂಪಾಯಿಯವರೆಗೆ ಭಕ್ಷೀಸು ಪಡೆಯುವ ಮಕ್ಕಳು, ದಿನವಿಡೀ ಊರ ಹೊರಗಿನ ಈ ಬಾರ್ ಹತ್ತಿರವೇ ಸುಳಿದಾಡುತ್ತಾರೆ. ಈ ಮಕ್ಕಳ ಹಸಿವನ್ನು ಅಲ್ಲಿಯೇ ಸಿಗುವ ಕಳಪೆ ಗುಣಮಟ್ಟದ ಆಹಾರ ಮತ್ತು ಕಲುಷಿತ ನೀರು ಪೂರೈಸುತ್ತವೆ. ಈ ಚಿಣ್ಣರು 3ರಿಂದ 9ನೇ ತರಗತಿಗಳಲ್ಲಿ ಓದುತ್ತಿದ್ದು, ಶಾಲೆಗಳಿಗೆ ರಜೆ ಇರುವುದರಿಂದ ಈ ರೀತಿಯ ‘ಡೆಲಿವರಿ ಬಾಯ್’ಗಳಾಗಿದ್ದಾರೆ. ಶುಭ್ರ ದಿರಿಸು ತೊಟ್ಟು, ಪಾಟಿಚೀಲ ಬೆನ್ನಿಗೇರಿಸಿಕೊಂಡು ಶಾಲೆಗೆ ಹೋಗಬೇಕಾದವರು ಕೊಳಕು ಬಟ್ಟೆಯ ಎದೆಜೇಬಿನಲ್ಲಿ ಸಂಡಿಗೆ ಪ್ಯಾಕೆಟ್, ನಿಕ್ಕರ್ ಜೇಬಿನಲ್ಲಿ ಮದ್ಯ ಮತ್ತು ನೀರಿನ ಪ್ಯಾಕೆಟ್ ಇರಿಸಿಕೊಂಡು ಓಡುವುದನ್ನು ನೋಡಿದರೆ ಎಂತಹ ಕಲ್ಲೆದೆಗೂ ನೋವಾಗದಿರದು. ತಮಗೆ ಅರಿವಿಲ್ಲದಂತೆ ವಿಷವರ್ತುಲವೊಂದರ ಭಾಗವಾಗಿರುವ ಈ ಮಿಂಚುಕಂಗಳ ಚಿಣ್ಣರನ್ನು ರಕ್ಷಿಸಬೇಕಿರುವುದು ಸಮಾಜದ ಕರ್ತವ್ಯ. ಮೊದಲಿಗೆ ಬಾರ್‌ಗಳಲ್ಲಿ ಮಕ್ಕಳ ಪ್ರವೇಶವನ್ನು ನಿಷೇಧಿಸಬೇಕು. ಮಕ್ಕಳಿಂದ ಮದ್ಯ ತರಿಸಿಕೊಳ್ಳುವವರ ಮತ್ತು ಮಕ್ಕಳಿಗೆ ಮದ್ಯ ಮಾರುವವರ ವಿರುದ್ಧ ಕಾನೂನು ಕ್ರಮ ಜರುಗಿಸಬೇಕು.

ಮಹೇಶ್ವರ ಹುರುಕಡ್ಲಿ, ಬಾಚಿಗೊಂಡನಹಳ್ಳಿ, ಹಗರಿಬೊಮ್ಮನಹಳ್ಳಿ