ಮುಂಬೈನ ಉದ್ಯಮಿಯೊಬ್ಬರು ಕೊರೊನಾ ಸೋಂಕಿನಿಂದ ರಕ್ಷಿಸಿಕೊಳ್ಳಲು ಚಿನ್ನದ ಮಾಸ್ಕ್‌ ಧರಿಸುವ ಸುದ್ದಿ (ಪ್ರ.ವಾ., ಜುಲೈ 5) ಓದಿ ಗಾಬರಿಯಾಯಿತು. ಮೂರು ರೂಪಾಯಿಯದೋ ಮೂರು ಲಕ್ಷ ರೂಪಾಯಿಯದೋ ಎಂದು ಕೊರೊನಾಗೆ ಗೊತ್ತಾಗುವುದಿಲ್ಲ. ರಂಧ್ರ ಇರುವಲ್ಲೆಲ್ಲ ನುಸುಳುವುದಷ್ಟೇ ಅದರ ಗುರಿ. ಲೋಹದ ಹಾಳೆಯ ಮುಖಗವಸುಗಳನ್ನು ಗುಡಿ-ವೃತ್ತದಲ್ಲಿ ನಿಲ್ಲಿಸಿರುವ ಪ್ರತಿಮೆಗಳಿಗೆ ತೊಡಿಸಬಹುದೇ ವಿನಾ ಮನುಷ್ಯರಿಗೆ ಅದರಿಂದ ಉಪಯೋಗವಿಲ್ಲ. ಇನ್ನಾದರೂ ಭಾರತೀಯರು ತಮ್ಮ ಅವೈಜ್ಞಾನಿಕ ತಿಳಿವಳಿಕೆ, ಪ್ರಚಾರಪ್ರಿಯತೆ, ಸಿರಿವಂತಿಕೆಯ ಪ್ರದರ್ಶನ ಮತ್ತು ಆಭರಣಪ್ರಿಯತೆಯನ್ನು ಕಡಿಮೆ ಮಾಡಿಕೊಳ್ಳಬೇಕು.
