ನಮ್ಮದೊಂದು ಪುಟ್ಟ ಹಳ್ಳಿ. ಇಲ್ಲಿನ ಜನರ ಪ್ರತಿದಿನದ ಸಂಜೆಯ ಹರಟೆ, ಮನರಂಜನೆಗೆ ಊರ ಆಂಜನೇಯನ ಗುಡಿಯ ಆವರಣ ಮೀಸಲು. ವಯಸ್ಸು ಮತ್ತು ಜಾತಿಯ ಭೇದವಿಲ್ಲದೆ ಬಹುತೇಕರು ಸಮಾನಮನಸ್ಕರೊಡನೆ ಸೇರಿ ಮಾತುಕತೆಗಳಲ್ಲಿ ತೊಡಗುತ್ತಾರೆ. ಬೇಸಾಯ, ಸಿನಿಮಾ, ಮಳೆ, ಕೂಲಿ, ರಾಜಕೀಯ, ರೋಗರುಜಿನ, ಕ್ರಿಕೆಟ್ ಹೀಗೆ ಓಣಿಗಳ ಸುದ್ದಿಯಿಂದ ಹಿಡಿದು ಅಂತರರಾಷ್ಟ್ರೀಯ ಮಟ್ಟದ ವಿಚಾರಗಳವರೆಗೂ ಮಾತುಕತೆ ಸಾಗುತ್ತದೆ. ಇಂತಹ ಅನೌಪಚಾರಿಕ ಶಿಕ್ಷಣ ಕೇಂದ್ರವಾಗಿರುವ ನಮ್ಮ ಗುಡಿ ಇತ್ತೀಚಿನ ದಿನಗಳಲ್ಲಿ ಮಾತಿಲ್ಲದೆ ಸೊರಗಿದಂತಾಗಿದೆ.
