‘ಸರ್ಕಾರಿ ವೈದ್ಯ’ರಿಗೊಂದು ಕೋಟಾ ಇರಲಿ

ವೈದ್ಯಕೀಯ ಕೋರ್ಸ್‌ನಲ್ಲಿಯೇ ‘ಸರ್ಕಾರಿ ವೈದ್ಯರ ಹುದ್ದೆ’ಗಳಿಗೆ ಎಂದು ಕೋಟಾ ನಿಗದಿಪಡಿಸಿದರೆ ಈ ಸಮಸ್ಯೆಗೆ ಸ್ವಲ್ಪಮಟ್ಟಿಗೆ ಪರಿಹಾರ ಸಿಗಬಹುದೇನೊ. ಪ್ರತಿವರ್ಷ ವೈದ್ಯಕೀಯ ಪದವಿಯ ಸೀಟ್‍ಗಳಲ್ಲಿ ಸರ್ಕಾರಿ ವೈದ್ಯರ ಹುದ್ದೆಗೆಂದೇ ಪ್ರತೀ ಕಾಲೇಜಿಗೆ ಕನಿಷ್ಠ ಒಂದು ಸೀಟ್ ಮೀಸಲಿರಿಸಿದರೂ ಐದು ವರ್ಷಗಳ ನಂತರ ಪ್ರತಿವರ್ಷ 30–40 ವೈದ್ಯರು ಸರ್ಕಾರಿ ಸೇವೆಗೆ ದೊರಕುತ್ತಾರೆ. ಆ ಕೋಟಾದಲ್ಲಿ ವೈದ್ಯಕೀಯ ಪದವಿ ಪಡೆದು ಬಂದವರು ಕಡ್ಡಾಯವಾಗಿ ಕೇವಲ ಸರ್ಕಾರಿ ಆಸ್ಪತ್ರೆಯಲ್ಲಿ ಕೆಲಸ ಮಾಡುವಂತಾಗಬೇಕು. ಸ್ವಲ್ಪ ವರ್ಷಗಳ ಸೇವೆಯ ಬಳಿಕ ಸ್ನಾತಕೋತ್ತರ ಪದವಿಗೆ ಕೂಡ ಅವಕಾಶ ಕಲ್ಪಿಸಬಹುದು. ಈ ಕೋಟಾದಲ್ಲಿ ಎಲ್ಲರಿಗೂ ಆಸಕ್ತಿ ಇಲ್ಲದಿದ್ದರೂ ಯಾರಾದರೂ ಪ್ರತಿಭಾವಂತ ಬಡ ವಿದ್ಯಾರ್ಥಿಗಳಂತೂ ಖಂಡಿತ ಬರುತ್ತಾರೆ. ಈ ದಿಸೆಯಲ್ಲಿ ಸರ್ಕಾರ ಯೋಚಿಸಿ ಸೂಕ್ತ ಕ್ರಮ ಕೈಗೊಂಡರೆ ಸರ್ಕಾರಿ ಆಸ್ಪತ್ರೆಗಳಲ್ಲಿ ವೈದ್ಯರ ಕೊರತೆಗೆ ಪರಿಹಾರ ಸಿಗಬಹುದೇನೊ.