ನಕಾರಾತ್ಮಕ ನೆಲೆಯಲ್ಲಿ ಸ್ತ್ರೀವಾದ

ಸುಶಾಂತ್ ಸಿಂಗ್ ರಜಪೂತ್ ಪ್ರಕರಣದ ಪ್ರಮುಖ ಆರೋಪಿ ರಿಯಾ ಚಕ್ರವರ್ತಿ ವಿಚಾರಣೆಗೆ ಹಾಜರಾದಾಗ ಧರಿಸಿದ್ದ ಟಿ– ಷರ್ಟ್ ಮೇಲೆ ಬರೆದಿದ್ದ ‘ನಾನು ಮತ್ತು ನೀವು ಪಿತೃಪ್ರಭುತ್ವವನ್ನು ಒಡೆಯೋಣ’ ಎಂಬ ಸಾಲುಗಳು ಸ್ತ್ರೀಪರ ಚಿಂತನೆಗೆ ಮರುಜೀವ ತುಂಬಿವೆ ಎಂದು ರೇಣುಕಾ ನಿಡಗುಂದಿ ಬರೆದಿದ್ದಾರೆ! (ಸಂಗತ, ಸೆ. 23). ಸ್ತ್ರೀಪರ ಕಾಳಜಿಯ ಪ್ರೇರಣೆಯನ್ನು ಕೆಲವರು ಇಂತಹ ಬರಹದಲ್ಲಿ ಕಂಡುಕೊಳ್ಳುವುದು ಅಪಾಯಕಾರಿ ಮನಃಸ್ಥಿತಿ.

ವಿಶ್ವದ ಮಹಿಳೆಯರಲ್ಲಿ ಶೇ 60ರಷ್ಟು ಮಂದಿಯ ಸ್ಥಿತಿಗತಿಯು ಕೋವಿಡ್‌ ಸಂದರ್ಭದಲ್ಲಿ ಆತಂಕಕಾರಿ ಆಗಿರುವ ಬಗ್ಗೆ ವಿಶ್ವಸಂಸ್ಥೆಯ ಮಹಾಪ್ರಧಾನ ಕಾರ್ಯದರ್ಶಿ ಆ್ಯಂಟೊನಿಯೊ ಗುಟೆರಸ್‍ ಕಳವಳ ವ್ಯಕ್ತಪಡಿಸಿದ್ದಾರೆ. ಚಿಕ್ಕ ವಯಸ್ಸಿನಲ್ಲಿ ಗರ್ಭ ಧರಿಸುವವರ ಸಂಖ್ಯೆ ಹೆಚ್ಚುತ್ತಿರುವುದು, ಆರ್ಥಿಕ ಕುಸಿತದಿಂದ ಲಕ್ಷಾಂತರ ಮಹಿಳೆಯರು ಉದ್ಯೋಗ ಕಳೆದುಕೊಂಡಿರುವುದರತ್ತ ವಿಶ್ವಸಂಸ್ಥೆ ಬೊಟ್ಟು ಮಾಡಿದೆ. ಶಾಸನಸಭೆಗಳಲ್ಲಿ ಮಹಿಳೆಯರಿಗೆ ಮೀಸಲಾತಿ ಕಲ್ಪಿಸುವ ಉದ್ದೇಶದ ಮಸೂದೆ ನನೆಗುದಿಗೆ ಬಿದ್ದಿದೆ. ಇಂದು ಸ್ತ್ರೀವಾದ ಬಹುಮುಖ್ಯವಾದ ಇಂತಹ ನೆಲೆಗಳನ್ನು ಗುರಿಯಾಗಿ ಇಟ್ಟುಕೊಳ್ಳದೆ, ಸೆಲೆಬ್ರಿಟಿಗಳ ಪ್ರಕರಣಗಳನ್ನು ವಿಶ್ಲೇಷಿಸುತ್ತಾ ಹೋದರೆ, ಇದನ್ನು ಸ್ತ್ರೀಪರ ಕಾಳಜಿ ಎನ್ನಲಾಗದು.

ಉಮೇಶ ಕುಮಾರ ಸೊರಟೂರು, ಶಿವಮೊಗ್ಗ