ಚಿರತೆ ಜೀವಕ್ಕೆ ಇರಲಿ ಆದ್ಯತೆ

ಭಾರತದಲ್ಲಿ ಚಿರತೆಗಳ ಸಂಖ್ಯೆಯಲ್ಲಿ ಏರಿಕೆಯಾಗಿರುವುದು (ಪ್ರ.ವಾ.‌, ಡಿ. 23) ಸಹಜವಾಗಿ ಖುಷಿ ತಂದಿದೆ. ಆದರೆ ಅವುಗಳ ಸಂಖ್ಯೆಗೆ ಅನುಗುಣವಾಗಿ ಮಾನವ– ವನ್ಯಜೀವಿ ಸಂಘರ್ಷವೂ ಹೆಚ್ಚಾಗುತ್ತದೆ ಎನ್ನುವುದನ್ನು ಮರೆಯುವಂತಿಲ್ಲ. ಏಕೆಂದರೆ‌ ಹುಲಿಗಳಂತೆ ಕಾಡಿನಲ್ಲಿ ಅಷ್ಟೇ ವಾಸಿಸುವ ಜಾಯಮಾನ ಚಿರತೆಯದ್ದಲ್ಲ. ಅದು ಹೆಚ್ಚಾಗಿ ಜನರ ವಾಸಸ್ಥಾನಗಳ ಬಳಿ ವಾಸಿಸುವ ಕುಶಾಗ್ರಮತಿ.‌ ಕುರುಚಲು ಕಾಡು, ಕಬ್ಬಿನ ಗದ್ದೆಗಳು, ಪುಟ್ಟ ಗುಡ್ಡಗಳ ಸುತ್ತಮುತ್ತಲಿನಲ್ಲೂ ಅನಾಯಾಸವಾಗಿ ಬದುಕುಳಿಯಬಲ್ಲ ಮತ್ತು ಮನುಷ್ಯನ ಚಟುವಟಿಕೆಗಳು ಹೆಚ್ಚಿರುವ ಪ್ರದೇಶದಲ್ಲೂ ಆಹಾರ ಗಳಿಸಿಕೊಳ್ಳಬಲ್ಲ ಜೀವಿ.